ഹ്രീമത്യാ ശിവയാ വിരാണ്മയമജം ഹൃത്പങ്കജസ്ഥം സദാ ഹ്രീണാനാ ശിവകീർതനേ ഹിതകരം ഹേലാഹൃദാ മാനിനാം । ഹോബേരാദിസുഗന്ധവസ്തുരുചിരം ഹേമാദ്രിബാണാസനം ഹ്രീങ്കാരാദികപാദപീഠമമലം ഹൃദ്യം നടേശം ഭജേ ॥ 1 ॥ ശ്രീമജ്ജ്ഞാനസഭാന്തരേ പ്രവിലസച്ഛ്രീപഞ്ചവർണാകൃതിം ശ്രീവാണീവിനുതാപദാനനിചയം ശ്രീവല്ലഭേനാർചിതം । ശ്രീവിദ്യാമനുമോദിനം ശ്രിതജനശ്രീദായകം ശ്രീധരം ശ്രീചക്രാന്തരവാസിനം ശിവമഹം ശ്രീമന്നടേശം ഭജേ ॥ 2 ॥ നവ്യാംഭോജമുഖം നമജ്ജനനിധിം നാരായണേനാർചിതം നാകൗകോനഗരീനടീലസിതകം നാഗാദിനാലങ്കൃതം । നാനാരൂപകനർതനാദിചതുരം നാലീകജാന്വേഷിതം നാദാത്മാനമഹം നഗേന്ദ്രതനയാനാഥം നടേശം ഭജേ ॥ 3 ॥ മധ്യസ്ഥം മധുവൈരിമാർഗിതപദം മദ്വംശനാഥം പ്രഭും മാരാതീതമതീവ മഞ്ജുവപുഷം മന്ദാരഗൗരപ്രഭം । മായാതീതമശേഷമംഗലനിധിം മദ്ഭാവനാഭാവിതം മധ്യേവ്യോമസഭാഗുഹാന്തമഖിലാകാശം നടേശം ഭജേ ॥ 4 ॥ ശിഷ്ടൈഃ പൂജിതപാദുകം ശിവകരം ശീതാംശുരേഖാധരം ശില്പം ഭക്തജനാവനേ ശിഥിലിതാഘൗഘം ശിവായാഃ പ്രിയം । ശിക്ഷാരക്ഷണമംബുജാസനശിരഃ സംഹാരശീലപ്രഭും ശീതാപാംഗവിലോചനം ശിവമഹം ശ്രീമന്നടേശം ഭജേ ॥ 5 ॥ വാണീവല്ലഭവന്ദ്യവൈഭവയുതം വന്ദാരുചിന്താമണിം വാതാശാധിപഭൂഷണം പരകൃപാവാരാന്നിധിം യോഗിനാം । വാഞ്ഛാപൂർതികരം വലാരിവിനുതം വാഹീകൃതാമ്നായകം വാമംഗാത്തവരാംഗനം മമ ഹൃദാവാസം നടേശം ഭജേ ॥ 6 ॥ യക്ഷാധീശസഖം യമപ്രമഥനം യാമിന്യധീശാസനം യജ്ഞധ്വംസകരം യതീന്ദ്രവിനുതം യജ്ഞക്രിയാദീശ്വരം । യാജ്യം യാജകരൂപിണം യമധനൈര്യത്നോപലഭ്യാംഘ്രികം വാജീഭൂതവൃഷം സദാ ഹൃദി മമായത്തം നടേശം ഭജേ ॥ 7 ॥ മായാശ്രീവിലസച്ചിദംബരമഹാപഞ്ചാക്ഷരൈരങ്കിതാൻ ശ്ലോകാൻ സപ്ത പഠന്തി യേഽനുദിവസം ചിന്താമണീനാമകാൻ । തേഷാം ഭാഗ്യമനേകമായുരധികാൻ വിദ്വദ്വരാൻ സത്സുതാൻ സർവാഭീഷ്ടമസൗ ദദാതി സഹസാ ശ്രീമത്സഭാധീശ്വരഃ ॥ 8 ॥ ഇതി ശ്രീ നടേശ സ്തവഃ ।