nārada uvāca । indrādidevavṛndeśa īḍyeśvara jagatpate । mahāviṣṇornṛsiṃhasya kavacaṃ brūhi me prabho । yasya prapaṭhanādvidvāṃstrailokyavijayī bhavet ॥ 1 ॥ brahmovāca । śṛṇu nārada vakṣyāmi putraśreṣṭha tapodhana । kavacaṃ narasiṃhasya trailokyavijayī bhavet ॥ 2 ॥ sraṣṭā'haṃ jagatāṃ vatsa paṭhanāddhāraṇādyataḥ । lakṣmīrjagattrayaṃ pāti saṃhartā ca maheśvaraḥ ॥ 3 ॥ paṭhanāddhāraṇāddevā bahavaśca digīśvarāḥ । brahmamantramayaṃ vakṣye bhrāntyādivinivārakam ॥ 4 ॥ yasya prasādāddurvāsāstrailokyavijayī bhavet । paṭhanāddhāraṇādyasya śāstā ca krodhabhairavaḥ ॥ 5 ॥ trailokyavijayasyāsya kavacasya prajāpatiḥ । ṛṣiśchandastu gāyatrī nṛsiṃho devatā vibhuḥ ॥ 6 ॥ caturvarge ca śāntau ca viniyogaḥ prakīrtitaḥ । kṣrauṃ bījaṃ me śiraḥ pātu candravarṇo mahāmanuḥ ॥ 7 ॥ oṃ ugraṃ vīraṃ mahāviṣṇuṃ jvalantaṃ sarvatomukham । nṛsiṃhaṃ bhīṣaṇaṃ bhadraṃ mṛtyumṛtyuṃ namāmyaham ॥ 8 ॥ dvātriṃśadakṣaro mantro mantrarājaḥ suradrumaḥ । kaṇṭhaṃ pātu dhruvaṃ kṣrauṃ hṛdbhagavate cakṣuṣī mama ॥ 9 ॥ narasiṃhāya ca jvālāmāline pātu karṇakam । dīptadaṃṣṭrāya ca tathā agninetrāya nāsikām ॥ 10 ॥ sarvarakṣoghnāya tathā sarvabhūtahitāya ca । sarvajvaravināśāya daha daha padadvayam ॥ 11 ॥ rakṣa rakṣa varmamantraḥ svāhā pātu mukhaṃ mama । tārādirāmacandrāya namaḥ pātu hṛdaṃ mama ॥ 12 ॥ klīṃ pāyāt pārśvayugmaṃ ca tāro namaḥ padaṃ tataḥ । nārāyaṇāya nābhiṃ ca āṃ hrīṃ kroṃ kṣrauṃ ca huṃ phaṭ ॥ 13 ॥ ṣaḍakṣaraḥ kaṭiṃ pātu oṃ namo bhagavate padam । vāsudevāya ca pṛṣṭhaṃ klīṃ kṛṣṇāya urudvayam ॥ 14 ॥ klīṃ kṛṣṇāya sadā pātu jānunī ca manūttamaḥ । klīṃ glauṃ klīṃ śyāmalāṅgāya namaḥ pāyāt padadvayam ॥ 15 ॥ kṣrauṃ nṛsiṃhāya kṣrauṃ hrīṃ ca sarvāṅgaṃ me sadā'vatu । iti te kathitaṃ vatsa sarvamantraughavigraham ॥ 16 ॥ tava snehānmayā khyātaṃ pravaktavyaṃ na kasyacit । gurupūjāṃ vidhāyātha gṛhṇīyāt kavacaṃ tataḥ ॥ 17 ॥ sarvapuṇyayuto bhūtvā sarvasiddhiyuto bhavet । śatamaṣṭottaraṃ cāsya puraścaryāvidhiḥ smṛtaḥ ॥ 18 ॥ havanādīn daśāṃśena kṛtvā satsādhakottamaḥ । tatastu siddhakavaco rūpeṇa madanopamaḥ ॥ 19 ॥ spardhāmuddhūya bhavane lakṣmīrvāṇī vasenmukhe । puṣpāñjalyaṣṭakaṃ dattvā mūlenaiva paṭhet sakṛt ॥ 20 ॥ api varṣasahasrāṇāṃ pūjānāṃ phalamāpnuyāt । bhūrje vilikhya guṭikāṃ svarṇasthāṃ dhārayedyadi ॥ 21 ॥ kaṇṭhe vā dakṣiṇe bāhau narasiṃho bhavet svayam । yoṣidvāmabhuje caiva puruṣo dakṣiṇe kare ॥ 22 ॥ bibhṛyāt kavacaṃ puṇyaṃ sarvasiddhiyuto bhavet । kākavandhyā ca yā nārī mṛtavatsā ca yā bhavet ॥ 23 ॥ janmavandhyā naṣṭaputrā bahuputravatī bhavet । kavacasya prasādena jīvanmukto bhavennaraḥ ॥ 24 ॥ trailokyaṃ kṣobhayatyevaṃ trailokyavijayī bhavet । bhūtapretapiśācāśca rākṣasā dānavāśca ye ॥ 25 ॥ taṃ dṛṣṭvā prapalāyante deśāddeśāntaraṃ dhruvam । yasmin gṛhe ca kavacaṃ grāme vā yadi tiṣṭhati । taddeśaṃ tu parityajya prayānti hyātidūrataḥ ॥ 26 ॥ iti śrībrahmasaṃhitāyāṃ saptadaśo'dhyāye trailokyavijayaṃ nāma śrī nṛsiṃha kavacam ।