हैंహైHaindavamஹிહિં
📍
Font Size:
ശ്രീ ഗായത്രീ പഞ്ജര സ്തോത്രം
ഭഗവന്തം ദേവദേവം ബ്രഹ്മാണം പരമേഷ്ഠിനം ।
വിധാതാരം വിശ്വസൃജം പദ്മയോനിം പ്രജാപതിം ॥ 1 ॥
ശുദ്ധസ്ഫടികസങ്കാശം മഹേന്ദ്രശിഖരോപമം ।
ബദ്ധപിംഗജടാജൂടം തഡിത്കനകകുണ്ഡലം ॥ 2 ॥
ശരച്ചന്ദ്രാഭവദനം സ്ഫുരദിന്ദീവരേക്ഷണം ।
ഹിരണ്മയം വിശ്വരൂപമുപവീതാജിനാവൃതം ॥ 3 ॥
മൗക്തികാഭാക്ഷവലയസ്തന്ത്രീലയസമന്വിതഃ ।
കർപൂരോദ്ധൂലിതതനും സ്രഷ്ടാരം നേത്രഗോചരം ॥ 4 ॥
വിനയേനോപസംഗമ്യ ശിരസാ പ്രണിപത്യ ച ।
നാരദഃ പരിപപ്രച്ഛ ദേവർഷിഗണമധ്യഗഃ ॥ 5 ॥
നാരദ ഉവാച ।
ഭഗവൻ ദേവദേവേശ സർവജ്ഞ കരുണാനിധേ ।
ശ്രോതുമിച്ഛാമി തത്തത്വം ഭോഗമോക്ഷൈകസാധനം ॥ 6 ॥
ഐശ്വര്യസ്യ സമഗ്രസ്യ ഫലദം ദ്വന്ദ്വവർജിതം ।
ബ്രഹ്മഹത്യാദിപാപഘ്നം പാപാദ്യരിഭയാപഹം ॥ 7 ॥
യദേകം നിഷ്കലം സൂക്ഷ്മം നിരഞ്ജനമനാമയം ।
യത്തേ പ്രിയതമം ലോകേ തന്മേ ബ്രൂഹി പിതർമമ ॥ 8 ॥
ബ്രഹ്മോവാച ।
ശൃണു നാരദ വക്ഷ്യാമി ബ്രഹ്മമൂലം സനാതനം ।
സൃഷ്ട്യാദൗ മന്മുഖേ ക്ഷിപ്തം ദേവദേവേന വിഷ്ണുനാ ॥ 9 ॥
പ്രപഞ്ചബീജമിത്യാഹുരുത്പത്തിസ്ഥിതിഹേതുകം ।
പുരാ മയാ തു കഥിതം കശ്യപായ സുധീമതേ ॥ 10 ॥
സാവിത്രീപഞ്ജരം നാമ രഹസ്യം നിഗമത്രയേ ।
ഋഷ്യാദികം ച ദിഗ്വർണം സാംഗാവരണകം ക്രമാത് ॥ 11 ॥
വാഹനായുധമന്ത്രാസ്ത്രമൂർതിധ്യാനസമന്വിതം ।
സ്തോത്രം ശൃണു പ്രവക്ഷ്യാമി തവ സ്നേഹാച്ച നാരദ ॥ 12 ॥
ബ്രഹ്മനിഷ്ഠായ ദേയം സ്യാദദേയം യസ്യ കസ്യചിത് ।
ആചമ്യ നിയതഃ പശ്ചാദാത്മധ്യാനപുരഃസരം ॥ 13 ॥
ഓമിത്യാദൗ വിചിന്ത്യാഥ വ്യോമഹേമാബ്ജസംസ്ഥിതം ।
ധർമകന്ദഗതജ്ഞാനാദൈശ്വര്യാഷ്ടദലാന്വിതം ॥ 14 ॥
വൈരാഗ്യകർണികാധീനാം പ്രണവഗ്രഹമധ്യഗാം ।
ബ്രഹ്മവേദിസമായുക്താം ചൈതന്യപുരമധ്യഗാം ॥ 15 ॥
തത്ത്വഹംസസമാകീർണാം ശബ്ദപീഠേ സുസംസ്ഥിതാം ।
നാദബിന്ദുകലാതീതാം ഗോപുരൈരപി സംവൃതാം ॥ 16 ॥
