നടരാജ സ്തോത്രം

സദഞ്ചിത-മുദഞ്ചിത നികുഞ്ചിത പദം ഝലഝലം-ചലിത മഞ്ജു കടകം ।

പതഞ്ജലി ദൃഗഞ്ജന-മനഞ്ജന-മചഞ്ചലപദം ജനന ഭഞ്ജന കരം ।

കദംബരുചിമംബരവസം പരമമംബുദ കദംബ കവിഡംബക ഗലം

ചിദംബുധി മണിം ബുധ ഹൃദംബുജ രവിം പര ചിദംബര നടം ഹൃദി ഭജ ॥ 1 ॥

ഹരം ത്രിപുര ഭഞ്ജന-മനന്തകൃതകങ്കണ-മഖണ്ഡദയ-മന്തരഹിതം

വിരിഞ്ചിസുരസംഹതിപുരന്ധര വിചിന്തിതപദം തരുണചന്ദ്രമകുടം ।

പരം പദ വിഖണ്ഡിതയമം ഭസിത മണ്ഡിതതനും മദനവഞ്ചന പരം

ചിരന്തനമമും പ്രണവസഞ്ചിതനിധിം പര ചിദംബര നടം ഹൃദി ഭജ ॥ 2 ॥

അവന്തമഖിലം ജഗദഭംഗ ഗുണതുംഗമമതം ധൃതവിധും സുരസരിത്-

തരംഗ നികുരുംബ ധൃതി ലമ്പട ജടം ശമനദംഭസുഹരം ഭവഹരം ।

ശിവം ദശദിഗന്തര വിജൃംഭിതകരം കരലസന്മൃഗശിശും പശുപതിം

ഹരം ശശിധനഞ്ജയപതംഗനയനം പര ചിദംബര നടം ഹൃദി ഭജ ॥ 3 ॥

അനന്തനവരത്നവിലസത്കടകകിങ്കിണിഝലം ഝലഝലം ഝലരവം

മുകുന്ദവിധി ഹസ്തഗതമദ്ദല ലയധ്വനിധിമിദ്ധിമിത നർതന പദം ।

ശകുന്തരഥ ബർഹിരഥ നന്ദിമുഖ ഭൃംഗിരിടിസംഘനികടം ഭയഹരം

സനന്ദ സനക പ്രമുഖ വന്ദിത പദം പര ചിദംബര നടം ഹൃദി ഭജ ॥ 4 ॥

അനന്തമഹസം ത്രിദശവന്ദ്യ ചരണം മുനി ഹൃദന്തര വസന്തമമലം

കബന്ധ വിയദിന്ദ്വവനി ഗന്ധവഹ വഹ്നിമഖ ബന്ധുരവിമഞ്ജു വപുഷം ।

അനന്തവിഭവം ത്രിജഗദന്തര മണിം ത്രിനയനം ത്രിപുര ഖണ്ഡന പരം

സനന്ദ മുനി വന്ദിത പദം സകരുണം പര ചിദംബര നടം ഹൃദി ഭജ ॥ 5 ॥

അചിന്ത്യമലിവൃന്ദ രുചി ബന്ധുരഗലം കുരിത കുന്ദ നികുരുംബ ധവലം

മുകുന്ദ സുര വൃന്ദ ബല ഹന്തൃ കൃത വന്ദന ലസന്തമഹികുണ്ഡല ധരം ।

അകമ്പമനുകമ്പിത രതിം സുജന മംഗലനിധിം ഗജഹരം പശുപതിം

ധനഞ്ജയ നുതം പ്രണത രഞ്ജനപരം പര ചിദംബര നടം ഹൃദി ഭജ ॥ 6 ॥

പരം സുരവരം പുരഹരം പശുപതിം ജനിത ദന്തിമുഖ ഷണ്മുഖമമും

മൃഡം കനക പിംഗല ജടം സനക പങ്കജ രവിം സുമനസം ഹിമരുചിം ।

അസംഘമനസം ജലധി ജന്മഗരലം കവലയന്ത മതുലം ഗുണനിധിം

സനന്ദ വരദം ശമിതമിന്ദു വദനം പര ചിദംബര നടം ഹൃദി ഭജ ॥ 7 ॥

അജം ക്ഷിതിരഥം ഭുജഗപുംഗവഗുണം കനക ശൃംഗി ധനുഷം കരലസത്

കുരംഗ പൃഥു ടങ്ക പരശും രുചിര കുങ്കുമ രുചിം ഡമരുകം ച ദധതം ।

മുകുന്ദ വിശിഖം നമദവന്ധ്യ ഫലദം നിഗമ വൃന്ദ തുരഗം നിരുപമം

സ ചണ്ഡികമമും ഝടിതി സംഹൃതപുരം പര ചിദംബര നടം ഹൃദി ഭജ ॥ 8 ॥

അനംഗപരിപന്ഥിനമജം ക്ഷിതി ധുരന്ധരമലം കരുണയന്തമഖിലം

ജ്വലന്തമനലം ദധതമന്തകരിപും സതതമിന്ദ്ര സുരവന്ദിതപദം ।

ഉദഞ്ചദരവിന്ദകുല ബന്ധുശത ബിംബരുചി സംഹതി സുഗന്ധി വപുഷം

പതഞ്ജലി നുതം പ്രണവ പഞ്ജര ശുകം പര ചിദംബര നടം ഹൃദി ഭജ ॥ 9 ॥

ഇതി സ്തവമമും ഭുജഗപുംഗവ കൃതം പ്രതിദിനം പഠതി യഃ കൃതമുഖഃ

സദഃ പ്രഭുപദ ദ്വിതയദർശനപദം സുലലിതം ചരണ ശൃംഗ രഹിതം ।

സരഃ പ്രഭവ സംഭവ ഹരിത്പതി ഹരിപ്രമുഖ ദിവ്യനുത ശങ്കരപദം

സ ഗച്ഛതി പരം ന തു ജനുർജലനിധിം പരമദുഃഖജനകം ദുരിതദം ॥ 10 ॥

ഇതി ശ്രീ പതഞ്ജലിമുനി പ്രണീതം ചരണശൃംഗരഹിത നടരാജ സ്തോത്രം സമ്പൂർണം ॥

Recite with devotion and pure heart

Regular practice brings spiritual benefits