asya śrīnārāyaṇahṛdayastotramaṃtrasya bhārgava ṛṣiḥ, anuṣṭupchaṃdaḥ, śrīlakṣmīnārāyaṇo devatā, oṃ bījaṃ, namaśśaktiḥ, nārāyaṇāyeti kīlakaṃ, śrīlakṣmīnārāyaṇa prītyarthe jape viniyogaḥ । karanyāsaḥ – oṃ nārāyaṇaḥ paraṃ jyotiriti aṃguṣṭhābhyāṃ namaḥ । nārāyaṇaḥ paraṃ brahmeti tarjanībhyāṃ namaḥ । nārāyaṇaḥ paro deva iti madhyamābhyāṃ namaḥ । nārāyaṇaḥ paraṃ dhāmeti anāmikābhyāṃ namaḥ । nārāyaṇaḥ paro dharma iti kaniṣṭhikābhyāṃ namaḥ । viśvaṃ nārāyaṇa iti karatalakarapṛṣṭhābhyāṃ namaḥ । aṃganyāsaḥ – nārāyaṇaḥ paraṃ jyotiriti hṛdayāya namaḥ । nārāyaṇaḥ paraṃ brahmeti śirase svāhā । nārāyaṇaḥ paro deva iti śikhāyai vauṣaṭ । nārāyaṇaḥ paraṃ dhāmeti kavacāya huṃ । nārāyaṇaḥ paro dharma iti netrābhyāṃ vauṣaṭ । viśvaṃ nārāyaṇa iti astrāya phaṭ । digbaṃdhaḥ । oṃ aiṃdryādidaśadiśaṃ oṃ namaḥ sudarśanāya sahasrārāya huṃ phaṭ badhnāmi namaścakrāya svāhā । iti pratidiśaṃ yojyaṃ । atha dhyānaṃ – udyādādityasaṃkāśaṃ pītavāsaṃ caturbhujaṃ । śaṃkhacakragadāpāṇiṃ dhyāyellakṣmīpatiṃ hariṃ ॥ 1 ॥ trailokyādhāracakraṃ tadupari kamaṭhaṃ tatra cānaṃtabhogī tanmadhye bhūmipadmāṃkuśaśikharadalaṃ karṇikābhūtameruṃ । tatrasthaṃ śāṃtamūrtiṃ maṇimayamakuṭaṃ kuṃḍalodbhāsitāṃgaṃ lakṣmīnārāyaṇākhyaṃ sarasijanayanaṃ saṃtataṃ ciṃtayāmi ॥ 2 ॥ atha mūlāṣṭakaṃ – oṃ ॥ nārāyaṇaḥ paraṃ jyotirātmā nārāyaṇaḥ paraḥ । nārāyaṇaḥ paraṃ brahma nārāyaṇa namo'stu te ॥ 1 ॥ nārāyaṇaḥ paro devo dhātā nārāyaṇaḥ paraḥ । nārāyaṇaḥ paro dhātā nārāyaṇa namo'stu te ॥ 2 ॥ nārāyaṇaḥ paraṃ dhāma dhyānaṃ nārāyaṇaḥ paraḥ । nārāyaṇa paro dharmo nārāyaṇa namo'stu te ॥ 3 ॥ nārāyaṇaḥ parovedyaḥ vidyā nārāyaṇaḥ paraḥ । viśvaṃ nārāyaṇaḥ sākṣānnārāyaṇa namo'stu te ॥ 4 ॥ nārāyaṇādvidhirjāto jāto nārāyaṇādbhavaḥ । jāto nārāyaṇādiṃdro nārāyaṇa namo'stu te ॥ 5 ॥ ravirnārāyaṇastejaḥ caṃdro nārāyaṇo mahaḥ । vahnirnārāyaṇaḥ sākṣānnārāyaṇa namo'stu te ॥ 6 ॥ nārāyaṇa upāsyaḥ syādgururnārāyaṇaḥ paraḥ । nārāyaṇaḥ paro bodho nārāyaṇa namo'stu te ॥ 7 ॥ nārāyaṇaḥ phalaṃ mukhyaṃ siddhirnārāyaṇaḥ sukhaṃ । sevyonārāyaṇaḥ śuddho nārāyaṇa namo'stu te ॥ 8 ॥ atha prārthanādaśakaṃ – nārāyaṇa tvamevāsi daharākhye hṛdi sthitaḥ । prerakaḥ preryamāṇānāṃ tvayā preritamānasaḥ ॥ 9 ॥ tvadājñāṃ śirasā dhṛtvā japāmi janapāvanaṃ । nānopāsanamārgāṇāṃ bhavakṛdbhāvabodhakaḥ ॥ 