വിദ്യാഽവിദ്യാഽമൃതത്വാദി പ്രകാരൈരപിസംവൃതാം ।
നിഗമാർഗലസഞ്ഛന്നാം നിർഗുണദ്വാരവാടികാം ॥ 17 ॥
ചതുർവർഗഫലോപേതാം മഹാകല്പവനൈർവൃതാം ।
സാന്ദ്രാനന്ദസുധാസിന്ധുനിഗമദ്വാരവാടികാം ॥ 18 ॥
ധ്യാനധാരണയോഗാദി തൃണഗുല്മലതാവൃതാം ।
സദസച്ചിത്സ്വരൂപാഖ്യ മൃഗപക്ഷിസമാകുലാം ॥ 19 ॥
വിദ്യാഽവിദ്യാവിചാരാഖ്യലോകാലോകാചലാവൃതാം ।
പഞ്ചീകരണപഞ്ചോത്ഥഭൂതതത്ത്വനിവേദിതാം ॥ 20 ॥
അവികാരസമാശ്ലിഷ്ടനിജധ്യാനഗുണാവൃതാം ।
വേദോപനിഷദർഥാഖ്യ ദേവർഷിഗണസേവിതാം ॥ 21 ॥
ഇതിഹാസഗ്രഹഗണൈഃ സദാരൈരഭിവന്ദിതാം ।
ഗാഥാപ്സരോഭിര്യക്ഷൈശ്ച ഗണകിന്നരസേവിതാം ॥ 22 ॥
നാരസിംഹമുഖൈശ്ചാപി പുരുഷൈഃ കല്പചാരണൈഃ ।
കൃതഗാനവിനോദാദികഥാലാപനതത്പരാം ॥ 23 ॥
തദിത്യവാങ്മനോഗമ്യതേജോരൂപധരാം പരാം ।
ജഗതഃ പ്രസവിത്രീം താം സവിതുഃ സൃഷ്ടികാരിണീം ॥ 24 ॥
വരേണ്യമിത്യന്നമയീം പുരുഷാർഥഫലപ്രദാം ।
അവിദ്യാവർണവർജ്യാം ച തേജോവദ്ഭർഗസഞ്ജ്ഞികാം ॥ 25 ॥
ദേവസ്യ സച്ചിദാനന്ദ പരബ്രഹ്മരസാത്മികാം ।
ധീമഹ്യഹം സ വൈ തദ്വദ്ബ്രഹ്മാദ്വൈതസ്വരൂപിണീം ॥ 26 ॥
ധിയോ യോ നസ്തു സവിതാ പ്രചോദയാദുപാസിതാം ।
പരോഽസൗ സവിതാ സാക്ഷാദ്ദേവോനിർഹരണായ ച ॥ 27 ॥
പരോരജസ ഇത്യാദി പരബ്രഹ്മാത്മസാവദോം ।
ആപോ ജ്യോതിരിതി ദ്വാഭ്യാം പാഞ്ചഭൗതികസഞ്ജ്ഞികാം ॥ 28 ॥
രസോഽമൃതം ബ്രഹ്മപദൈസ്താം നിത്യാം താപിനീം പരാം ।
ഭൂർഭുവഃസുവരിത്യേതൈർനിഗമത്വപ്രകാശികാം ॥ 29 ॥
മഹർജനസ്തപഃസത്യലോകോപരിസുസംസ്ഥിതാം ।
താദൃഗസ്യാ വിരാഡ്രൂപം രഹസ്യം പ്രവദാമ്യഹം ॥ 30 ॥
വ്യോമകേശാകുലാകാശ ദ്യോകിരീടവിരാജിതാം ।
തടിദ്ഭ്രുകുടിനാക്രാന്തവിധിവിഷ്ണുശിവാർചിതാം ॥ 31 ॥
ഗുരുഭാർഗവകർണാന്താം സോമസൂര്യാഗ്നിലോചനാം ।
ഇഡാപിംഗലസൗഷുമ്ണ വാമനാസാപുടാന്വിതാം ॥ 32 ॥
സന്ധ്യാദ്വിരോഷ്ഠപുടിതാം ലസദ്വാഗ്ഭവജിഹ്വികാം ।
സന്ധ്യാസൗ ദ്യുമണേഃ കണ്ഠലസദ്ബാഹുസമന്വിതാം ॥ 33 ॥
