jagajjālapālaṃ kanatkaṃṭhamālaṃ śaraccaṃdraphālaṃ mahādaityakālam । nabhonīlakāyaṃ durāvāramāyaṃ supadmāsahāyaṃ bhaje'haṃ bhaje'ham ॥ 1 ॥ sadāṃbhodhivāsaṃ galatpuṣpahāsaṃ jagatsannivāsaṃ śatādityabhāsam । gadācakraśastraṃ lasatpītavastraṃ hasaccāruvaktraṃ bhaje'haṃ bhaje'ham ॥ 2 ॥ ramākaṃṭhahāraṃ śrutivrātasāraṃ jalāṃtarvihāraṃ dharābhārahāram । cidānaṃdarūpaṃ manojñasvarūpaṃ dhṛtānekarūpaṃ bhaje'haṃ bhaje'ham ॥ 3 ॥ jarājanmahīnaṃ parānaṃdapīnaṃ samādhānalīnaṃ sadaivānavīnam । jagajjanmahetuṃ surānīkaketuṃ trilokaikasetuṃ bhaje'haṃ bhaje'ham ॥ 4 ॥ kṛtāmnāyagānaṃ khagādhīśayānaṃ vimukternidānaṃ harārātimānam । svabhaktānukūlaṃ jagadvṛkṣamūlaṃ nirastārtaśūlaṃ bhaje'haṃ bhaje'ham ॥ 5 ॥ samastāmareśaṃ dvirephābhakeśaṃ jagadbiṃbaleśaṃ hṛdākāśaveśam । sadā divyadehaṃ vimuktākhilehaṃ suvaikuṃṭhagehaṃ bhaje'haṃ bhaje'ham ॥ 6 ॥ surālībaliṣṭhaṃ trilokīvariṣṭhaṃ gurūṇāṃ gariṣṭhaṃ svarūpaikaniṣṭham । sadā yuddhadhīraṃ mahāvīravīraṃ bhavāṃbhodhitīraṃ bhaje'haṃ bhaje'ham ॥ 7 ॥ ramāvāmabhāgaṃ talālagnanāgaṃ kṛtādhīnayāgaṃ gatārāgarāgam । munīṃdraissugītaṃ suraissaṃparītaṃ guṇaughairatītaṃ bhaje'haṃ bhaje'ham ॥ 8 ॥ phalaśruti – idaṃ yastu nityaṃ samādhāya cittaṃ paṭhedaṣṭakaṃ kaṃṭhahāraṃ murāreḥ । sa viṣṇorviśokaṃ dhruvaṃ yāti lokaṃ jarājanmaśokaṃ punarviṃdate no ॥ 9 ॥ iti śrī paramahaṃsasvāmi brahmānaṃdaviracitaṃ śrīharistotram ॥