yo devaḥ sarvabhūtānāmātmā hyārādhya eva ca । guṇātīto guṇātmā ca sa me nāgaḥ prasīdatu ॥ 1 ॥ hṛdayastho'pi dūrasthaḥ māyāvī sarvadehinām । yogināṃ cittagamyastu sa me nāgaḥ prasīdatu ॥ 2 ॥ sahasraśīrṣaḥ sarvātmā sarvādhāraḥ paraḥ śivaḥ । mahāviṣasyajanakaḥ sa me nāgaḥ prasīdatu ॥ 3 ॥ kādraveyomahāsattvaḥ kālakūṭamukhāmbujaḥ । sarvābhīṣṭaprado devaḥ sa me nāgaḥ prasīdatu ॥ 4 ॥ pātālanilayo devaḥ padmanābhasukhapradaḥ । sarvābhīṣṭaprado yastu sa me nāgaḥ prasīdatu ॥ 5 ॥ nāganārīrato dakṣo nāradādi supūjitaḥ । sarvāriṣṭaharo yastu sa me nāgaḥ prasīdatu ॥ 6 ॥ pṛdākudevaḥ sarvātmā sarvaśāstrārthapāragaḥ । prārabdhapāpahantā ca sa me nāgaḥ prasīdatu ॥ 7 ॥ lakṣmīpateḥ saparyaṅkaḥ śambhoḥ sarvāṅgabhūṣaṇaḥ । yo devaḥ putrado nityaṃ sa me nāgaḥ prasīdatu ॥ 8 ॥ phaṇīśaḥ paramodāraḥ śāpapāpanivārakaḥ । sarvapāpaharo yastu sa me nāgaḥ prasīdatu ॥ 9 ॥ sarvamaṅgalado nityaṃ sukhado bhujageśvaraḥ । yaśaḥ kīrtiṃ ca vipulāṃ śriyamāyuḥ prayacchatu ॥ 10 ॥ manovākkāyajanitaṃ janmajanmāntarārjitam । yatpāpaṃ nāgadeveśa vilayaṃ yātu samprati ॥ 11 ॥ nīrogaṃ dehapuṣṭiṃ ca sarvavaśyaṃ dhanāgamam । paśudhānyābhivṛddhiṃ ca yaśovṛddhiṃ ca śāśvatam ॥ 12 ॥ paravāk stambhinīṃ vidyāṃ vāgmitvaṃ sūkṣmabuddhitām । putraṃ vaṃśakaraṃ śreṣṭhaṃ dehi me bhaktavatsala ॥ 13 ॥ iti śrī nāgeśvara stutiḥ ॥