हैंహైHaindavamஹிહિં
📍
Font Size:
ಶ್ರೀ ಗಾಯತ್ರೀ ಲಹರೀ
ಅಮಂದಾನಂದೇನಾಮರವರಗೃಹೇ ವಾಸನಿರತಾಂ
ನರಂ ಗಾಯಂತಂ ಯಾ ಭುವಿ ಭವಭಯಾತ್ತ್ರಾಯತ ಇಹ ।
ಸುರೇಶೈಃ ಸಂಪೂಜ್ಯಾಂ ಮುನಿಗಣನುತಾಂ ತಾಂ ಸುಖಕರೀಂ
ನಮಾಮೋ ಗಾಯತ್ರೀಂ ನಿಖಿಲಮನುಜಾಘೌಘಶಮನೀಂ ॥ 1 ॥
ಅವಾಮಾ ಸಮ್ಯುಕ್ತಂ ಸಕಲಮನುಜೈರ್ಜಾಪ್ಯಮಭಿತೀ
ಹ್ಯಪಾಯಾತ್ಪಾಯಾದ್ಭೂರಥ ಭುವಿ ಭುವಃ ಸ್ವಃ ಪದಮಿತಿ ।
ಪದಂ ತನ್ಮೇ ಪಾದಾವವತು ಸವಿತುಶ್ಚೈವ ಜಘನೇ
ವರೇಣ್ಯಂ ಶ್ರೋಣಿಂ ಮೇ ಸತತಮವತಾನ್ನಾಭಿಮಪಿ ಚ ॥ 2 ॥
ಪದಂ ಭರ್ಗೋ ದೇವಸ್ಯ ಮಮ ಹೃದಯಂ ಧೀಮಹಿ ತಥಾ
ಗಲಂ ಪಾಯಾನ್ನಿತ್ಯಂ ಧಿಯ ಇಹ ಪದಂ ಚೈವ ರಸನಾಂ ।
ತಥಾ ನೇತ್ರೇ ಯೋಽವ್ಯಾದಲಕಮವತಾನ್ನಃ ಪದಮಿತಿ
ಶಿರೋದೇಶಂ ಪಾಯಾನ್ಮಮ ತು ಪರಿತಶ್ಚಾಂತಿಮಪದಂ ॥ 3 ॥
ಅಯೇ ದಿವ್ಯೇ ದೇವಿ ತ್ರಿದಶನಿವಹೈರ್ವಂದಿತಪದೇ
ನ ಶೇಕುಸ್ತ್ವಾಂ ಸ್ತೋತುಂ ಭಗವತಿ ಮಹಾಂತೋಽಪಿ ಮುನಯಃ ।
ಕಥಂಕಾರಂ ತರ್ಹಿಸ್ತುತಿತತಿರಿಯಂ ಮೇ ಶುಭತರಾ
ತಥಾ ಪೂರ್ಣಾ ಭೂಯಾತ್ ತ್ರುಟಿಪರಿಯುತಾ ಭಾವರಹಿತಾ ॥ 4 ॥
ಭಜಂತಂ ನಿರ್ವ್ಯಾಜಂ ತವ ಸುಖದಮಂತ್ರಂ ವಿಜಯಿನಂ
ಜನಂ ಯಾವಜ್ಜೀವಂ ಜಪತಿ ಜನನಿ ತ್ವಂ ಸುಖಯಸಿ ।
ನ ವಾ ಕಾಮಂ ಕಾಚಿತ್ ಕಲುಷಕಣಿಕಾಽಪಿ ಸ್ಪೃಶತಿ ತಂ
ಸಂಸಾರಂ ಸಂಸಾರಂ ಸರತಿ ಸಹಸಾ ತಸ್ಯ ಸತತಂ ॥ 5 ॥
ದಧಾನಾಂ ಹ್ಯಾಧಾನಂ ಸಿತಕುವಲಯಾಸ್ಫಾಲನರುಚಾಂ
ಸ್ವಯಂ ವಿಭ್ರಾಜಂತೀಂ ತ್ರಿಭುವನಜನಾಹ್ಲಾದನಕರೀಂ ।
ಅಲಂ ಚಾಲಂ ಚಾಲಂ ಮಮ ಚಕಿತಚಿತ್ತಂ ಸುಚಪಲಂ
ಚಲಚ್ಚಂದ್ರಾಸ್ಯೇ ತ್ವದ್ವದನರುಚಮಾಚಾಮಯ ಚಿರಂ ॥ 6 ॥
ಲಲಾಮೇ ಭಾಲೇ ತೇ ಬಹುತರ ವಿಶಾಲೇಽತಿ ವಿಮಲೇ
ಕಲಾ ಚಂಚಚ್ಚಾಂದ್ರೀ ರುಚಿರತಿಲಕಾವೇಂದುಕಲಯಾ ।