പർജന്യഹൃദയാസക്തവസുസുസ്തനമണ്ഡലാം ।
ആകാശോദരവിത്രസ്തനാഭ്യവാന്തരദേശികാം ॥ 34 ॥
പ്രാജാപത്യാഖ്യജഘനാമിന്ദ്രാണീകടിസഞ്ജ്ഞികാം ।
ഊരൂ മലയമേരുഭ്യാം ശോഭമാനാം സുരദ്വിഷം ॥ 35 ॥
ജാനുനീ ജഹ്നുകുശികൗ വൈശ്വദേവലസദ്ഭുജാം ।
അയനദ്വയജംഘാദ്യസുരാദ്യപിതൃസഞ്ജ്ഞികാം ॥ 36 ॥
പദാംഘ്രിനഖരോമാലിഭൂതലദ്രുമലാഞ്ഛിതാം ।
ഗ്രഹരാശ്യർക്ഷദേവർഷിമൂർതിം ച പരസഞ്ജ്ഞികാം ॥ 37 ॥
തിഥിമാസർതുവർഷാഖ്യസുകേതുനിമിഷാത്മികാം ।
അഹോരാത്രാർധമാസാഖ്യാമാര്യാം ചന്ദ്രമസാത്മികാം ॥ 38 ॥
മായാകല്പിതവൈചിത്ര്യസന്ധ്യാച്ഛാദനസംവൃതാം ।
ജ്വലത്കാലാനലപ്രഖ്യാം തഡിത്കോടിസമപ്രഭാം ॥ 39 ॥
കോടിസൂര്യപ്രതീകാശാം ചന്ദ്രകോടിസുശീതലാം ।
സുധാമണ്ഡലമധ്യസ്ഥാം സാന്ദ്രാനന്ദാമൃതാത്മികാം ॥ 40 ॥
വാഗതീതാം മനോരമ്യാം വരദാം വേദമാതരം ।
ചരാചരമയീം നിത്യാം ബ്രഹ്മാക്ഷരസമന്വിതാം ॥ 41 ॥
ധ്യാത്വാ സ്വാത്മന്യഭേദേന ബ്രഹ്മപഞ്ജരമാരഭേത് ।
പഞ്ജരസ്യ ഋഷിശ്ചാഹം ഛന്ദോ വികൃതിരുച്യതേ ॥ 42 ॥
ദേവതാ ച പരോ ഹംസഃ പരബ്രഹ്മാധിദേവതാ ।
പ്രണവോ ബീജശക്തിഃ സ്യാദോം കീലകമുദാഹൃതം ॥ 43 ॥
തത്തത്ത്വം ധീമഹി ക്ഷേത്രം ധിയോഽസ്ത്രം യഃ പരം പദം ।
മന്ത്രമാപോ ജ്യോതിരിതി യോനിർഹംസഃ സവേധകം ॥ 44 ॥
വിനിയോഗസ്തു സിദ്ധ്യർഥം പുരുഷാർഥചതുഷ്ടയേ ।
തതസ്തൈരംഗഷട്കം സ്യാത്തൈരേവ വ്യാപകത്രയം ॥ 45 ॥
പൂർവോക്തദേവതാം ധ്യായേത്സാകാരഗുണസമ്യുതാം ।
പഞ്ചവക്ത്രാം ദശഭുജാം ത്രിപഞ്ചനയനൈര്യുതാം ॥ 46 ॥
മുക്താവിദ്രുമസൗവർണാമോഷധീശസമാനനാം ।
വാണീം പരാം രമാം മായാം ചാമരൈർദർപണൈര്യുതാം ॥ 47 ॥
ഷഡംഗദേവതാമന്ത്രൈ രൂപാദ്യവയവാത്മികാം ।
മൃഗേന്ദ്രവൃഷപക്ഷീന്ദ്രമൃഗഹംസാസനസ്ഥിതാം ॥ 48 ॥
അർധേന്ദുബദ്ധമുകുടകിരീടമണികുണ്ഡലാം ।
രത്നതാടങ്കമാംഗല്യപരഗ്രൈവേയനൂപുരാം ॥ 49 ॥
അംഗുലീയകകേയൂരകങ്കണാദ്യൈരലങ്കൃതാം ।
ദിവ്യസ്രഗ്വസ്ത്രസഞ്ഛന്നരവിമണ്ഡലമധ്യഗാം ॥ 50 ॥
വരാഽഭയാബ്ജയുഗലാം ശംഖചക്രഗദാങ്കുശാം ।
ശുഭ്രം കപാലം ദധതീം വഹന്തീമക്ഷമാലികാം ॥ 51 ॥
ഗായത്രീം വരദാം ദേവീം സാവിത്രീം വേദമാതരം ।
ആദിത്യപഥഗാം ദേവീം സ്മരേദ്ബ്രഹ്മസ്വരൂപിണീം ॥ 52 ॥
വിചിത്രമന്ത്രജനനീം സ്മരേദ്വിദ്യാം സരസ്വതീം ।
ത്രിപദാ ഋങ്മയീ പൂർവാ മുഖീ ബ്രഹ്മാസ്ത്രസഞ്ജ്ഞികാ ॥ 53 ॥
ചതുർവിംശതിതത്ത്വാഖ്യാ പാതു പ്രാചീം ദിശം മമ ।
ചതുഷ്പാദാ യജുർബ്രഹ്മദണ്ഡാഖ്യാ പാതു ദക്ഷിണാ ॥ 54 ॥
ഷട്ത്രിംശത്തത്ത്വയുക്താ സാ പാതു മേ ദക്ഷിണാം ദിശം ।
പ്രത്യങ്മുഖീ പഞ്ചപദീ പഞ്ചാശത്തത്ത്വരൂപിണീ ॥ 55 ॥
പാതു പ്രതീചീമനിശം സാമബ്രഹ്മശിരോങ്കിതാ ।
സൗമ്യാ ബ്രഹ്മസ്വരൂപാഖ്യാ സാഥർവാംഗിരസാത്മികാ ॥ 56 ॥
ഉദീചീം ഷട്പദാ പാതു ചതുഃഷഷ്ടികലാത്മികാ ।
പഞ്ചാശത്തത്ത്വരചിതാ ഭവപാദാ ശതാക്ഷരീ ॥ 57 ॥
വ്യോമാഖ്യാ പാതു മേ ചോർധ്വം ദിശം വേദാംഗസംസ്ഥിതാ ।
വിദ്യുന്നിഭാ ബ്രഹ്മസഞ്ജ്ഞാ മൃഗാരൂഢാ ചതുർഭുജാ ॥ 58 ॥
ചാപേഷുചർമാസിധരാ പാതു മേ പാവകീം ദിശം ।
ബ്രാഹ്മീ കുമാരീ ഗായത്രീ രക്താംഗീ ഹംസവാഹിനീ ॥ 59 ॥
ബിഭ്രത്കമണ്ഡല്വക്ഷസ്രക്സ്രുവാന്മേ പാതു നൈരൃതീം ।
ചതുർഭുജാ വേദമാതാ ശുക്ലാംഗീ വൃഷവാഹിനീ ॥ 60 ॥
വരാഽഭയകപാലാക്ഷസ്രഗ്വിണീ പാതു മാരുതീം ।
ശ്യാമാ സരസ്വതീ വൃദ്ധാ വൈഷ്ണവീ ഗരുഡാസനാ ॥ 61 ॥
ശംഖാരാബ്ജാഭയകരാ പാതു ശൈവീം ദിശം മമ ।
ചതുർഭുജാ വേദമാതാ ഗൗരാംഗീ സിംഹവാഹനാ ॥ 62 ॥
വരാഭയാബ്ജയുഗലൈർഭുജൈഃ പാത്വധരാം ദിശം ।
തത്തത്പാർശ്വസ്ഥിതാഃ സ്വസ്വവാഹനായുധഭൂഷണാഃ ॥ 63 ॥
സ്വസ്വദിക്ഷു സ്ഥിതാഃ പാന്തു ഗ്രഹശക്ത്യംഗദേവതാഃ ।
മന്ത്രാധിദേവതാരൂപാ മുദ്രാധിഷ്ഠാനദേവതാഃ ॥ 64 ॥
വ്യാപകത്വേന പാത്വസ്മാനാപഹൃത്തലമസ്തകീ ।
തത്പദം മേ ശിരഃ പാതു ഫാലം മേ സവിതുഃപദം ॥ 65 ॥
വരേണ്യം മേ ദൃശൗ പാതു ശ്രുതിം ഭർഗഃ സദാ മമ ।
ഘ്രാണം ദേവസ്യ മേ പാതു പാതു ധീമഹി മേ മുഖം ॥ 66 ॥
