mahākāla uvāca । atha vakṣye maheśāni mahāpātakanāśanam । gadyaṃ sahasranāmnastu sañjīvanatayā sthitam ॥ 1 ॥ paṭhan yatsaphalaṃ kuryāt prāktanaṃ sakalaṃ priye । apaṭhan viphalaṃ tattattadvastu kathayāmi te ॥ 2 ॥ oṃ phreṃ jaya jaya kāmakalākāli kapālini siddhikarāli siddhivikarāli mahāvalini triśulini naramuṇḍamālini śavavāhini kātyāyani mahāṭṭahāsini sṛṣṭisthitipralayakāriṇi ditidanujamāriṇi śmaśānacāriṇi । mahāghorarāve adhyāsitadāve aparimitabalaprabhāve । bhairavīyoginīḍākinīsahavāsini jagaddhāsini svapadaprakāśini । pāpaughahāriṇi āpaduddhāriṇi apamṛtyuvāriṇi । bṛhanmadyamānodari sakalasiddhikari caturdaśabhuvaneśvari । guṇātītaparamasadāśivamohini apavargarasadohini raktārṇavalohini । aṣṭanāgarājabhūṣitabhujadaṇḍe ākṛṣṭakodaṇḍe paramapracaṇḍe । manovāgagocare makhakoṭimantramayakalevare mahābhīṣaṇatare pracalajaṭābhārabhāsvare sajalajaladamedure janmamṛtyupāśabhidure sakaladaivatamayasiṃhāsanādhirūḍhe guhyātiguhya parāparaśaktitattvarūḍhe vāṅmayīkṛtamūḍhe । prakṛtyaparaśivanirvāṇasākṣiṇi trilokīrakṣaṇi daityadānavabhakṣiṇi । vikaṭadīrghadaṃṣṭra sañcūrṇitakoṭibrahmakapāle candrakhaṇḍāṅkitabhāle dehaprabhājitameghajāle । navapañcacakranayini mahābhīmaṣoḍaśaśayini sakalakulākulacakrapravartini nikhilaripudalakartini mahāmārībhayanivartini lelihānarasanākarālini trilokīpālini trayastriṃśatkoṭiśastrāstraśālini । prajvalaprajvalanalocane bhavabhayamocane nikhilāgamādeśitaṣṭhusurocane । prapañcātītaniṣkalaturīyākāre akhaṇḍānandādhāre nigamāgamasāre । mahākhecarīsiddhividhāyini nijapadapradāyini mahāmāyini ghorāṭṭahāsasantrāsitatribhuvane caraṇakamaladvayavinyāsakharvīkṛtāvane vihitabhaktāvane । oṃ klīṃ kroṃ sphroṃ hūṃ hrīṃ chrīṃ strīṃ phreṃ bhagavati prasīda prasīda jaya jaya jīva jīva jvala jvala prajvala prajvala hasa hasa nṛtya nṛtya ka cha bhagamālini bhagapriye bhagāture bhagāṅkite bhagarūpiṇi bhagaprade bhagaliṅgadrāviṇi । saṃhārabhairavasuratarasalolupe vyomakeśi piṅgakeśi mahāśaṅkhasamākule kharparavihastahaste raktārṇavadvīpapriye madanonmādini । śuṣkanarakapālamālābharaṇe vidyutkoṭisamaprabhe naramāṃsakhaṇḍakavalini । vamadagnimukhi pherukoṭiparivṛte karatālikātrāsitatriviṣṭape । nṛtya prasāritapādāghātaparivartitabhūvalaye । padabhārāvanamrīkṛtakamaṭhaśeṣābhoge । kurukulle kuñcatuṇḍi raktamukhi yamaghaṇṭe carcike । daityāsura daityarākṣasa dānava kuṣmāṇḍa preta bhūta ḍākinī vināyaka skanda ghoṇaka kṣetrapāla piśāca brahmarākṣasa vetāla guhyaka sarpanāga grahanakṣatrotpāta caurāgni svāpadayuddhavajropalāśani varṣavidyunmeghaviṣopaviṣa kapaṭakṛtyābhicāra dveṣavaśīkaraṇoccāṭanonmādāpasmāra bhūtapretapiśācāveśa nadanadī samudrāvartakāntāra ghorāndhakāra mahāmārī bālagraha hiṃsra sarvasvāpahāri