ನಿತಾಂತಂ ಗೋಮಾಯಾ ನಿವಿಡ ತಮಸೋ ನಾಶ ವ್ಯಸನಾ
ತಮೋ ಮೇ ಗಾಢಂ ಹಿ ಹೃದಯಸದನಸ್ಥಂ ಗ್ಲಪಯತು ॥ 7 ॥
ಅಯೇ ಮಾತಃ ಕಿಂ ತೇ ಚರಣ ಶರಣಂ ಸಂಶ್ರಯವತಾಂ
ಜನಾನಾಮಂತಸ್ಥೋ ವೃಜಿನ ಹುತಭುಕ್ ಪ್ರಜ್ವಲತಿ ಯಃ ।
ತದಸ್ಯಾಶು ಸಮ್ಯಕ್ ಪ್ರಶಮನಹಿತಾಯೈವ ವಿಧೃತಂ
ಕರೇ ಪಾತ್ರಂ ಪುಣ್ಯಂ ಸಲಿಲಭರಿತಂ ಕಾಷ್ಠರಚಿತಂ ॥ 8 ॥
ಅಥಾಹೋಸ್ವಿನ್ಮಾತಃ ಸರಿದಧಿಪತೇಃ ಸಾರಮಖಿಲಂ
ಸುಧಾರೂಪಂ ಕೂಪಂ ಲಘುತರಮನೂಪಂ ಕಲಯತಿ ।
ಸ್ವಭಕ್ತೇಭ್ಯೋ ನಿತ್ಯಂ ವಿತರಸಿ ಜನೋದ್ಧಾರಿಣಿ ಶುಭೇ
ವಿಹೀನೇ ದೀನೇಽಸ್ಮಿನ್ ಮಯ್ಯಪಿ ಸಕರುಣಾಂ ಕುರು ಕೃಪಾಂ ॥ 9 ॥
ಸದೈವ ತ್ವತ್ಪಾಣೌ ವಿಧೃತಮರವಿಂದಂ ದ್ಯುತಿಕರಂ
ತ್ವಿದಂ ದರ್ಶಂ ದರ್ಶಂ ರವಿಶಶಿಸಮಂ ನೇತ್ರಯುಗಲಂ ।
ವಿಚಿಂತ್ಯ ಸ್ವಾಂ ವೃತ್ತಿಂ ಭ್ರಮವಿಷಮಜಾಲೇಽಸ್ತಿ ಪತಿತಂ
ಇದಂ ಮನ್ಯೇ ನೋ ಚೇತ್ ಕಥಮಿತಿ ಭವೇದರ್ಧವಿಕಚಂ ॥ 10 ॥
ಸ್ವಯಂ ಮಾತಃ ಕಿಂ ವಾ ತ್ವಮಸಿ ಜಲಜಾನಾಮಪಿ ಖನಿ-
-ರ್ಯತಸ್ತೇ ಸರ್ವಾಂಗಂ ಕಮಲಮಯಮೇವಾಸ್ತಿ ಕಿಮು ನೋ ।
ತಥಾ ಭೀತ್ಯಾ ತಸ್ಮಾಚ್ಛರಣಮುಪಯಾತಃ ಕಮಲರಾಟ್
ಪ್ರಯುಂಜಾನೋಽಶ್ರಾಂತಂ ಭವತಿ ತದಿಹೈವಾಸನವಿಧೌ ॥ 11 ॥
ದಿವೌಕೋಭಿರ್ವಂದ್ಯೇ ವಿಕಸಿತ ಸರೋಜಾಕ್ಷಿ ಸುಖದೇ
ಕೃಪಾದೃಷ್ಟೇರ್ವೃಷ್ಟಿಃ ಸುನಿಪತತಿ ಯಸ್ಯೋಪರಿ ತವ ।
ತದೀಯಾಂ ವಾಂಛಾಂ ಹಿ ದ್ರುತಮನು ವಿದಧಾಸಿ ಸಫಲಾಂ
ಅತೋಮಂತೋಸ್ತಂತೂನ್ ಮಮ ಸಪದಿ ಛಿತ್ವಾಽಮ್ಬ ಸುಖಯ ॥ 12 ॥
ಕರೇಽಕ್ಷಾಣಾಂ ಮಾಲಾ ಪ್ರವಿಲಸತಿ ಯಾ ತೇಽತಿವಿಮಲೇ
ಕಿಮರ್ಥಂ ಸಾ ಕಾನ್ ವಾ ಗಣಯಸಿ ಜನಾನ್ ಭಕ್ತಿ ನಿರತಾನ್ ।
ಜಪಂತೀ ಕಂ ಮಂತ್ರಂ ಪ್ರಶಮಯಸಿ ದುಃಖಂ ಜನಿಜುಷಾ