ജിഹ്വാം മമ ധിയഃ പാതു കണ്ഠം മേ പാതു യഃപദം ।
നഃ പദം പാതു മേ സ്കന്ധൗ ഭുജൗ പാതു പ്രചോദയാത് ॥ 67 ॥
കരൗ മേ ച പരഃ പാതു പാദൗ മേ രജസോഽവതു ।
സാ മേ നാഭിം സദാ പാതു കടിം വൈ പാതുമേവദോം ॥ 68 ॥
ഓമാപഃ സക്ഥിനീ പാതു ഗുഹ്യം ജ്യോതിഃ സദാ മമ ।
ഊരൂ മമ രസഃ പാതു ജാനുനീ അമൃതം മമ ॥ 69 ॥
ജംഘേ ബ്രഹ്മപദം പാതു ഗുൽഫൗ ഭൂഃ പാതു മേ സദാ ।
പാദൗ മമ ഭുവഃ പാതു സുവഃ പാത്വഖിലം വപുഃ ॥ 70 ॥
രോമാണി മേ മഹഃ പാതു ലോമകം പാതു മേ ജനഃ ।
പ്രാണാംശ്ച ധാതുതത്ത്വാനി തദീശഃ പാതു മേ തപഃ ॥ 71 ॥
സത്യം പാതു മമായൂംഷി ഹംസോ വൃദ്ധിം ച പാതു മേ ।
ശുചിഷത്പാതു മേ ശുക്രം വസുഃ പാതു ശ്രിയം മമ ॥ 72 ॥
മതിം പാത്വന്തരിക്ഷസദ്ധോതാ ദാനം ച പാതു മേ ।
വേദിഷത്പാതു മേ വിദ്യാമതിഥിഃ പാതു മേ ഗൃഹം ॥ 73 ॥
ധർമം ദുരോണസത്പാതു നൃഷത്പാതു വധൂം മമ ।
വരസത്പാതു മേ മായാഽമൃതസത്പാതു മേ സുതാൻ ॥ 74 ॥
വ്യോമസത്പാതു മേ ബന്ധൂൻ ഭ്രാതൄനബ്ജശ്ച പാതു മേ ।
പശൂന്മേ പാതു ഗോജാശ്ച ഋതജാഃ പാതു മേ ഭുവം ॥ 75 ॥
സർവം മേ അദ്രിജാ പാതു യാനം മേ പാത്വൃതം സദാ ।
മമ സർവം ബൃഹത്പാതു വിഭുരോം പാതു സർവദാ ॥ 76 ॥
അനുക്തമഥ യത്സ്ഥാനം ശരീരാന്തർബഹിശ്ച യത് ।
തത്സർവം പാതു മേ നിത്യം ഹംസഃ സോഽഹമഹർനിശം ॥ 77 ॥
ഇദം തു കഥിതം സമ്യങ്മയാ തേ ബ്രഹ്മപഞ്ജരം ।
സന്ധ്യയോഃ പ്രത്യഹം ഭക്ത്യാ ജപകാലേ വിശേഷതഃ ॥ 78 ॥
ധാരയേദ്ദ്വിജവര്യോ യഃ ശ്രാവയേദ്വാ സമാഹിതഃ ।
സ വിഷ്ണുഃ സ ശിവഃ സോഽഹം സോഽക്ഷരഃ സ വിരാട് സ്വരാട് ॥ 79 ॥
ശതാക്ഷരാത്മകം ദേവ്യാ നാമാഷ്ടാവിംശതിഃ ശതം ।
ശൃണു വക്ഷ്യാമി തത്സർവമതി ഗുഹ്യം സനാതനം ॥ 80 ॥
ഭൂതിദാ ഭുവനാ വാണീ വസുധാ സുമനാ മഹീ ।
തുര്യാ ശോഭാ ദ്വിജപ്രീതാ കാമധുക് ഭക്തസിദ്ധിദാ ॥ 81 ॥
വിശ്വാ ച വിജയാ വേദ്യാ സന്ധ്യാ ബ്രാഹ്മീ സരസ്വതീ ।
ഹരിണീ ജനനീ നന്ദാ സവിസർഗാ തപസ്വിനീ ॥ 82 ॥
