asya śrī kālikārgala stotrasya bhairava ṛṣiranuṣṭup chandaḥ śrīkālikā devatā mama sarvasiddhisādhane viniyogaḥ । oṃ namaste kālike devi ādyabījatraya priye । vaśamānaya me nityaṃ sarveṣāṃ prāṇināṃ sadā ॥ 1 ॥ kūrcayugmaṃ lalāṭe ca sthātu me śavavāhinā । sarvasaubhāgyasiddhiṃ ca dehi dakṣiṇa kālike ॥ 2 ॥ bhuvaneśvari bījayugmaṃ bhrūyuge muṇḍamālinī । kandarparūpaṃ me dehi mahākālasya gehini ॥ 3 ॥ dakṣiṇe kālike nitye pitṛkānanavāsini । netrayugmaṃ ca me dehi jyotirālepanaṃ mahat ॥ 4 ॥ śravaṇe ca punarlajjābījayugmaṃ manoharam । mahāśrutidharatvaṃ ca me dehi mukta kuntale ॥ 5 ॥ hrīṃ hrīṃ bījadvayaṃ devi pātu nāsāpuṭe mama । dehi nānāvidhi mahyaṃ sugandhiṃ tvaṃ digambare ॥ 6 ॥ punastribījaprathamaṃ dantoṣṭharasanādikam । gadyapadyamayīṃ vājīṃ kāvyaśāstrādyalaṅkṛtām ॥ 7 ॥ aṣṭādaśapurāṇānāṃ smṛtīnāṃ ghoracaṇḍike । kavitā siddhilaharīṃ mama jihvāṃ niveśaya ॥ 8 ॥ vahnijāyā mahādevi ghaṇṭikāyāṃ sthirā bhava । dehi me parameśāni buddhisiddhirasāyakam ॥ 9 ॥ turyākṣarī citsvarūpā kālikā mantrasiddhidā । sā ca tiṣṭhatu hṛtpadme hṛdayānandarūpiṇī ॥ 10 ॥ ṣaḍakṣarī mahākālī caṇḍakālī śucismitā । raktāsinī ghoradaṃṣṭrā bhujayugme sadā'vatu ॥ 11 ॥ saptākṣarī mahākālī mahākālaratodyatā । stanayugme sūryakarṇo naramuṇḍasukuntalā ॥ 12 ॥ tiṣṭha svajaṭhare devi aṣṭākṣarī śubhapradā । putrapautrakalatrādi suhṛnmitrāṇi dehi me ॥ 13 ॥ daśākṣarī mahākālī mahākālapriyā sadā । nābhau tiṣṭhatu kalyāṇī śmaśānālayavāsinī ॥ 14 ॥ caturdaśārṇavā yā ca jayakālī sulocanā । liṅgamadhye ca tiṣṭhasva retasvinī mamāṅgake ॥ 15 ॥ guhyamadhye guhyakālī mama tiṣṭha kulāṅgane । sarvāṅge bhadrakālī ca tiṣṭha me paramātmike ॥ 16 ॥ kāli pādayuge tiṣṭha mama sarvamukhe śive । kapālinī ca yā śaktiḥ khaḍgamuṇḍadharā śivā ॥ 17 ॥ pādadvayāṅguliṣvaṅge tiṣṭha svapāpanāśini । kullādevī muktakeśī romakūpeṣu vai mama ॥ 18 ॥ tiṣṭhatu uttamāṅge ca kurukullā maheśvarī । virodhinī virodhe ca mama tiṣṭhatu śaṅkarī ॥ 19 ॥ vipracitte maheśāni muṇḍadhāriṇi tiṣṭha mām । mārge durmārgagamane ugrā tiṣṭhatu sarvadā ॥ 20 ॥ prabhādikṣu vidikṣu mām dīptāṃ dīptaṃ karotu mām । nīlāśaktiśca pātāle ghanā cākāśamaṇḍale ॥ 21 ॥ pātu śaktirbalākā me bhuvaṃ me bhuvaneśvarī । mātrā mama kule pātu mudrā tiṣṭhatu mandire ॥ 22 ॥ mitā me yoginī yā ca tathā mitrakulapradā । sā me tiṣṭhatu deveśi pṛthivyāṃ daityadāriṇī ॥ 23 ॥ brāhmī brahmakule tiṣṭha mama sarvārthadāyinī । nārāyaṇī viṣṇumāyā mokṣadvāre ca tiṣṭha me ॥ 24 ॥ māheśvarī vṛṣārūḍhā kāśikāpuravāsinī । śivatāṃ dehi cāmuṇḍe putrapautrādi cānaghe ॥ 25 ॥ kaumārī ca kumārāṇāṃ rakṣārthaṃ tiṣṭha me sadā । aparājitā viśvarūpā jaye tiṣṭha svabhāvinī ॥ 26 ॥ vārāhī vedarūpā ca sāmavedaparāyaṇā । nārasiṃhī nṛsiṃhasya vakṣaḥsthalanivāsinī ॥ 27 ॥ sā me tiṣṭhatu deveśi pṛthivyāṃ daityadāriṇī । sarveṣāṃ sthāvarādīnāṃ jaṅgamānāṃ sureśvarī ॥ 28 ॥ svedajodbhijāṇḍajānāṃ carāṇāṃ ca bhayādikam । vināśyāpyabhimatiṃ ca dehi dakṣiṇa kālike ॥ 29 ॥ ya idaṃ cārgalaṃ devi yaḥ paṭhetkālikārcane । sarvasiddhimavāpnoti khecaro jāyate tu saḥ ॥ 30 ॥ iti śrī kālī argala stotram ।