śrī vārāhī devi stavaṃ dhyānam – aiṅkāradvayamadhyasaṃsthita lasadbhūbījavarṇātmikāṃ duṣṭārātijanākṣi vaktrakarapadastambhinīṃ jṛmbhiṇīm । lokān mohayantīṃ dṛśā ca mahāsādaṃṣṭrākarālākṛtiṃ vārtālīṃ praṇato'smi santatamahaṃ ghoṇiṃ rathopasthitām ॥ śrīkirirathamadhyasthāṃ potrimukhīṃ cidghanaikasadrūpām । halamusalāyudhahastāṃ naumi śrīdaṇḍanāyikāmambām ॥ 1 ॥ vāgbhavabhūvāgīśī bījatrayaṭhārṇavaiśca samyuktām । kavacāstrānalajāyāyatarūpāṃ naumi śuddhavārāhīm ॥ 2 ॥ svapnaphalabodhayitrīṃ svapneśīṃ sarvaduḥkhavinihantrīm । natajanaśubhakāriṇīṃ śrīkirivadanāṃ naumi saccidānandām ॥ 3 ॥ pañcadaśavarṇavihitāṃ pañcamyambāṃ sadā kṛpālambām । añcitamaṇimayabhūṣāṃ cintitaphaladāṃ namāmi vārāhīm ॥ 4 ॥ vighnāpannirmūlana vidyeśīṃ sarvaduḥkhavinihantrīm । sakalajagatsaṃstambhanacaturāṃ śrīstambhinīṃ kalaye ॥ 5 ॥ daśavarṇarūpamanuvara viśadāṃ turagādhirājasaṃrūḍhām । śubhadāṃ divyajagattrayavāsinīṃ sukhadāyinīṃ sadā kalaye ॥ 6 ॥ uddhatrīkṣmāṃ jalanidhi magnāṃ daṃṣṭrāgralagnabhūgolām । bhaktanadimodamānāṃ unmattākāra bhairavīṃ vande ॥ 7 ॥ saptadaśākṣararūpāṃ saptodadhipīṭhamadhyagāṃ divyām । bhaktārtināśanipuṇāṃ bhavabhayavidhvaṃsinīṃ parāṃ vande ॥ 8 ॥ nīlaturagādhirūḍhāṃ nīlāñcita vastrabhūṣaṇopetām । nīlābhāṃ sarvatiraskariṇīṃ sambhāvaye mahāmāyām ॥ 9 ॥ salasaṅkhyamantrarūpāṃ vilasadbhūṣāṃ vicitravastrāḍhyām । sulalitatanvīṃ nīlāṃ kalaye paśuvarga mohinīṃ devīm ॥ 10 ॥ vairikṛtasakalabhīkara kṛtyāvidhvaṃsinīṃ karālāsyām । śatrugaṇabhīmarūpāṃ dhyāye tvāṃ śrīkirātavārāhīm ॥ 11 ॥ catvāriṃśadvarṇakamanurūpāṃ sūryakoṭisaṅkāśām । devīṃ siṃhaturaṅgāṃ vividhāyudhadhāriṇīṃ kīṭīṃ naumi ॥ 12 ॥ dhūmākāravikārāṃ dhūmānalasannibhāṃ sadā mattām । paripanthiyūthahantrīṃ vande nityaṃ ca dhūmravārāhīm ॥ 13 ॥ varṇacaturviṃśatikāṃ mantreśīṃ samadamahiṣapṛṣṭhasthām । ugrāṃ vinīladehāṃ dhyāye kirivaktra devatāṃ nityam ॥ 14 ॥ bindugaṇatātmakoṇāṃ gajadalāvṛttatrayātmikāṃ divyām । sadanatrayasaṃśobhita cakrasthāṃ naumi siddhavārāhīm ॥ 15 ॥ vārāhī stotrametadyaḥ prapaṭhedbhaktisamyutaḥ । sa vai prāpnoti satataṃ sarvasaukhyāspadaṃ padam ॥ 16 ॥ iti śrī vārāhī devi stavam ।