हैंహైHaindavamஹிહિં
📍
Font Size:
ನೃಸಿಂಹ ಭುಜಂಗ ಪ್ರಯಾತ ಸ್ತವಃ
ಋತಂ ಕರ್ತುಮೇವಾಶು ನಮ್ರಸ್ಯ ವಾಕ್ಯಂ
ಸಭಾಸ್ತಂಭಮಧ್ಯಾದ್ಯ ಆವಿರ್ಬಭೂವ ।
ತಮಾನಮ್ರಲೋಕೇಷ್ಟದಾನಪ್ರಚಂಡಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 1 ॥
ಇನಾಂತರ್ದೃಗಂತಶ್ಚ ಗಾಂಗೇಯದೇಹಂ
ಸದೋಪಾಸತೇ ಯಂ ನರಾಃ ಶುದ್ಧಚಿತ್ತಾಃ ।
ತಮಸ್ತಾಘಮೇನೋನಿವೃತ್ತ್ಯೈ ನಿತಾಂತಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 2 ॥
ಶಿವಂ ಶೈವವರ್ಯಾ ಹರಿಂ ವೈಷ್ಣವಾಗ್ರ್ಯಾಃ
ಪರಾಶಕ್ತಿಮಾಹುಸ್ತಥಾ ಶಕ್ತಿಭಕ್ತಾಃ ।
ಯಮೇವಾಭಿಧಾಭಿಃ ಪರಂ ತಂ ವಿಭಿನ್ನಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 3 ॥
ಕೃಪಾಸಾಗರಂ ಕ್ಲಿಷ್ಟರಕ್ಷಾಧುರೀಣಂ
ಕೃಪಾಣಂ ಮಹಾಪಾಪವೃಕ್ಷೌಘಭೇದೇ ।
ನತಾಲೀಷ್ಟವಾರಾಶಿರಾಕಾಶಶಾಂಕಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 4 ॥
ಜಗನ್ನೇತಿ ನೇತೀತಿ ವಾಕ್ಯೈರ್ನಿಷಿದ್ಧ್ಯಾ-
-ವಶಿಷ್ಟಂ ಪರಬ್ರಹ್ಮರೂಪಂ ಮಹಾಂತಃ ।
ಸ್ವರೂಪೇಣ ವಿಜ್ಞಾಯ ಮುಕ್ತಾ ಹಿ ಯಂ ತಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 5 ॥
ನತಾನ್ಭೋಗಸಕ್ತಾನಪೀಹಾಶು ಭಕ್ತಿಂ
ವಿರಕ್ತಿಂ ಚ ದತ್ವಾ ದೃಢಾಂ ಮುಕ್ತಿಕಾಮಾನ್ ।
ವಿಧಾತುಂ ಕರೇ ಕಂಕಣಂ ಧಾರಯಂತಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 6 ॥
ನರೋ ಯನ್ಮನೋರ್ಜಾಪತೋ ಭಕ್ತಿಭಾವಾ-
-ಚ್ಛರೀರೇಣ ತೇನೈವ ಪಶ್ಯತ್ಯಮೋಘಾಂ ।
ತನುಂ ನಾರಸಿಂಹಸ್ಯ ವಕ್ತೀತಿ ವೇದೋ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 7 ॥
ಯದಂಘ್ರ್ಯಬ್ಜಸೇವಾಪರಾಣಾಂ ನರಾಣಾಂ
ವಿರಕ್ತಿರ್ದೃಢಾ ಜಾಯತೇಽರ್ಥೇಷು ಶೀಘ್ರಂ ।
ತಮಂಗಪ್ರಭಾಧೂತಪೂರ್ಣೇಂದುಕೋಟಿಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 8 ॥
ರಥಾಂಗಂ ಪಿನಾಕಂ ವರಂ ಚಾಭಯಂ ಯೋ
ವಿಧತ್ತೇ ಕರಾಬ್ಜೈಃ ಕೃಪಾವಾರಿರಾಶಿಃ ।
