kuvalayanibhā kauśeyārdhorukā mukuṭojjvalā halamusalinī sadbhaktebhyo varābhayadāyinī । kapilanayanā madhye kṣāmā kaṭhoraghanastanī jayati jagatāṃ mātaḥ sā te varāhamukhī tanuḥ ॥ 1 ॥ tarati vipado ghorā dūrātparihriyate bhayaṃ skhalitamatibhirbhūtapretaiḥ svayaṃ vriyate śriyā । kṣapayati ripūnīṣṭe vācāṃ raṇe labhate jayaṃ vaśayati jagatsarvaṃ vārāhi yastvayi bhaktimān ॥ 2 ॥ stimitagatayaḥ sīdadvācaḥ paricyutahetayaḥ kṣubhitahṛdayāḥ sadyo naśyaddṛśo galitaujasaḥ । bhayaparavaśā bhagnotsāhāḥ parāhatapauruṣāḥ bhagavati purastvadbhaktānāṃ bhavanti virodhinaḥ ॥ 3 ॥ kisalayamṛdurhastaḥ kliśyeta kandukalīlayā bhagavati mahābhāraḥ krīḍāsaroruhameva te । tadapi musalaṃ dhatse haste halaṃ samayadruhāṃ harasi ca tadāghātaiḥ prāṇānaho tava sāhasam ॥ 4 ॥ janani niyatasthāne tvadvāmadakṣiṇapārśvayo- -rmṛdubhujalatāmandokṣepapravātitacāmare । satatamudite guhyācāradruhāṃ rudhirāsavai- -rupaśamayatāṃ śatrūn sarvānubhe mama daivate ॥ 5 ॥ haratu duritaṃ kṣetrādhīśaḥ svaśāsanavidviṣāṃ rudhiramadirāmattaḥ prāṇopahārabalipriyaḥ । aviratacaṭatkurvaddaṃṣṭrāsthikoṭiraṭanmukho bhagavati sa te caṇḍoccaṇḍaḥ sadā purataḥ sthitaḥ ॥ 6 ॥ kṣubhitamakarairvīcīhastoparuddhaparasparai- -ścaturudadhibhiḥ krāntā kalpāntadurlalitodakaiḥ । janani kathamuttiṣṭhet pātālasarpabilādilā tava tu kuṭile daṃṣṭrākoṭī na cedavalambanam ॥ 7 ॥ tamasi bahule śūnyāṭavyāṃ piśācaniśācara- -pramathakalahe coravyāghroragadvipasaṅkaṭe । kṣubhitamanasaḥ kṣudrasyaikākino'pi kuto bhayaṃ sakṛdapi mukhe mātastvannāma sannihitaṃ yadi ॥ 8 ॥ viditavibhavaṃ hṛdyaiḥ padyairvarāhamukhīstavaṃ sakalaphaladaṃ pūrṇaṃ mantrākṣarairimameva yaḥ । paṭhati sa paṭuḥ prāpnotyāyuściraṃ kavitāṃ priyāṃ sutasukhadhanārogyaṃ kīrtiṃ śriyaṃ jayamurvarām ॥ 9 ॥ iti śrī varāhamukhī stavaḥ ।