ನಟರಾಜಾಷ್ಟಕಂ

ಕುಂಜರಚರ್ಮಕೃತಾಂಬರಮಂಬುರುಹಾಸನಮಾಧವಗೇಯಗುಣಂ

ಶಂಕರಮಂತಕಮಾನಹರಂ ಸ್ಮರದಾಹಕಲೋಚನಮೇಣಧರಂ ।

ಸಾಂಜಲಿಯೋಗಿಪತಂಜಲಿಸನ್ನುತಮಿಂದುಕಲಾಧರಮಬ್ಜಮುಖಂ

ಮಂಜುಲಶಿಂಜಿತರಂಜಿತಕುಂಚಿತವಾಮಪದಂ ಭಜ ನೃತ್ಯಪತಿಂ ॥ 1 ॥

ಪಿಂಗಲತುಂಗಜಟಾವಲಿಭಾಸುರಗಂಗಮಮಂಗಲನಾಶಕರಂ

ಪುಂಗವವಾಹಮುಮಾಂಗಧರಂ ರಿಪುಭಂಗಕರಂ ಸುರಲೋಕನತಂ ।

ಭೃಂಗವಿನೀಲಗಲಂ ಗಣನಾಥಸುತಂ ಭಜ ಮಾನಸ ಪಾಪಹರಂ

ಮಂಗಲದಂ ವರರಂಗಪತಿಂ ಭವಸಂಗಹರಂ ಧನರಾಜಸಖಂ ॥ 2 ॥

ಪಾಣಿನಿಸೂತ್ರವಿನಿರ್ಮಿತಿಕಾರಣಪಾಣಿಲಸಡ್ಡಮರೂತ್ಥರವಂ

ಮಾಧವನಾದಿತಮರ್ದಲನಿರ್ಗತನಾದಲಯೋದ್ಧೃತವಾಮಪದಂ ।

ಸರ್ವಜಗತ್ಪ್ರಲಯಪ್ರಭುವಹ್ನಿವಿರಾಜಿತಪಾಣಿಮುಮಾಲಸಿತಂ

ಪನ್ನಗಭೂಷಣಮುನ್ನತಸನ್ನುತಮಾನಮ ಮಾನಸ ಸಾಂಬಶಿವಂ ॥ 3 ॥

ಚಂಡಗುಣಾನ್ವಿತಮಂಡಲಖಂಡನಪಂಡಿತಮಿಂದುಕಲಾಕಲಿತಂ

ದಂಡಧರಾಂತಕದಂಡಕರಂ ವರತಾಂಡವಮಂಡಿತಹೇಮಸಭಂ ।

ಅಂಡಕರಾಂಡಜವಾಹಸಖಂ ನಮ ಪಾಂಡವಮಧ್ಯಮಮೋದಕರಂ

ಕುಂಡಲಶೋಭಿತಗಂಡತಲಂ ಮುನಿವೃಂದನುತಂ ಸಕಲಾಂಡಧರಂ ॥ 4 ॥

ವ್ಯಾಘ್ರಪದಾನತಮುಗ್ರತರಾಸುರವಿಗ್ರಹಮರ್ದಿಪದಾಂಬುರುಹಂ

ಶಕ್ರಮುಖಾಮರವರ್ಗಮನೋಹರನೃತ್ಯಕರಂ ಶ್ರುತಿನುತ್ಯಗುಣಂ ।

ವ್ಯಗ್ರತರಂಗಿತದೇವಧುನೀಧೃತಗರ್ವಹರಾಯತಕೇಶಚಯಂ

ಭಾರ್ಗವರಾವಣಪೂಜಿತಮೀಶಮುಮಾರಮಣಂ ಭಜ ಶೂಲಧರಂ ॥ 5 ॥

ಆಸುರಶಕ್ತಿವಿನಾಶಕರಂ ಬಹುಭಾಸುರಕಾಯಮನಂಗರಿಪುಂ

ಭೂಸುರಸೇವಿತಪಾದಸರೋರುಹಮೀಶ್ವರಮಕ್ಷರಮುಕ್ಷಧೃತಂ ।

ಭಾಸ್ಕರಶೀತಕರಾಕ್ಷಮನಾತುರಮಾಶ್ವರವಿಂದಪದಂ ಭಜ ತಂ

ನಶ್ವರಸಂಸೃತಿಮೋಹವಿನಾಶಮಹಸ್ಕರದಂತನಿಪಾತಕರಂ ॥ 6 ॥

ಭೂತಿಕರಂ ಸಿತಭೂತಿಧರಂ ಗತನೀತಿಹರಂ ವರಗೀತಿನುತಂ

ಭಕ್ತಿಯುತೋತ್ತಮಮುಕ್ತಿಕರಂ ಸಮಶಕ್ತಿಯುತಂ ಶುಭಭುಕ್ತಿಕರಂ ।

ಭದ್ರಕರೋತ್ತಮನಾಮಯುತಂ ಶ್ರುತಿಸಾಮನುತಂ ನಮ ಸೋಮಧರಂ

ಸ್ತುತ್ಯಗುಣಂ ಭಜ ನಿತ್ಯಮಗಾಧಭವಾಂಬುಧಿತಾರಕನೃತ್ಯಪತಿಂ ॥ 7 ॥

ಶೂಲಧರಂ ಭವಜಾಲಹರಂ ನಿಟಿಲಾಗ್ನಿಧರಂ ಜಟಿಲಂ ಧವಲಂ

ನೀಲಗಲೋಜ್ಜ್ವಲಮಂಗಲಸದ್ಗಿರಿರಾಜಸುತಾಮೃದುಪಾಣಿತಲಂ ।

ಶೈಲಕುಲಾಧಿಪಮೌಲಿನತಂ ಛಲಹೀನಮುಪೈಮಿ ಕಪಾಲಧರಂ

ಕಾಲವಿಷಾಶಮನಂತಮಿಲಾನುತಮದ್ಭುತಲಾಸ್ಯಕರಂ ಗಿರಿಶಂ ॥ 8 ॥

ಚಿತ್ತಹರಾತುಲನೃತ್ತಪತಿಪ್ರಿಯವೃತ್ತಕೃತೋತ್ತಮಗೀತಿಮಿಮಾಂ

ಪ್ರಾತರುಮಾಪತಿಸನ್ನಿಧಿಗೋ ಯದಿ ಗಾಯತಿ ಭಕ್ತಿಯುತೋ ಮನಸಿ ।

ಸರ್ವಸುಖಂ ಭುವಿ ತಸ್ಯ ಭವತ್ಯಮರಾಧಿಪದುರ್ಲಭಮತ್ಯಧಿಕಂ

ನಾಸ್ತಿ ಪುನರ್ಜನಿರೇತಿ ಚ ಧಾಮ ಸ ಶಾಂಭವಮುತ್ತಮಮೋದಕರಂ ॥ 9 ॥

ಇತಿ ಶ್ರೀ ನಟರಾಜಾಷ್ಟಕಂ ।

Recite with devotion and pure heart

Regular practice brings spiritual benefits