പയസ്വിനീ സതീ ത്യാഗാ ചൈന്ദവീ സത്യവീ രസാ ।
ശൈവീ ലാസ്യപ്രിയാ തുഷ്ടാ ജപ്യാ സത്യാ സതീ ധ്രുവാ ॥ 83 ॥
ഭക്തവശ്യാ ച ഗായത്രീ ഭീമാ വിഷ്ണുപ്രിയാ ജയാ ।
വിശ്വാ തുര്യാ പരാ രേച്യാ നിർഘൃണീ യമിനീ ഭവാ ॥ 84 ॥
ഗോവേദ്യാ ച ജരിഷ്ഠാ ച സ്കന്ദിനീ ധീർമതിർഹിമാ ।
അനന്താ രവിമധ്യസ്ഥാ സാവിത്രീ ബ്രാഹ്മണീ ത്രയീ ॥ 85 ॥
അപർണാ ചണ്ഡികാ ധ്യേയാ മനുശ്രേഷ്ഠാ ച സാത്വികീ ।
ഭീഷണാ യോഗിനീ പക്ഷീ നദീ പ്രജ്ഞാ ച ചോദിനീ ॥ 86 ॥
ധനിനീ യാമിനീ പദ്മാ രോഹിണീ രമണീ ഋഷിഃ ।
ബ്രഹ്മിഷ്ഠാ ഭക്തിഗമ്യാ ച കാമദാ ബലദാ വസുഃ ॥ 87 ॥
ആദ്യാ വർണമയീ ഹൃദ്യാ ലക്ഷ്മീഃ ശാന്താ രമാഽച്യുതാ ।
സേനാമുഖീ സാമമയീ ബഹുലാ ദോഷവർജിതാ ॥ 88 ॥
സർവകാമദുഘാ സോമോദ്ഭവാഽഹങ്കാരവർജിതാ ।
തത്പരാ സുഖദാ സിദ്ധിഃ വേദ്യാ പൂജ്യാ പ്രസാദിനീ ॥ 89 ॥
വിപ്രപ്രസാദിനീ പൂജ്യാ വിശ്വവന്ദ്യാ വിനോദിനീ ।
ദ്വിപദാ ച ചതുഷ്പാദാ ത്രിപദാ ചൈവ ഷട്പദാ ॥ 90 ॥
അഷ്ടാപദീ നവപദീ സാ സഹസ്രാക്ഷരാത്മികാ ।
അമോഘഫലദാഽനാദിഃ സർവാ സർവാംഗസുന്ദരീ ॥ 91 ॥
ശർവാണീ വൈഷ്ണവീ ചന്ദ്രചൂഡാ ത്രിണയനാ ക്ഷമാ ।
വിശ്വമാതാ ത്രയീസാരാ ത്രികാലജ്ഞാനരൂപിണീ ॥ 92 ॥
ചന്ദ്രമണ്ഡലമധ്യസ്ഥാ ഭക്തപാപവിനാശിനീ ।
വരദാ ഛന്ദസാം മാതാ ബ്രാഹ്മണ്യപദദായിനീ ॥ 93 ॥
യ ഇദം പരമം ഗുഹ്യം സാവിത്രീമന്ത്രപഞ്ജരം ।
നാമാഷ്ടവിംശതിശതം ശൃണുയാച്ഛ്രാവയേത്പഠേത് ॥ 94 ॥
മർത്യാനാമമൃതത്ത്വായ ഭീതാനാമഭയായ ച ।
മോക്ഷായ ച മുമുക്ഷൂണാം ശ്രീകാമാനാം ശ്രിയേ സദാ ॥ 95 ॥
വിജയായ യുയുത്സൂനാം വ്യാധിതാനാമരോഗകൃത് ।
വശ്യായ വശ്യകാമാനാം വിദ്യായൈ വേദകാമിനാം ॥ 96 ॥
ദ്രവിണായ ദരിദ്രാണാം പാപിനാം പാപശാന്തയേ ।
വാദിനാം വാദവിജയേ കവീനാം കവിതാപ്രദം ॥ 97 ॥
അന്നായ ക്ഷുധിതാനാം ച സ്വർഗായ സ്വർഗമിച്ഛതാം ।
പശുഭ്യഃ പശുകാമാനാം പുത്രേഭ്യഃ പുത്രകാങ്ക്ഷിണാം ॥ 98 ॥
