Varahi Nigraha Ashtakam

devi kroḍamukhi tvadaṅghrikamaladvandvānuraktātmane

mahyaṃ druhyati yo maheśi manasā kāyena vācā naraḥ ।

tasyāśu tvadayograniṣṭhurahalāghātaprabhūtavyathā-

-paryasyanmanaso bhavantu vapuṣaḥ prāṇāḥ prayāṇonmukhāḥ ॥ 1 ॥

devi tvatpadapadmabhaktivibhavaprakṣīṇaduṣkarmaṇi

prādurbhūtanṛśaṃsabhāvamalināṃ vṛttiṃ vidhatte mayi ।

yo dehī bhuvane tadīyahṛdayānnirgatvarairlohitaiḥ

sadyaḥ pūrayase karābjacaṣakaṃ vāñchāphalairmāmapi ॥ 2 ॥

caṇḍottuṇḍavidīrṇadaṃṣṭrahṛdayaprodbhinnaraktacchaṭā

hālāpānamadāṭṭahāsaninadāṭopapratāpotkaṭam ।

mātarmatparipanthināmapahṛtaiḥ prāṇaistvadaṅghridvayaṃ

dhyānoddāmaravairbhavodayavaśātsantarpayāmi kṣaṇāt ॥ 3 ॥

śyāmāṃ tāmarasānanāṅghrinayanāṃ somārdhacūḍāṃ jaga-

-ttrāṇavyagrahalāyudhāgramusalāṃ santrāsamudrāvatīm ।

ye tvāṃ raktakapālinīṃ haravarārohe varāhānanāṃ

bhāvaiḥ sandadhate kathaṃ kṣaṇamapi prāṇanti teṣāṃ dviṣaḥ ॥ 4 ॥

viśvādhīśvaravallabhe vijayase yā tvaṃ niyantryātmikā

bhūtāntā puruṣāyuṣāvadhikarī pākapradākarmaṇām ।

tvāṃ yāce bhavatīṃ kimapyavitathaṃ yo madvirodhījana-

-stasyāyurmama vāñchitāvadhibhavenmātastavaivājñayā ॥ 5 ॥

mātaḥ samyagupāsituṃ jaḍamatistvāṃ naiva śaknomyahaṃ

yadyapyanvitadaiśikāṅghrikamalānukrośapātrasya me ।

jantuḥ kaścana cintayatyakuśalaṃ yastasya tadvaiśasaṃ

bhūyāddevi virodhino mama ca te śreyaḥ padāsaṅginaḥ ॥ 6 ॥

vārāhī vyathamānamānasagalatsaukhyaṃ tadāśābaliṃ

sīdantaṃ yamapākṛtādhyavasitaṃ prāptākhilotpāditam ।

krandadbandhujanaiḥ kalaṅkitatulaṃ kaṇṭhavraṇodyatkṛmi

paśyāmi pratipakṣamāśu patitaṃ bhrāntaṃ luṭhantaṃ muhuḥ ॥ 7 ॥

vārāhī tvamaśeṣajantuṣu punaḥ prāṇātmikā spandase

śaktivyāptacarācarā khalu yatastvāmetadabhyarthaye ।

tvatpādāmbujasaṅgino mama sakṛtpāpaṃ cikīrṣanti ye

teṣāṃ mā kuru śaṅkarapriyatame dehāntarāvasthitim ॥ 8 ॥

iti śrīvārāhīnigrahāṣṭakam ।

Recite with devotion and pure heart

Regular practice brings spiritual benefits