ஶ்ருதீநாமுத்தரம்ʼ பா⁴க³ம்ʼ வேக³வத்யாஶ்ச த³க்ஷிணம் । காமாத³தி⁴வஸன் ஜீயாத் கஶ்சித³த்³பு⁴த கேஸரீ ॥ 1 ॥ தபனேந்த்³வக்³னிநயன꞉ தாபானபசினோது ந꞉ । தாபனீயரஹஸ்யானாம்ʼ ஸார꞉ காமாஸிகா ஹரி꞉ ॥ 2 ॥ ஆகண்ட²மாதி³புருஷம்ʼ கண்டீ²ரவமுபரி குண்டி²தாராதிம் । வேகோ³பகண்ட²ஸங்கா³த் விமுக்தவைகுண்ட²ப³ஹுமதிமுபாஸே ॥ 3 ॥ ப³ந்து⁴மகி²லஸ்ய ஜந்தோ꞉ ப³ந்து⁴ரபர்யங்கப³ந்த⁴ரமணீயம் । விஷமவிலோசனமீடே³ வேக³வதீபுலினகேலினரஸிம்ʼஹம் ॥ 4 ॥ ஸ்வஸ்தா²னேஷு மருத்³க³ணான் நியமயன் ஸ்வாதீ⁴னஸர்வேந்த்³ரிய꞉ பர்யங்கஸ்தி²ரதா⁴ரணா ப்ரகடிதப்ரத்யங்முகா²வஸ்தி²தி꞉ । ப்ராயேண ப்ரணிபேது³ஷ꞉ ப்ரபு⁴ரஸௌ யோக³ம்ʼ நிஜம்ʼ ஶிக்ஷயன் காமானாதனுதாத³ஶேஷஜக³தாம்ʼ காமாஸிகா கேஸரீ ॥ 5 ॥ விகஸ்வரநக²ஸ்வருக்ஷதஹிரண்யவக்ஷ꞉ஸ்த²லீ- -நிரர்க³லவிநிர்க³லத்³ருதி⁴ரஸிந்து⁴ஸந்த்⁴யாயிதா꞉ । அவந்து மத³நாஸிகாமனுஜபஞ்சவக்த்ரஸ்ய மாம்ʼ அஹம்ப்ரத²மிகாமித²꞉ ப்ரகடிதாஹவா பா³ஹவ꞉ ॥ 6 ॥ ஸடாபடலபீ⁴ஷணே ஸரப⁴ஸாட்டஹாஸோத்³ப⁴டே ஸ்பு²ரத் க்ருதி⁴பரிஸ்பு²ட ப்⁴ருகுடிகே(அ)பி வக்த்ரே க்ருʼதே । க்ருʼபாகபடகேஸரின் த³னுஜடி³ம்ப⁴த³த்தஸ்தனா ஸரோஜஸத்³ருʼஶா த்³ருʼஶா வ்யதிவிஷஜ்ய தே வ்யஜ்யதே ॥ 7 ॥ த்வயி ரக்ஷதி ரக்ஷகை꞉ கிமன்யை- -ஸ்த்வயி சாரக்ஷதி ரக்ஷகை꞉ கிமன்யை꞉ । இதி நிஶ்சிததீ⁴꞉ ஶ்ரயாமி நித்யம்ʼ ந்ருʼஹரே வேக³வதீதடாஶ்ரயம்ʼ த்வாம் ॥ 8 ॥ இத்த²ம்ʼ ஸ்துத꞉ ஸக்ருʼதி³ஹாஷ்டபி⁴ரேஷ பத்³யை꞉ ஶ்ரீவேங்கடேஶரசிதைஸ்த்ரித³ஶேந்த்³ரவந்த்³ய꞉ । து³ர்தா³ந்தகோ⁴ரது³ரிதத்³விரதே³ந்த்³ரபே⁴தீ³ காமாஸிகானரஹரிர்விதனோது காமான் ॥ 9 ॥ இதி ஶ்ரீவேதா³ந்ததே³ஶிகக்ருʼதம்ʼ காமாஸிகாஷ்டகம் ।