ತಮಿಂದ್ವಚ್ಛದೇಹಂ ಪ್ರಸನ್ನಾಸ್ಯಪದ್ಮಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 9 ॥
ಪಿನಾಕಂ ರಥಾಂಗಂ ವರಂ ಚಾಭಯಂ ಚ
ಪ್ರಫುಲ್ಲಾಂಬುಜಾಕಾರಹಸ್ತೈರ್ದಧಾನಂ ।
ಫಣೀಂದ್ರಾತಪತ್ರಂ ಶುಚೀನೇಂದುನೇತ್ರಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 10 ॥
ವಿವೇಕಂ ವಿರಕ್ತಿಂ ಶಮಾದೇಶ್ಚ ಷಟ್ಕಂ
ಮುಮುಕ್ಷಾಂ ಚ ಸಂಪ್ರಾಪ್ಯ ವೇದಾಂತಜಾಲೈಃ ।
ಯತಂತೇ ವಿಬೋಧಾಯ ಯಸ್ಯಾನಿಶಂ ತಂ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 11 ॥
ಸದಾ ನಂದಿನೀತೀರವಾಸೈಕಲೋಲಂ
ಮುದಾ ಭಕ್ತಲೋಕಂ ದೃಶಾ ಪಾಲಯಂತಂ ।
ವಿದಾಮಗ್ರಗಣ್ಯಾ ನತಾಃ ಸ್ಯುರ್ಯದಂಘ್ರೌ
ನಮಸ್ಕುರ್ಮಹೇ ಶೈಲವಾಸಂ ನೃಸಿಂಹಂ ॥ 12 ॥
ಯದೀಯಸ್ವರೂಪಂ ಶಿಖಾ ವೇದರಾಶೇ-
-ರಜಸ್ರಂ ಮುದಾ ಸಮ್ಯಗುದ್ಘೋಷಯಂತಿ ।
ನಲಿನ್ಯಾಸ್ತಟೇ ಸ್ವೈರಸಂಚಾರಶೀಲಂ
ಚಿದಾನಂದರೂಪಂ ತಮೀಡೇ ನೃಸಿಂಹಂ ॥ 13 ॥
ಯಮಾಹುರ್ಹಿ ದೇಹಂ ಹೃಷೀಕಾಣಿ ಕೇಚಿ-
-ತ್ಪರೇಽಸೂಂಸ್ತಥಾ ಬುದ್ಧಿಶೂನ್ಯೇ ತಥಾನ್ಯೇ ।
ಯದಜ್ಞಾನಮುಗ್ಧಾ ಜನಾ ನಾಸ್ತಿಕಾಗ್ರ್ಯಾಃ
ಸದಾನಂದರೂಪಂ ತಮೀಡೇ ನೃಸಿಂಹಂ ॥ 14 ॥
ಸದಾನಂದಚಿದ್ರೂಪಮಾಮ್ನಾಯಶೀರ್ಷೈ-
-ರ್ವಿಚಾರ್ಯಾರ್ಯವಕ್ತ್ರಾದ್ಯತೀಂದ್ರಾ ಯದೀಯಂ ।
ಸುಖೇನಾಸತೇ ಚಿತ್ತಕಂಜೇ ದಧಾನಾಃ
ಸದಾನಂದಚಿದ್ರೂಪಮೀಡೇ ನೃಸಿಂಹಂ ॥ 15 ॥
ಪುರಾ ಸ್ತಂಭಮಧ್ಯಾದ್ಯ ಆವಿರ್ಬಭೂವ
ಸ್ವಭಕ್ತಸ್ಯ ಕರ್ತುಂ ವಚಸ್ತಥ್ಯಮಾಶು ।
ತಮಾನಂದಕಾರುಣ್ಯಪೂರ್ಣಾಂತರಂಗಂ
ಬುಧಾ ಭಾವಯುಕ್ತಾ ಭಜಧ್ವಂ ನೃಸಿಂಹಂ ॥ 16 ॥
ಪುರಾ ಶಂಕರಾರ್ಯಾ ಧರಾಧೀಶಭೃತ್ಯೈ-
-ರ್ವಿನಿಕ್ಷಿಪ್ತವಹ್ನಿಪ್ರತಪ್ತಸ್ವದೇಹಾಃ ।
ಸ್ತುವಂತಿ ಸ್ಮ ಯಂ ದಾಹಶಾಂತ್ಯೈ ಜವಾತ್ತಂ
ಬುಧಾ ಭಾವಯುಕ್ತಾ ಭಜಧ್ವಂ ನೃಸಿಂಹಂ ॥ 17 ॥
ಸದೇಮಾನಿ ಭಕ್ತ್ಯಾಖ್ಯಸೂತ್ರೇಣ ದೃಬ್ಧಾ-
-ನ್ಯಮೋಘಾನಿ ರತ್ನಾನಿ ಕಂಠೇ ಜನಾ ಯೇ ।
ಧರಿಷ್ಯಂತಿ ತಾನ್ಮುಕ್ತಿಕಾಂತಾ ವೃಣೀತೇ
ಸಖೀಭಿರ್ವೃತಾ ಶಾಂತಿದಾಂತ್ಯದಿಮಾಭಿಃ ॥
Recite with devotion and pure heart
Regular practice brings spiritual benefits