merau girivaregaurī śivadhyānaparāyaṇā । pārvatī paripapraccha parānugrahavāñchayā ॥ 1 ॥ śrīpārvatyuvāca- bhagavaṃstvanmukhāmbhojācchrutā dharmā anekaśaḥ । punaśśrotuṃ samicchāmi bhairavīstotramuttamam ॥ 2 ॥ śrīśaṅkara uvāca- śṛṇu devi pravakṣyāmi bhairavī hṛdayāhvayaṃ । stotraṃ tu paramaṃ puṇyaṃ sarvakalẏāṇakārakam ॥ 3 ॥ yasya śravaṇamātreṇa sarvābhīṣṭaṃ bhaveddhruvaṃ । vinā dhyānādinā vā'pi bhairavī parituṣyati ॥ 4 ॥ oṃ asya śrībhairavīhṛdayamantrasya dakṣiṇāmūrtiḥ ṛṣiḥ paṃṅktiśchandaḥ – bhayavidhvaṃsinī bhairavīdevatā – hakāro bījaṃ – rīṃ śaktiḥ – raiḥ kīlakaṃ sarvabhayavidhvaṃsanārthe jape viniyogaḥ ॥ atha karanyāsaḥ । oṃ hrīṃ aṅguṣṭhābhyāṃ namaḥ । oