yaṃ dhyāyase sa kva tavāsti deva ityukta ūce pitaraṃ saśastram । prahlāda āstekhilago hariḥ sa lakṣmīnṛsiṃho'vatu māṃ samantāt ॥ 1 ॥ tadā padātāḍayadādidaityaḥ stambhaṃ tato'hnāya ghurūruśabdam । cakāra yo lokabhayaṅkaraṃ sa lakṣmīnṛsiṃho'vatu māṃ samantāt ॥ 2 ॥ stambhaṃ vinirbhidya vinirgato yo bhayaṅkarākāra udastameghaḥ । jaṭānipātaiḥ sa ca tuṅgakarṇo lakṣmīnṛsiṃho'vatu māṃ samantāt ॥ 3 ॥ pañcānanāsyo manujākṛtiryo bhayaṅkarastīkṣṇanakhāyudho'rim । dhṛtvā nijorvorvidadāra so'sau lakṣmīnṛsiṃho'vatu māṃ samantāt ॥ 4 ॥ varapradokteravirodhato'riṃ jaghāna bhṛtyoktamṛtaṃ hi kurvan । sragvattadantraṃ nidadhau svakaṇṭhe lakṣmīnṛsiṃho'vatu māṃ samantāt ॥ 5 ॥ vicitradeho'pi vicitrakarmā vicitraśaktiḥ sa ca kesarīha । pāpaṃ ca tāpaṃ vinivārya duḥkhaṃ lakṣmīnṛsiṃho'vatu māṃ samantāt ॥ 6 ॥ prahlādaḥ kṛtakṛtyo'bhūdyatkṛpāleśato'marāḥ । niṣkaṇṭakaṃ svadhāmāpuḥ śrīnṛsiṃhaḥ sa pātu mām ॥ 7 ॥ daṃṣṭrākarālavadano ripūṇāṃ bhayakṛdbhayam । iṣṭado harati svasya vāsudevaḥ sa pātu mām ॥ 8 ॥ iti śrīmatparamahaṃsa parivrājakācārya śrīvāsudevānandasarasvatī viracitaṃ śrī lakṣmīnṛsiṃhāṣṭakam ।