ಮಯೇ ಕಾ ವಾ ವಾಂಛಾ ಭವತಿ ತವ ತ್ವತ್ರ ಸುವರದೇ ॥ 13 ॥
ನ ಮನ್ಯೇ ಧನ್ಯೇಽಹಂ ತ್ವವಿತಥಮಿದಂ ಲೋಕಗದಿತಂ
ಮಮಾತ್ರೋಕ್ತಿರ್ಮತ್ವಾ ಕಮಲಪತಿ ಫುಲ್ಲಂ ತವ ಕರಂ ।
ವಿಜೃಂಭಾ ಸಮ್ಯುಕ್ತ ದ್ಯುತಿಮಿದಮಭಿ ಕೋಕನದಮಿ-
-ತ್ಯರಂ ಜಾನಾನೇಯಂ ಮಧುಕರತತಿ ಸಂವಿಲಸತಿ ॥ 14 ॥
ಮಹಾಮೋಹಾಂಭೋಧೌ ಮಮ ನಿಪತಿತಾ ಜೀವನತರಿ-
-ರ್ನಿರಾಲಂಬಾ ದೋಲಾ ಚಲತಿ ದುರವಸ್ಥಾಮಧಿಗತಾ ।
ಜಲಾವರ್ತ ವ್ಯಾಲೋ ಗ್ರಸಿತುಮಭಿತೋ ವಾಂಛತಿ ಚ ತಾಂ
ಕರಾಲಂಬಂ ದತ್ವಾ ಭಗವತಿ ದ್ರುತಂ ತಾರಯ ಶಿವೇ ॥ 15 ॥
ದಧಾನಾಸಿತ್ವಂ ಯತ್ ಸ್ವವಪುಷಿ ಪಯೋಧಾರ ಯುಗಲ-
-ಮಿತಿ ಶ್ರುತ್ವಾ ಲೋಕೈರ್ಮಮ ಮನಸಿ ಚಿಂತಾ ಸಮಭವತ್ ।
ಕಥಂ ಸ್ಯಾತ್ ಸಾ ತಸ್ಮಾದಲಕ ಲತಿಕಾ ಮಸ್ತಕ ಭುವಿ
ಶಿರೋದ್ಯೌ ಹೃದ್ಯೇಯಂ ಜಲದಪಟಲೀ ಖೇಲತಿ ಕಿಲ ॥ 16 ॥
ತಥಾ ತತ್ರೈವೋಪಸ್ಥಿತಮಪಿ ನಿಶೀಥಿನ್ಯಧಿಪತೇಃ
ಪ್ರಪಶ್ಯಾಮಿ ಶ್ಯಾಮೇ ಸಹ ಸಹಚರೈಸ್ತಾರಕ ಗಣೈಃ ।
ಅಹೋರಾತ್ರ ಕ್ರೀಡಾ ಪರವಶಮಿತಾಸ್ತೇಽಪಿ ಚಕಿತಾ-
-ಶ್ಚಿರಂ ಚಿಕ್ರೀಡಂತೇ ತದಪಿ ಮಹದಾಶ್ಚರ್ಯಚರಿತಂ ॥ 17 ॥
ಯದಾಹುಸ್ತಂ ಮುಕ್ತಾ ಪಟಲ ಜಟಿತಂ ರತ್ನಮುಕುಟಂ
ನ ಧತ್ತೇ ತೇಷಾಂ ಸಾ ವಚನರಚನಾ ಸಾಧುಪದವೀಂ ।
ನಿಶೈಷಾ ಕೇಶಾಸ್ತು ನಹಿ ವಿಗತ ವೇಶಾ ಧ್ರುವಮಿತಿ
ಪ್ರಸನ್ನಾಽಧ್ಯಾಸನ್ನಾ ವಿಧುಪರಿಷದೇಷಾ ವಿಲಸತಿ ॥ 18 ॥
ತ್ರಿಬೀಜೇ ಹೇ ದೇವಿ ತ್ರಿಪ್ರಣವಸಹಿತೇ ತ್ರ್ಯಕ್ಷರಯುತೇ
ತ್ರಿಮಾತ್ರಾ ರಾಜಂತೇ ಭುವನವಿಭವೇ ಹ್ಯೋಮಿತಿಪದೇ ।
ತ್ರಿಕಾಲಂ ಸಂಸೇವ್ಯೇ ತ್ರಿಗುಣವತಿ ಚ ತ್ರಿಸ್ವರಮಯಿ
ತ್ರಿಲೋಕೇಶೈಃ ಪೂಜ್ಯೇ ತ್ರಿಭುವನಭಯಾತ್ತ್ರಾಹಿ ಸತತಂ ॥ 19 ॥
ನ ಚಂದ್ರೋ ನೈವೇಮೇ ನಭಸಿ ವಿತತಾ ತಾರಕಗಣಾಃ