10 ॥ bhāvārthakṛdbhavātīto bhava saukhyaprado mama । tvanmāyāmohitaṃ viśvaṃ tvayaiva parikalpitaṃ ॥ 11 ॥ tvadadhiṣṭhānamātreṇa sā vai sarvārthakāriṇī । tvametāṃ ca puraskṛtya sarvakāmānpradarśaya ॥ 12 ॥ na me tvadanyastrātāsti tvadanyanna hi daivataṃ । tvadanyaṃ na hi jānāmi pālakaṃ puṇyavardhanaṃ ॥ 13 ॥ yāvatsāṃsāriko bhāvo manasstho bhāvanātmakaḥ । tāvatsiddhirbhavetsādhyā sarvathā sarvadā vibho ॥ 14 ॥ pāpināmahamevāgryo dayālūnāṃ tvamagraṇīḥ । dayanīyo madanyo'sti tava ko'tra jagattraye ॥ 15 ॥ tvayāhaṃ naiva sṛṣṭaścenna syāttava dayālutā । āmayo vā na sṛṣṭaścedauṣadhasya vṛthodayaḥ ॥ 16 ॥ pāpasaṃghapariśrāṃtaḥ pāpātmā pāparūpadhṛt । tvadanyaḥ ko'tra pāpebhyastrātāsti jagatītale ॥ 17 ॥ tvameva mātā ca pitā tvameva tvameva baṃdhuśca sakhā tvameva । tvameva sevyaśca gurustvameva tvameva sarvaṃ mama deva deva ॥ 18 ॥ prārthanādaśakaṃ caiva mūlāṣṭakamataḥ paraṃ । yaḥ paṭhecchṛṇuyānnityaṃ tasya lakṣmīḥ sthirā bhavet ॥ 19 ॥ nārāyaṇasya hṛdayaṃ sarvābhīṣṭaphalapradaṃ । lakṣmīhṛdayakaṃ stotraṃ yadi cettadvinākṛtaṃ ॥ 20 ॥ tatsarvaṃ niṣphalaṃ proktaṃ lakṣmīḥ kruddhyati sarvadā । etatsaṃkalitaṃ stotraṃ sarvakāmaphalapradaṃ ॥ 21 ॥ lakṣmīhṛdayakaṃ caiva tathā nārāyaṇātmakaṃ । japedyaḥ saṃkalīkṛtya sarvābhīṣṭamavāpnuyāt ॥ 22 ॥ nārāyaṇasya hṛdayamādau japtvā tataḥ paraṃ । lakṣmīhṛdayakaṃ stotraṃ japennārāyaṇaṃ punaḥ ॥ 23 ॥ punarnārāyaṇaṃ japtvā punarlakṣmīnutiṃ japet । punarnārāyaṇaṃ jāpyaṃ saṃkalīkaraṇaṃ bhavet ॥ 24 ॥ evaṃ madhye dvivāreṇa japetsaṃkalitaṃ tu tat । lakṣmīhṛdayakaṃ stotraṃ sarvakāmaprakāśitaṃ ॥ 25 ॥ tadvajjapādikaṃ kuryādetatsaṃkalitaṃ śubhaṃ । sarvānkāmānavāpnoti ādhivyādhibhayaṃ haret ॥ 26 ॥ gopyametatsadā kuryānna sarvatra prakāśayet । iti guhyatamaṃ śāstraṃ prāptaṃ brahmādikaiḥ purā ॥ 27 ॥ tasmātsarvaprayatnena gopayetsādhayesudhīḥ । yatraitatpustakaṃ tiṣṭhellakṣmīnārāyaṇātmakaṃ ॥ 28 ॥ bhūtapaiśācavetāla bhayaṃ naiva tu sarvadā । lakṣmīhṛdayakaṃ proktaṃ vidhinā sādhayetsudhīḥ ॥ 29 ॥ bhṛguvāre ca rātrau ca pūjayetpustakadvayaṃ । sarvathā sarvadā satyaṃ gopayetsādhayetsudhīḥ । gopanātsādhanālloke dhanyo bhavati tattvataḥ ॥ 30 ॥ ityatharvarahasye uttarabhāge nārāyaṇahṛdayaṃ saṃpūrṇaṃ ।