ధ్యానం – గలద్రక్తముండావలీకంఠమాలా మహాఘోరరావా సుదంష్ట్రా కరాలా । వివస్త్రా శ్మశానాలయా ముక్తకేశీ మహాకాలకామాకులా కాలికేయం ॥ 1 ॥ భుజేవామయుగ్మే శిరోఽసిం దధానా వరం దక్షయుగ్మేఽభయం వై తథైవ । సుమధ్యాఽపి తుంగస్తనా భారనమ్రా లసద్రక్తసృక్కద్వయా సుస్మితాస్యా ॥ 2 ॥ శవద్వంద్వకర్ణావతంసా సుకేశీ లసత్ప్రేతపాణిం ప్రయుక్తైకకాంచీ । శవాకారమంచాధిరూఢా శివాభి- -శ్చతుర్దిక్షుశబ్దాయమానాఽభిరేజే ॥ 3 ॥ స్తుతిః – విరంచ్యాదిదేవాస్త్రయస్తే గుణాస్త్రీన్ సమారాధ్య కాలీం ప్రధానా బభూవుః । అనాదిం సురాదిం మఖాదిం భవాదిం స్వరూపం త్వదీయం న విందంతి దేవాః ॥ 1 ॥ జగన్మోహినీయం తు వాగ్వాదినీయం సుహృత్పోషిణీ శత్రుసంహారణీయం । వచస్తంభనీయం కిముచ్చాటనీయం స్వరూపం త్వదీయం న విందంతి దేవాః ॥ 2 ॥ ఇయం స్వర్గదాత్రీ పునః కల్పవల్లీ మనోజాస్తు కామాన్ యథార్థం ప్రకుర్యాత్ । తథా తే కృతార్థా భవంతీతి నిత్యం స్వరూపం త్వదీయం న విందంతి దేవాః ॥ 3 ॥ సురాపానమత్తా సుభక్తానురక్తా లసత్పూతచిత్తే సదావిర్భవత్తే । జపధ్యానపూజాసుధాధౌతపంకా స్వరూపం త్వదీయం న విందంతి దేవాః ॥ 4 ॥ చిదానందకందం హసన్మందమందం శరచ్చంద్రకోటిప్రభాపుంజబింబం । మునీనాం కవీనాం హృది ద్యోతయంతం స్వరూపం త్వదీయం న విందంతి దేవాః ॥ 5 ॥ మహామేఘకాలీ సురక్తాపి శుభ్రా కదాచిద్విచిత్రాకృతిర్యోగమాయా । న బాలా న వృద్ధా న కామాతురాపి స్వరూపం త్వదీయం న విందంతి దేవాః ॥ 6 ॥ క్షమస్వాపరాధం మహాగుప్తభావం మయా లోకమధ్యే ప్రకాశీకృతం యత్ । తవ ధ్యానపూతేన చాపల్యభావాత్ స్వరూపం త్వదీయం న విందంతి దేవాః ॥ 7 ॥ యది ధ్యానయుక్తం పఠేద్యో మనుష్య- -స్తదా సర్వలోకే విశాలో భవేచ్చ । గృహే చాష్టసిద్ధిర్మృతే చాపి ముక్తిః స్వరూపం త్వదీయం న విందంతి దేవాః ॥ 8 ॥ ఇతి శ్రీ మచ్ఛంకరాచార్య విరచితం శ్రీ కాలికాష్టకం ॥