ghore saṃsāravahnau pralayamupagate yā hi kṛtvā śmaśāne nṛtyatyanyūnaśaktirjagadidamakhilaṃ muṇḍamālābhirāmā । bhidyadbrahmāṇḍabhāṇḍaṃ paṭutaraninadairaṭṭahāsairudāraiḥ sāsmākaṃ vairivargaṃ śamayatu tarasā bhadradā bhadrakālī ॥ 1 ॥ magne loke'mburāśau nalinabhavanutā viṣṇunā kārayitvā cakrotkṛttorukaṇṭhaṃ madhumapi bhayadaṃ kaiṭabhaṃ cātibhīmam । padmotpatteḥ prabhūtaṃ bhayamuta riputoyāharatsānukampā sāsmākaṃ vairivargaṃ śamayatu tarasā bhadradā bhadrakālī ॥ 2 ॥ viśvatrāṇaṃ vidhātuṃ mahiṣamatha rāṇe yā'suraṃ bhīmarūpaṃ śūlenāhatya vakṣasyamarapatinutā pātayantī ca bhūmau । tasyāsṛgvāhinībhirjalanidhimakhilaṃ śoṇitābhaṃ ca cakre sāsmākaṃ vairivargaṃ śamayatu tarasā bhadradā bhadrakālī ॥ 3 ॥ yā devī caṇḍamuṇḍau tribhuvananalinīvāraṇau devaśatrū dṛṣṭvā yuddhotsave tau drutataramabhiyātāsinā kṛttakaṇṭhau । kṛtvā tadraktapānodbhavamadamuditā sāṭṭahāsātibhīmā sāsmākaṃ vairivargaṃ śamayatu tarasā bhadradā bhadrakālī ॥ 4 ॥ sadyastaṃ raktabījaṃ samarabhuvi natā ghorarūpānasaṅkhyān rāktodbhūtairasaṅkhyairgajaturagarathaiḥ sārthamanyāṃśca daityān । vaktre nikṣipya dṛṣṭvā gurutaradaśanairāpapau śoṇitaughaṃ sāsmākaṃ vairivargaṃ śamayatu tarasā bhadradā bhadrakālī ॥ 5 ॥ sthānādbhraṣṭaiśca devaistuhinagiritaṭe saṅgataiḥ saṃstutā yā saṅkhyāhīnaiḥ sametaṃ tridaśaripugaṇaiḥ syandanebhāśvayuktaiḥ । yuddhe śumbhaṃ niśumbhaṃ tribhuvanavipadaṃ nāśayantī ca jaghne sāsmākaṃ vairivargaṃ śamayatu tarasā bhadradā bhadrakālī ॥ 6 ॥ śambhornetrānale yā jananamapi jagattrāṇahetorayāsīt bhūyastīkṣṇātidhārāvidalitadanujā dārukaṃ cāpi hatvā । tasyāsṛkpānatuṣṭā muhurapi kṛtavatyaṭṭahāsaṃ kaṭhoraṃ sāsmākaṃ vairivargaṃ śamayatu tarasā bhadradā bhadrakālī ॥ 7 ॥ yā devī kālarātrī tuhinagirasutā lokamātā dharitrī vāṇī nidrā ca māyā manasijadayitā ghorarūpātisaumyā । cāmuṇḍā khaḍgahastā ripuhananaparā śoṇitāsvādakāmā sā hanyādviśvavandyā mama ripunivahā bhadradā bhadrakālī ॥ 8 ॥ bhadrakālyaṣṭakaṃ japyaṃ śatrusaṅkṣayakāṅkṣiṇā । svargāpavargadaṃ puṇyaṃ duṣṭagrahanivāraṇam ॥ 9 ॥ iti śrī bhadrakālyaṣṭakam ।