ചിദംബര പഞ്ചചാമര സ്തോത്രം

കദംബകാനനപ്രിയം ചിദംബയാ വിഹാരിണം

മദേഭകുംഭഗുംഫിതസ്വഡിംഭലാലനോത്സുകം ।

സദംഭകാമഖണ്ഡനം സദംബുവാഹിനീധരം

ഹൃദംബുജേ ജഗദ്ഗുരും ചിദംബരം വിഭാവയേ ॥ 1 ॥

സമസ്തഭക്തപോഷണസ്വഹസ്തബദ്ധകങ്കണം

പ്രശസ്തകീർതിവൈഭവം നിരസ്തസജ്ജനാപദം ।

കരസ്ഥമുക്തിസാധനം ശിരഃസ്ഥചന്ദ്രമണ്ഡനം

ഹൃദംബുജേ ജഗദ്ഗുരും ചിദംബരം വിഭാവയേ ॥ 2 ॥

ജടാകിരീടമണ്ഡിതം നിടാലലോചനാന്വിതം

പടീകൃതാഷ്ടദിക്തടം പടീരപങ്കലേപനം ।

നടൗഘപൂർവഭാവിനം കുഠാരപാശധാരിണം

ഹൃദംബുജേ ജഗദ്ഗുരും ചിദംബരം വിഭാവയേ ॥ 3 ॥

കുരംഗശാബശോഭിതം ചിരം ഗജാനനാർചിതം

പുരാംഗനാവിചാരദം വരാംഗരാഗരഞ്ജിതം ।

ഖരാംഗജാതനാശകം തുരംഗമീകൃതാഗമം

ഹൃദംബുജേ ജഗദ്ഗുരും ചിദംബരം വിഭാവയേ ॥ 4 ॥

അമന്ദഭാഗ്യഭാജനം സുമന്ദഹാസസന്മുഖം

സുമന്ദമന്ദഗാമിനീഗിരീന്ദ്രകന്യകാധവം ।

ശമം ദമം ദയാലുതാമമന്ദയന്തമാത്മനോ

ഹൃദംബുജേ ജഗദ്ഗുരും ചിദംബരം വിഭാവയേ ॥ 5 ॥

കരീന്ദ്രചർമവാസസം ഗിരീന്ദ്രചാപധാരിണം

സുരേന്ദ്രമുഖ്യപൂജിതം ഖഗേന്ദ്രവാഹനപ്രിയം ।

അഹീന്ദ്രഭൂഷണോജ്ജ്വലം നഗേന്ദ്രജാവിലാസിനം

ഹൃദംബുജേ ജഗദ്ഗുരും ചിദംബരം വിഭാവയേ ॥ 6 ॥

മലാപഹാരിണീതടേ സദാ വിലാസകാരിണം

ബലാരിശാപഭഞ്ജനം ലലാമരൂപലോചനം ।

ലസത്ഫണീന്ദ്രഹാരിണം ജ്വലത്ത്രിശൂലധാരിണം

ഹൃദംബുജേ ജഗദ്ഗുരും ചിദംബരം വിഭാവയേ ॥ 7 ॥

ശശാങ്കഭാനുവീതിഹോത്രരാജിതത്രിലോചനം

വിശാലവക്ഷസം സുദീർഘബാഹുദണ്ഡമണ്ഡിതം ।

ദിഗംബരോല്ലസദ്വപുർധരം ധരാരഥാന്വിതം

ഹൃദംബുജേ ജഗദ്ഗുരും ചിദംബരം വിഭാവയേ ॥ 8 ॥

സദന്തരംഗസജ്ജനൗഘപാപസംഘനാശനേ

മദാന്ധയുക്തദുർജനാലിശിക്ഷണേ വിചക്ഷണഃ ।

ചിദംബരാഖ്യസദ്ഗുരുസ്വരൂപമേത്യ ഭൂതലേ

സദാശിവോ വിരാജതേ സദാ മുദാന്വിതോ ഹരഃ ॥ 9 ॥

ചിദംബരാഖ്യസദ്ഗുരോരിദം സദാ വിലാസിനം

മുദാ ലിഖന്തി യേ സകൃത് സദോപമാനമഷ്ടകം ।

സദാ വസേത്തദാലയേ ഹരിപ്രിയാ തദാനനേ

വിധിപ്രിയാ ച നിശ്ചലാ ജഗദ്ഗുരോരനുഗ്രഹാത് ॥ 10 ॥

ഇതി ശ്രീ ചിദംബര പഞ്ചചാമര സ്തോത്രം ।

Recite with devotion and pure heart

Regular practice brings spiritual benefits