ನಾರದ ಉವಾಚ । ಭಗವನ್ ದೇವದೇವೇಶ ಭೂತಭವ್ಯಜಗತ್ಪ್ರಭೋ । ಕವಚಂ ಚ ಶ್ರುತಂ ದಿವ್ಯಂ ಗಾಯತ್ರೀಮಂತ್ರವಿಗ್ರಹಂ ॥ 1 ॥ ಅಧುನಾ ಶ್ರೋತುಮಿಚ್ಛಾಮಿ ಗಾಯತ್ರೀಹೃದಯಂ ಪರಂ । ಯದ್ಧಾರಣಾದ್ಭವೇತ್ಪುಣ್ಯಂ ಗಾಯತ್ರೀಜಪತೋಽಖಿಲಂ ॥ 2 ॥ ಶ್ರೀನಾರಾಯಣ ಉವಾಚ । ದೇವ್ಯಾಶ್ಚ ಹೃದಯಂ ಪ್ರೋಕ್ತಂ ನಾರದಾಥರ್ವಣೇ ಸ್ಫುಟಂ । ತದೇವಾಹಂ ಪ್ರವಕ್ಷ್ಯಾಮಿ ರಹಸ್ಯಾತಿರಹಸ್ಯಕಂ ॥ 3 ॥ ವಿರಾಡ್ರೂಪಾಂ ಮಹಾದೇವೀಂ ಗಾಯತ್ರೀಂ ವೇದಮಾತರಂ । ಧ್ಯಾತ್ವಾ ತಸ್ಯಾಸ್ತ್ವಥಾಂಗೇಷು ಧ್ಯಾಯೇದೇತಾಶ್ಚ ದೇವತಾಃ ॥ 4 ॥ ಪಿಂಡಬ್ರಹ್ಮಂಡಯೋರೈಕ್ಯಾದ್ಭಾವಯೇತ್ಸ್ವತನೌ ತಥಾ । ದೇವೀರೂಪೇ ನಿಜೇ ದೇಹೇ ತನ್ಮಯತ್ವಾಯ ಸಾಧಕಃ ॥ 5 ॥ ನಾದೇವೋಽಭ್ಯರ್ಚಯೇದ್ದೇವಮಿತಿ ವೇದವಿದೋ ವಿದುಃ । ತತೋಽಭೇದಾಯ ಕಾಯೇ ಸ್ವೇ ಭಾವಯೇದ್ದೇವತಾ ಇಮಾಃ ॥ 6 ॥ ಅಥ ತತ್ಸಂಪ್ರವಕ್ಷ್ಯಾಮಿ ತನ್ಮಯತ್ವಮಥೋ ಭವೇತ್ । ಗಾಯತ್ರೀಹೃದಯಸ್ಯಾಽಸ್ಯಾಽಪ್ಯಹಮೇವ ಋಷಿಃ ಸ್ಮೃತಃ ॥ 7 ॥ ಗಾಯತ್ರೀಛಂದ ಉದ್ದಿಷ್ಟಂ ದೇವತಾ ಪರಮೇಶ್ವರೀ । ಪೂರ್ವೋಕ್ತೇನ ಪ್ರಕಾರೇಣ ಕುರ್ಯಾದಂಗಾನಿ ಷಟ್ಕ್ರಮಾತ್ । ಆಸನೇ ವಿಜನೇ ದೇಶೇ ಧ್ಯಾಯೇದೇಕಾಗ್ರಮಾನಸಃ ॥ 8 ॥ ಅಥಾರ್ಥನ್ಯಾಸಃ । ದ್ಯೌಮೂರ್ಧ್ನಿ ದೈವತಂ । ದಂತಪಂಕ್ತಾವಶ್ವಿನೌ । ಉಭೇ ಸಂಧ್ಯೇ ಚೌಷ್ಠೌ । ಮುಖಮಗ್ನಿಃ । ಜಿಹ್ವಾ ಸರಸ್ವತೀ । ಗ್ರೀವಾಯಾಂ ತು ಬೃಹಸ್ಪತಿಃ । ಸ್ತನಯೋರ್ವಸವೋಽಷ್ಟೌ । ಬಾಹ್ವೋರ್ಮರುತಃ । ಹೃದಯೇ ಪರ್ಜನ್ಯಃ । ಆಕಾಶಮುದರಂ । ನಾಭಾವಂತರಿಕ್ಷಂ । ಕಟ್ಯೋರಿಂದ್ರಾಗ್ನೀ । ಜಘನೇ ವಿಜ್ಞಾನಘನಃ ಪ್ರಜಾಪತಿಃ । ಕೈಲಾಸಮಲಯೇ ಊರೂ । ವಿಶ್ವೇದೇವಾ ಜಾನ್ವೋಃ । ಜಂಘಾಯಾಂ ಕೌಶಿಕಃ । ಗುಹ್ಯಮಯನೇ । ಊರೂ ಪಿತರಃ । ಪಾದೌ ಪೃಥಿವೀ । ವನಸ್ಪತಯೋಽಙ್ಗುಲೀಷು । ಋಷಯೋ ರೋಮಾಣಿ । ನಖಾನಿ ಮುಹೂರ್ತಾನಿ । ಅಸ್ಥಿಷು ಗ್ರಹಾಃ । ಅಸೃಙ್ಮಾಂಸಮೃತವಃ ॥ ಸಂವತ್ಸರಾ ವೈ ನಿಮಿಷಂ । ಅಹೋರಾತ್ರಾವಾದಿತ್ಯಶ್ಚಂದ್ರಮಾಃ । ಪ್ರವರಾಂ ದಿವ್ಯಾಂ ಗಾಯತ್ರೀಂ ಸಹಸ್ರನೇತ್ರಾಂ ಶರಣಮಹಂ ಪ್ರಪದ್ಯೇ ॥ ಓಂ ತತ್ಸವಿತುರ್ವರೇಣ್ಯಾಯ ನಮಃ । ಓಂ ತತ್ಪೂರ್ವಾಜಯಾಯ ನಮಃ । ತತ್ಪ್ರಾತರಾದಿತ್ಯಾಯ ನಮಃ । ತತ್ಪ್ರಾತರಾದಿತ್ಯಪ್ರತಿಷ್ಠಾಯೈ ನಮಃ ॥ ಪ್ರಾತರಧೀಯಾನೋ ರಾತ್ರಿಕೃತಂ ಪಾಪಂ ನಾಶಯತಿ । ಸಾಯಮಧೀಯಾನೋ ದಿವಸಕೃತಂ ಪಾಪಂ ನಾಶಯತಿ । ಸಾಯಂ ಪ್ರಾತರಧೀಯಾನೋ ಅಪಾಪೋ ಭವತಿ । ಸರ್ವತೀರ್ಥೇಷು ಸ್ನಾತೋ ಭವತಿ । ಸರ್ವೈರ್ದೇವೈರ್ಜ್ಞಾತೋ ಭವತಿ । ಅವಾಚ್ಯವಚನಾತ್ಪೂತೋ ಭವತಿ । ಅಭಕ್ಷ್ಯಭಕ್ಷಣಾತ್ಪೂತೋ ಭವತಿ । ಅಭೋಜ್ಯಭೋಜನಾತ್ಪೂತೋ ಭವತಿ । ಅಚೋಷ್ಯಚೋಷಣಾತ್ಪೂತೋ ಭವತಿ । ಅಸಾಧ್ಯಸಾಧನಾತ್ಪೂತೋ ಭವತಿ । ದುಷ್ಪ್ರತಿಗ್ರಹಶತಸಹಸ್ರಾತ್ಪೂತೋ ಭವತಿ । ಸರ್ವಪ್ರತಿಗ್ರಹಾತ್ಪೂತೋ ಭವತಿ । ಪಂಕ್ತಿದೂಷಣಾತ್ಪೂತೋ ಭವತಿ । ಅನೃತವಚನಾತ್ಪೂತೋ ಭವತಿ । ಅಥಾಽಬ್ರಹ್ಮಚಾರೀ ಬ್ರಹ್ಮಚಾರೀ ಭವತೀ । ಅನೇನ ಹೃದಯೇನಾಧೀತೇನ ಕ್ರತುಸಹಸ್ರೇಣೇಷ್ಟಂ ಭವತಿ । ಷಷ್ಟಿಶತಸಹಸ್ರಗಾಯತ್ರ್ಯಾ ಜಪ್ಯಾನಿ ಫಲಾನಿ ಭವಂತಿ । ಅಷ್ಟೌ ಬ್ರಾಹ್ಮಣಾನ್ ಸಮ್ಯಗ್ಗ್ರಾಹಯೇತ್ । ತಸ್ಯ ಸಿದ್ಧಿರ್ಭವತಿ । ಯ ಇದಂ ನಿತ್ಯಮಧೀಯಾನೋ ಬ್ರಾಹ್ಮಣಃ ಪ್ರಾತಃ ಶುಚಿಃ ಸರ್ವಪಾಪೈಃ ಪ್ರಮುಚ್ಯತ ಇತಿ । ಬ್ರಹ್ಮಲೋಕೇ ಮಹೀಯತೇ ॥ ಇತ್ಯಾಹ ಭಗವಾನ್ ಶ್ರೀನಾರಾಯಣಃ ॥ ಇತಿ ಶ್ರೀದೇವೀಭಾಗವತೇ ಮಹಾಪುರಾಣೇ ದ್ವಾದಶಸ್ಕಂಧೇ ಶ್ರೀ ಗಾಯತ್ರೀ ಹೃದಯಂ ನಾಮ ಚತುರ್ಥೋಽಧ್ಯಾಯಃ ॥