kṛpāsamudraṃ sumukhaṃ trinetraṃ jaṭādharaṃ pārvatīvāmabhāgam । sadāśivaṃ rudramanantarūpaṃ cidambareśaṃ hṛdi bhāvayāmi ॥ 1 ॥ vācāmatītaṃ phaṇibhūṣaṇāṅgaṃ gaṇeśatātaṃ dhanadasya mitram । kandarpanāśaṃ kamalotpalākṣaṃ cidambareśaṃ hṛdi bhāvayāmi ॥ 2 ॥ rameśavandyaṃ rajatādrināthaṃ śrīvāmadevaṃ bhavaduḥkhanāśam । rakṣākaraṃ rākṣasapīḍitānāṃ cidambareśaṃ hṛdi bhāvayāmi ॥ 3 ॥ devādidevaṃ jagadekanāthaṃ deveśavandyaṃ śaśikhaṇḍacūḍam । gaurīsametaṃ kṛtavighnadakṣaṃ cidambareśaṃ hṛdi bhāvayāmi ॥ 4 ॥ vedāntavedyaṃ suravairivighnaṃ śubhapradaṃ bhaktimadantarāṇām । kālāntakaṃ śrīkaruṇākaṭākṣaṃ cidambareśaṃ hṛdi bhāvayāmi ॥ 5 ॥ hemādricāpaṃ triguṇātmabhāvaṃ guhātmajaṃ vyāghrapurīśamādyam । śmaśānavāsaṃ vṛṣavāhanasthaṃ cidambareśaṃ hṛdi bhāvayāmi ॥ 6 ॥ ādyantaśūnyaṃ tripurārimīśaṃ nandīśamukhyastutavaibhavāḍhyam । samastadevaiḥ paripūjitāṅghriṃ cidambareśaṃ hṛdi bhāvayāmi ॥ 7 ॥ tameva bhāntaṃ hyanubhātisarva- -manekarūpaṃ paramārthamekam । pinākapāṇiṃ bhavanāśahetuṃ cidambareśaṃ hṛdi bhāvayāmi ॥ 8 ॥ viśveśvaraṃ nityamanantamādyaṃ trilocanaṃ candrakalāvataṃsam । patiṃ paśūnāṃ hṛdi sanniviṣṭaṃ cidambareśaṃ hṛdi bhāvayāmi ॥ 9 ॥ viśvādhikaṃ viṣṇumukhairupāsyaṃ trilocanaṃ pañcamukhaṃ prasannam । umāpatiṃ pāpaharaṃ praśāntaṃ cidambareśaṃ hṛdi bhāvayāmi ॥ 10 ॥ karpūragātraṃ kamanīyanetraṃ kaṃsārimitraṃ kamalenduvaktram । kandarpagātraṃ kamaleśamitraṃ cidambareśaṃ hṛdi bhāvayāmi ॥ 11 ॥ viśālanetraṃ paripūrṇagātraṃ gaurīkalatraṃ haridambareśam । kuberamitraṃ jagataḥ pavitraṃ cidambareśaṃ hṛdi bhāvayāmi ॥ 12 ॥ kalyāṇamūrtiṃ kanakādricāpaṃ kāntāsamākrāntanijārdhadeham । kapardinaṃ kāmaripuṃ purāriṃ cidambareśaṃ hṛdi bhāvayāmi ॥ 13 ॥ kalpāntakālāhitacaṇḍanṛttaṃ samastavedāntavaconigūḍham । ayugmanetraṃ girijāsahāyaṃ cidambareśaṃ hṛdi bhāvayāmi ॥ 14 ॥ digambaraṃ śaṅkhasitālpahāsaṃ kapālinaṃ śūlinamaprayem । nāgātmajāvaktrapayojasūryaṃ cidambareśaṃ hṛdi bhāvayāmi ॥ 15 ॥ sadāśivaṃ satpuruṣairanekaiḥ sadārcitaṃ sāmaśiraḥ sugītam । vaiyyāghracarmāmbaramugramīśaṃ cidambareśaṃ hṛdi bhāvayāmi ॥ 16 ॥ cidambarasya stavanaṃ paṭhedyaḥ pradoṣakāleṣu pumān sa dhanyaḥ । bhogānaśeṣānanubhūya bhūyaḥ sāyujyamapyeti cidambarasya ॥ 17 ॥ iti śrī cidambareśvara stotraṃ sampūrṇam ।