kuñjaracarmakṛtāmbaramamburuhāsanamādhavageyaguṇaṃ śaṅkaramantakamānaharaṃ smaradāhakalocanameṇadharam । sāñjaliyogipatañjalisannutamindukalādharamabjamukhaṃ mañjulaśiñjitarañjitakuñcitavāmapadaṃ bhaja nṛtyapatim ॥ 1 ॥ piṅgalatuṅgajaṭāvalibhāsuragaṅgamamaṅgalanāśakaraṃ puṅgavavāhamumāṅgadharaṃ ripubhaṅgakaraṃ suralokanatam । bhṛṅgavinīlagalaṃ gaṇanāthasutaṃ bhaja mānasa pāpaharaṃ maṅgaladaṃ vararaṅgapatiṃ bhavasaṅgaharaṃ dhanarājasakham ॥ 2 ॥ pāṇinisūtravinirmitikāraṇapāṇilasaḍḍamarūttharavaṃ mādhavanāditamardalanirgatanādalayoddhṛtavāmapadam । sarvajagatpralayaprabhuvahnivirājitapāṇimumālasitaṃ pannagabhūṣaṇamunnatasannutamānama mānasa sāmbaśivam ॥ 3 ॥ caṇḍaguṇānvitamaṇḍalakhaṇḍanapaṇḍitamindukalākalitaṃ daṇḍadharāntakadaṇḍakaraṃ varatāṇḍavamaṇḍitahemasabham । aṇḍakarāṇḍajavāhasakhaṃ nama pāṇḍavamadhyamamodakaraṃ kuṇḍalaśobhitagaṇḍatalaṃ munivṛndanutaṃ sakalāṇḍadharam ॥ 4 ॥ vyāghrapadānatamugratarāsuravigrahamardipadāmburuhaṃ śakramukhāmaravargamanoharanṛtyakaraṃ śrutinutyaguṇam । vyagrataraṅgitadevadhunīdhṛtagarvaharāyatakeśacayaṃ bhārgavarāvaṇapūjitamīśamumāramaṇaṃ bhaja śūladharam ॥ 5 ॥ āsuraśaktivināśakaraṃ bahubhāsurakāyamanaṅgaripuṃ bhūsurasevitapādasaroruhamīśvaramakṣaramukṣadhṛtam । bhāskaraśītakarākṣamanāturamāśvaravindapadaṃ bhaja taṃ naśvarasaṃsṛtimohavināśamahaskaradantanipātakaram ॥ 6 ॥ bhūtikaraṃ sitabhūtidharaṃ gatanītiharaṃ varagītinutaṃ bhaktiyutottamamuktikaraṃ samaśaktiyutaṃ śubhabhuktikaram । bhadrakarottamanāmayutaṃ śrutisāmanutaṃ nama somadharaṃ stutyaguṇaṃ bhaja nityamagādhabhavāmbudhitārakanṛtyapatim ॥ 7 ॥ śūladharaṃ bhavajālaharaṃ niṭilāgnidharaṃ jaṭilaṃ dhavalaṃ nīlagalojjvalamaṅgalasadgirirājasutāmṛdupāṇitalam । śailakulādhipamaulinataṃ chalahīnamupaimi kapāladharaṃ kālaviṣāśamanantamilānutamadbhutalāsyakaraṃ giriśam ॥ 8 ॥ cittaharātulanṛttapatipriyavṛttakṛtottamagītimimāṃ prātarumāpatisannidhigo yadi gāyati bhaktiyuto manasi । sarvasukhaṃ bhuvi tasya bhavatyamarādhipadurlabhamatyadhikaṃ nāsti punarjanireti ca dhāma sa śāmbhavamuttamamodakaram ॥ 9 ॥ iti śrī naṭarājāṣṭakam ।