ലക്ഷ്മീ നൃസിംഹ പഞ്ചരത്നം

ത്വത്പ്രഭുജീവപ്രിയമിച്ഛസി ചേന്നരഹരിപൂജാം കുരു സതതം

പ്രതിബിംബാലങ്കൃതിധൃതികുശലോ ബിംബാലങ്കൃതിമാതനുതേ ।

ചേതോഭൃംഗ ഭ്രമസി വൃഥാ ഭവമരുഭൂമൗ വിരസായാം

ഭജ ഭജ ലക്ഷ്മീനരസിംഹാനഘപദസരസിജമകരന്ദം ॥ 1 ॥

ശുക്തൗ രജതപ്രതിഭാ ജാതാ കടകാദ്യർഥസമർഥാ ചേ-

-ദ്ദുഃഖമയീ തേ സംസൃതിരേഷാ നിർവൃതിദാനേ നിപുണാ സ്യാത് ।

ചേതോഭൃംഗ ഭ്രമസി വൃഥാ ഭവമരുഭൂമൗ വിരസായാം

ഭജ ഭജ ലക്ഷ്മീനരസിംഹാനഘപദസരസിജമകരന്ദം ॥ 2 ॥

ആകൃതിസാമ്യാച്ഛാല്മലികുസുമേ സ്ഥലനലിനത്വഭ്രമമകരോഃ

ഗന്ധരസാവിഹ കിമു വിദ്യേതേ വിഫലം ഭ്രാമ്യസി ഭൃശവിരസേഽസ്മിൻ ।

ചേതോഭൃംഗ ഭ്രമസി വൃഥാ ഭവമരുഭൂമൗ വിരസായാം

ഭജ ഭജ ലക്ഷ്മീനരസിംഹാനഘപദസരസിജമകരന്ദം ॥ 3 ॥

സ്രക്ചന്ദനവനിതാദീന്വിഷയാൻസുഖദാന്മത്വാ തത്ര വിഹരസേ

ഗന്ധഫലീസദൃശാ നനു തേഽമീ ഭോഗാനന്തരദുഃഖകൃതഃ സ്യുഃ ।

ചേതോഭൃംഗ ഭ്രമസി വൃഥാ ഭവമരുഭൂമൗ വിരസായാം

ഭജ ഭജ ലക്ഷ്മീനരസിംഹാനഘപദസരസിജമകരന്ദം ॥ 4 ॥

തവ ഹിതമേകം വചനം വക്ഷ്യേ ശൃണു സുഖകാമോ യദി സതതം

സ്വപ്നേ ദൃഷ്ടം സകലം ഹി മൃഷാ ജാഗ്രതി ച സ്മര തദ്വദിതി ।

ചേതോഭൃംഗ ഭ്രമസി വൃഥാ ഭവമരുഭൂമൗ വിരസായാം

ഭജ ഭജ ലക്ഷ്മീനരസിംഹാനഘപദസരസിജമകരന്ദം ॥ 5 ॥

ഇതി ശ്രീമത്പരമഹംസപരിവ്രാജകാചാര്യസ്യ ശ്രീഗോവിന്ദഭഗവത്പൂജ്യപാദശിഷ്യസ്യ ശ്രീമച്ഛങ്കരഭഗവതഃ കൃതൗ ശ്രീലക്ഷ്മീനരസിംഹ പഞ്ചരത്നം ।

Recite with devotion and pure heart

Regular practice brings spiritual benefits