jaya mātarviśālākṣi jaya saṅgītamātṛke । jaya mātaṅgi caṇḍāli gṛhītamadhupātrake ॥ 1 ॥ namaste'stu mahādevi namo bhagavatīśvari । namaste'stu jaganmātarjaya śaṅkaravallabhe ॥ 2 ॥ jaya tvaṃ śyāmale devi śukaśyāme namo'stu te । mahāśyāme mahārāme jaya sarvamanohare ॥ 3 ॥ jaya nīlotpalaprakhye jaya sarvavaśaṅkari । jaya tvajātvasaṃstutye laghuśyāme namo'stu te ॥ 4 ॥ namo namaste raktākṣi jaya tvaṃ madaśālini । jaya mātarmahālakṣmi vāgīśvari namo'stu te ॥ 5 ॥ nama indrādisaṃstutye namo brahmādipūjite । namo marakataprakhye śaṅkhakuṇḍalaśobhite ॥ 6 ॥ jaya tvaṃ jagadīśāni lokamohini te namaḥ । namaste'stu mahākṛṣṇe namo viśveśavallabhe ॥ 7 ॥ maheśvari namaste'stu nīlāmbarasamanvite । namaḥ kalyāṇi kṛṣṇāṅgi namaste parameśvari ॥ 8 ॥ mahādevapriyakari namaḥ sarvavaśaṅkari । mahāsaubhāgyade nṝṇāṃ kadambavanavāsini ॥ 9 ॥ jaya saṅgītarasike vīṇāhaste namo'stu te । janamohini vande tvāṃ brahmaviṣṇuśivātmike ॥ 10 ॥ vāgvādini namastubhyaṃ sarvavidyāprade namaḥ । namaste kuladeveśi namo nārīvaśaṅkari ॥ 11 ॥ aṇimādiguṇādhāre jaya nīlādrisannibhe । śaṅkhapadmādisamyukte siddhide tvāṃ bhajāmyaham ॥ 12 ॥ jaya tvaṃ varabhūṣāṅgi varāṅgīṃ tvāṃ bhajāmyaham । devīṃ vande yogivandye jaya lokavaśaṅkari ॥ 13 ॥ sarvālaṅkārasamyukte namastubhyaṃ nidhīśvari । sargapālanasaṃhārahetubhūte sanātani ॥ 14 ॥ jaya mātaṅgatanaye jaya nīlotpalaprabhe । bhaje śakrādivandye tvāṃ jaya tvaṃ bhuvaneśvari ॥ 15 ॥ jaya tvaṃ sarvabhaktānāṃ sakalābhīṣṭadāyini । jaya tvaṃ sarvabhadrāṅgī bhaktā'śubhavināśini ॥ 16 ॥ mahāvidye namastubhyaṃ siddhalakṣmi namo'stu te । brahmaviṣṇuśivastutye bhaktānāṃ sarvakāmade ॥ 17 ॥ mātaṅgīśvaravandye tvāṃ prasīda mama sarvadā । ityetacchyāmalāstotraṃ sarvakāmasamṛddhidam ॥ 18 ॥ śuddhātmā prajapedyastu nityamekāgramānasaḥ । sa labhetsakalānkāmān vaśīkuryājjagattrayam ॥ 19 ॥ śīghraṃ dāsā bhavantyasya devā yogīśvarādayaḥ । rambhorvaśyādyapsarasāmavyayo madano bhavet ॥ 20 ॥ nṛpāśca martyāḥ sarve'sya sadā dāsā bhavanti hi । labhedaṣṭaguṇaiśvaryaṃ dāridryeṇa vimucyate ॥ 21 ॥ śaṅkhādi nidhayo dvārsthāḥ sānnidhyaṃ paryupāsate । vyācaṣṭe sarvaśāstrāṇi sarvavidyānidhirbhavet ॥ 22 ॥ vimuktaḥ sakalāpadbhiḥ labhetsampattimuttamām । mahāpāpopapāpaughaiḥ saśīghraṃ mucyate naraḥ ॥ 23 ॥ jātismaratvamāpnoti brahmajñānamanuttamam । sadāśivatvamāpnoti sonte nātra vicāraṇā ॥ 24 ॥ iti śrī śyāmalā stotram ।