śvara uvāca । mātarjagadracananāṭakasūtradhāra- -stvadrūpamākalayituṃ paramārthato'yam । īśo'pyamīśvarapadaṃ samupaiti tādṛk ko'nyaḥ stavaṃ kimiva tāvakamādadhātu ॥ 1 ॥ nāmāni kintu gṛṇatastava lokatuṇḍe nāḍambaraṃ spṛśati daṇḍadharasya daṇḍaḥ । yalleśalambitabhavāmbunidhiryato'yat tvannāmasaṃsmṛtiriyaṃ na nunaḥ stutiste ॥ 2 ॥ tvaccintanādarasamullasadaprameyā- -''nandodayātsamuditaḥ sphuṭaromaharṣaḥ । mātarnamāmi sudināni sadetyamuṃ tvā- -mabhyarthaye'rthamiti pūrayatāddayālo ॥ 3 ॥ indrendumaulividhikeśavamauliratna- -rociścayojjvalitapādasarojayugme । ceto natau mama sadā pratibimbitā tvaṃ bhūyā bhavāni bhavanāśini bhāvaye tvām ॥ 4 ॥ līloddhṛtakṣititalasya varāhamūrte- -rvārāhamūrtirakhilārthakarī tvameva । prāleyaraśmisukalollasitāvataṃsā tvaṃ devi vāmatanubhāgaharā harasya ॥ 5 ॥ tvāmamba taptakanakojjvalakāntimanta- -rye cintayanti yuvatītanu māgalāntām । cakrāyudhāṃ trinayanāṃ varapotṛvaktrāṃ teṣāṃ padāmbujayugaṃ praṇamanti devāḥ ॥ 6 ॥ tvatsevanaskhalitapāpacayasya māta- -rmokṣo'pi yasya na sato gaṇanāmupaiti । devāsuroraganṛpūjitapādapīṭhaḥ kasyāḥ śriyaḥ sa khalu bhājanatāṃ na dhatte ॥ 7 ॥ kiṃ duṣkaraṃ tvayi manoviṣayaṃ gatāyāṃ kiṃ durlabhaṃ tvayi vidhānuvadarcitāyām । kiṃ durbharaṃ tvayi sakṛt smṛtimāgatāyāṃ kiṃ durjayaṃ tvayi kṛtastutivādapuṃsām ॥ 8 ॥ iti śrī vārāhyanugrahāṣṭakam ।