ತ್ವಿಷಾಂ ರಾಶೀ ರಮ್ಯಾ ತವ ಚರಣಯೋರಂಬುನಿಚಯೇ ।
ಪತಿತ್ವಾ ಕಲ್ಲೋಲೈಃ ಸಹ ಪರಿಚಯಾದ್ವಿಸ್ತೃತಿಮಿತಾ
ಪ್ರಭಾ ಸೈವಾಽನಂತಾ ಗಗನಮುಕುರೇ ದೀವ್ಯತಿ ಸದಾ ॥ 20 ॥
ತ್ವಮೇವ ಬ್ರಹ್ಮಾಣೀ ತ್ವಮಸಿ ಕಮಲಾ ತ್ವಂ ನಗಸುತಾ
ತ್ರಿಸಂಧ್ಯಂ ಸೇವಂತೇ ಚರಣಯುಗಲಂ ಯೇ ತವ ಜನಾಃ ।
ಜಗಜ್ಜಾಲೇ ತೇಷಾಂ ನಿಪತಿತ ಜನಾನಾಮಿಹ ಶುಭೇ
ಸಮುದ್ಧಾರಾರ್ಥಂ ಕಿಂ ಮತಿಮತಿ ಮತಿಸ್ತೇ ನ ಭವತಿ ॥ 21 ॥
ಅನೇಕೈಃ ಪಾಪೌಘೈರ್ಲುಲಿತ ವಪುಷಂ ಶೋಕ ಸಹಿತಂ
ಲುಠಂತಂ ದೀನಂ ಮಾಂ ವಿಮಲ ಪದಯೋ ರೇಣುಷು ತವ ।
ಗಲದ್ಬಾಷ್ಪಂ ಶಶ್ವದ್ ಜನನಿ ಸಹಸಾಶ್ವಾಸನವಚೋ
ಬ್ರುವಾಣೋತ್ತಿಷ್ಠ ತ್ವಂ ಅಮೃತಕಣಿಕಾಂ ಪಾಸ್ಯಸಿ ಕದಾ ॥ 22 ॥
ನ ವಾ ಮಾದೃಕ್ ಪಾಪೀ ನ ಹಿ ತವ ಸಮಾ ಪಾಪಹರಣೀ
ನ ದುರ್ಬುದ್ಧಿರ್ಮಾದೃಕ್ ನ ಚ ತವ ಸಮಾ ಧೀ ವಿತರಿಣೀ ।
ನ ಮಾದೃಗ್ ಗರ್ವಿಷ್ಠೋ ನ ಹಿ ತವ ಸಮಾ ಗರ್ವಹರಣೀ
ಹೃದಿ ಸ್ಮೃತ್ವಾ ಹ್ಯೇವಂ ಮಯಿ ಕುರು ಯಥೇಚ್ಛಾ ತವ ಯಥಾ ॥ 23 ॥
ದರೀಧರ್ತಿ ಸ್ವಾಂತೇಽಕ್ಷರ ವರ ಚತುರ್ವಿಂಶತಿಮಿತಂ
ತ್ವದಂತರ್ಮಂತ್ರಂ ಯತ್ತ್ವಯಿ ನಿಹಿತ ಚೇತೋ ಹಿ ಮನುಜಃ ।
ಸಮಂತಾದ್ಭಾಸ್ವಂತಂ ಭವತಿ ಭುವಿ ಸಂಜೀವನವನಂ
ಭವಾಂಭೋಧೇಃ ಪಾರಂ ವ್ರಜತಿ ಸ ನಿತರಾಂ ಸುಖಯುತಃ ॥ 24 ॥
ಭಗವತಿ ಲಹರೀಯಂ ರುದ್ರದೇವ ಪ್ರಣೀತಾ
ತವ ಚರಣಸರೋಜೇ ಸ್ಥಾಪ್ಯತೇ ಭಕ್ತಿಭಾವೈಃ ।
ಕುಮತಿತಿಮಿರಪಂಕಸ್ಯಾಂಕಮಗ್ನಂ ಸಶಂಕಂ
ಅಯಿ ಖಲು ಕುರು ದತ್ವಾ ವೀತಶಂಕಂ ಸ್ವಮಂಕಂ ॥ 25 ॥
ಇತಿ ಶ್ರೀ ರುದ್ರದೇವ ವಿರಚಿತ ಶ್ರೀ ಗಾಯತ್ರೀ ಲಹರೀ ॥
Recite with devotion and pure heart
Regular practice brings spiritual benefits