māyāvidyuddasyuvañcaka divācara rātriñcara sandhyācara śṛṅginakhi daṃṣṭri vidyudulkāraṇyadaraprāntarādi nānāvidhamahopadravabhañjani । sarvamantratantrayantra kuprayogapramardini । ṣaḍāmnāya samaya vidyāprakāśini śmaśānādhyāsini । nijabala prabhāva parākrama guṇavaśīkṛta koṭibrahmāṇḍavarti bhūtasaṅghe । virāḍrūpiṇi sarvadevamaheśvari sarvajanamanorañjani sarvapāpapraṇāśini adhyātmikādhidaivikādhibhautikādi vividhahṛdayādhinirdalini kaivalyanirvāṇavalini dakṣiṇakāli bhadrakāli caṇḍakāli kāmakalākāli kaulācāravratini kaulācārakūjini kuladharmasādhani jagatkāraṇakāriṇi mahāraudri raudrāvatāre abīje nānābīje jagadbīje kāleśvari kālātīte trikālasthāyini mahābhairave bhairavagṛhiṇi janani janajanananivartini pralayānalajvālājālajihve vikharvoru pherupotalālini mṛtyuñjayahṛdayānandakari vilolavyālakuṇḍala ulūkapakṣacchatramahāḍāmari niyutavaktrabāhucaraṇe sarvabhūtadamani nīlāñjanasamaprabhe yogīndra hṛdayāmbujāsanasthita nīlakaṇṭha dehārdhahāriṇi ṣoḍaśa kalāntavāsini hakārārdhacāriṇi kālasaṅkarṣiṇi kapālahaste madaghūrṇitalocane nirvāṇadīkṣāprasādaprade nindānandādhikāriṇi mātṛgaṇamadhyacāriṇi trayastriṃśatkoṭitridaśa tejomayavigrahe pralayāgnirocini viśvakartri viśvārādhye viśvajanani viśvasaṃhāriṇi viśvavyāpike viśveśvari nirupame nirvikāre nirañjane nirīhe nistaraṅge nirākāre parameśvari paramānande parāpare prakṛtipuruṣātmike pratyayagocare pramāṇabhūte praṇavasvarūpe saṃsārasāre saccidānande sanātani sakale sakalakalātīte sāmarasyasamayini kevale kaivalyarūpe kalpanātige kālalopini kāmarahite kāmakalākāli bhagavati ॥ oṃ khphreṃ hsauḥ sauḥ śrīṃ aiṃ hrauṃ kroṃ sphroṃ sarvasiddhiṃ dehi dehi manorathān pūraya pūraya muktiṃ niyojaya niyojaya bhavapāśaṃ samunmūlaya samunmūlaya janmamṛtyū tāraya tāraya paravidyāṃ prakāśaya prakāśaya apavargaṃ nirmāhi nirmāhi saṃsāraduḥkhaṃ yātanāṃ vicchedaya vicchedaya pāpāni saṃśamaya saṃśamaya caturvargaṃ sādhaya sādhaya hrāṃ hrīṃ hrūṃ hraiṃ hrauṃ yān vayaṃ dviṣmo ye cāsmān vidviṣanti tān sarvān vināśaya vināśaya māraya māraya śoṣaya śoṣaya kṣobhaya kṣobhaya mayi kṛpāṃ niveśaya niveśaya phreṃ khphreṃ hasphreṃ hskhphreṃ hūṃ sphroṃ klīṃ hrīṃ jaya jaya carācarātmaka brahmāṇḍodaravarti bhūtasaṅghārādhite prasīda prasīda tubhyaṃ devi namaste namaste namaste ॥ itīdaṃ gadyamuditaṃ mantrarūpaṃ varānane । sahasranāmastotrasya ādāvante ca yojayet ॥ 3 ॥ aśaknuvānau dvau vārau paṭheccheṣa imaṃ stavam । sahasranāmastotrasya tadaiva prāpyate phalam ॥ 4 ॥ apaṭhan gadyametattu tatphalaṃ na samāpnuyāt । yatphalaṃ stotrarājasya pāṭhenāpnoti sādhakaḥ । tatphalaṃ gadyapāṭhena labhate nātra saṃśayaḥ ॥ 5 ॥ iti mahākālasaṃhitāyāṃ dvādaśatamaḥ paṭale śrī kāmakalā kālī sañjīvana gadya stotram ॥