നൃസിംഹ സപ്തകം

അദ്വൈതവാസ്തവമതേഃ പ്രണമജ്ജനാനാം

സമ്പാദനായ ധൃതമാനവസിംഹരൂപം ।

പ്രഹ്ലാദപോഷണരതം പ്രണതൈകവശ്യം

ദേവം മുദാ കമപി നൗമി കൃപാസമുദ്രം ॥ 1 ॥

നതജനവചനഋതത്വ-

പ്രകാശകാലസ്യ ദൈർഘ്യമസഹിഷ്ണുഃ ।

ആവിർബഭൂവ തരസാ

യഃ സ്തംഭാന്നൗമി തം മഹാവിഷ്ണും ॥ 2 ॥

വക്ഷോവിദാരണം യ-

-ശ്ചക്രേ ഹാർദം തമോ ഹന്തും ।

ശത്രോരപി കരുണാബ്ധിം

നരഹരിവപുഷം നമാമി തം വിഷ്ണും ॥ 3 ॥

രിപുഹൃദയസ്ഥിതരാജസ-

-ഗുണമേവാസൃങ്മിഷേണ കരജാഗ്രൈഃ ।

ധത്തേ യസ്തം വന്ദേ

പ്രഹ്ലാദപൂർവഭാഗ്യനിചയമഹം ॥ 4 ॥

പ്രഹ്ലാദം പ്രണമജ്ജന-

-പങ്ക്തേഃ കുർവന്തി ദിവിഷദോ ഹ്യന്യേ ।

പ്രഹ്ലാദപ്രഹ്ലാദം

ചിത്രം കുരുതേ നമാമി യസ്തമഹം ॥ 5 ॥

ശരദിന്ദുകുന്ദധവലം

കരജപ്രവിദാരിതാസുരാധീശം ।

ചരണാംബുജരതവാക്യം

തരസൈവ ഋതം പ്രകുർവദഹമീഡേ ॥ 6 ॥

മുഖേന രൗദ്രോ വപുഷാ ച സൗമ്യഃ

സൻകഞ്ചനാർഥം പ്രകടീകരോഷി ।

ഭയസ്യ കർതാ ഭയഹൃത്ത്വമേവേ-

-ത്യാഖ്യാപ്രസിദ്ധിര്യദസംശയാഭൂത് ॥ 7 ॥

ഇതി ശ്രീ നൃസിംഹ സപ്തകം ।

Recite with devotion and pure heart

Regular practice brings spiritual benefits