ക്ലേശിനാം ശോകശാന്ത്യർഥം നൃണാം ശത്രുഭയായ ച ।
രാജവശ്യായ ദ്രഷ്ടവ്യം പഞ്ജരം നൃപസേവിനാം ॥ 99 ॥
ഭക്ത്യർഥം വിഷ്ണുഭക്താനാം വിഷ്ണോഃ സർവാന്തരാത്മനി ।
നായകം വിധിസൃഷ്ടാനാം ശാന്തയേ ഭവതി ധ്രുവം ॥ 100 ॥
നിഃസ്പൃഹാണാം നൃണാം മുക്തിഃ ശാശ്വതീ ഭവതീ ധ്രുവം ।
ജപ്യം ത്രിവർഗസമ്യുക്തം ഗൃഹസ്ഥേന വിശേഷതഃ ॥ 101 ॥
മുനീനാം ജ്ഞാനസിദ്ധ്യർഥം യതീനാം മോക്ഷസിദ്ധയേ ।
ഉദ്യന്തം ചന്ദ്രകിരണമുപസ്ഥായ കൃതാഞ്ജലിഃ ॥ 102 ॥
കാനനേ വാ സ്വഭവനേ തിഷ്ഠഞ്ഛുദ്ധോ ജപേദിദം ।
സർവാൻകാമാനവാപ്നോതി തഥൈവ ശിവസന്നിധൗ ॥ 103 ॥
മമ പ്രീതികരം ദിവ്യം വിഷ്ണുഭക്തിവിവർധനം ।
ജ്വരാർതാനാം കുശാഗ്രേണ മാർജയേത്കുഷ്ഠരോഗിണാം ॥ 104 ॥
മൃഗമംഗം യഥാലിംഗം കവചേന തു സാധകഃ ।
മണ്ഡലേന വിശുദ്ധ്യേത സർവരോഗൈർന സംശയഃ ॥ 105 ॥
മൃതപ്രജാ ച യാ നാരീ ജന്മവന്ധ്യാ തഥൈവ ച ।
കന്യാദിവന്ധ്യാ യാ നാരീ താസാമംഗം പ്രമാർജയേത് ॥ 106 ॥
താസ്താഃ സംവത്സരാദർവാഗ്ധ്രിയേയുർഗർഭമുത്തമം ।
പതിവിദ്വേഷിണീ യാ സ്ത്രീ അംഗം തസ്യാഃ പ്രമാർജയേത് ॥ 107 ॥
തമേവ ഭജതേ സാ സ്ത്രീ പതിം കാമവശം നയേത് ।
അശ്വത്ഥേ രാജവശ്യാർഥം ബില്വമൂലേ സുരൂപഭാക് ॥ 108 ॥
പാലാശമൂലേ വിദ്യാർഥീ തേജസ്വ്യഭിമുഖോ രവേഃ ।
കന്യാർഥീ ചണ്ഡികാഗേഹേ ജപേച്ഛത്രുഭയായ ച ॥ 109 ॥
ശ്രീകാമോ വിഷ്ണുഗേഹേ ച ഉദ്യാനേ സ്ത്രീർവശീ ഭവേത് ।
ആരോഗ്യാർഥേ സ്വഗേഹേ ച മോക്ഷാർഥീ ശൈലമസ്തകേ ॥ 110 ॥
സർവകാമോ വിഷ്ണുഗേഹേ മോക്ഷാർഥീ യത്ര കുത്രചിത് ।
ജപാരംഭേ തു ഹൃദയം ജപാന്തേ കവചം പഠേത് ॥ 111 ॥
കിമത്ര ബഹുനോക്തേന ശൃണു നാരദ തത്ത്വതഃ ।
യം യം ചിന്തയതേ നിത്യം തം തം പ്രാപ്നോതി നിശ്ചിതം ॥ 112 ॥
ഇതി ശ്രീമദ്വസിഷ്ഠസംഹിതായാം ബ്രഹ്മനാരദസംവാദേ ശ്രീ ഗായത്രീ പഞ്ജര സ്തോത്രം ।
Recite with devotion and pure heart
Regular practice brings spiritual benefits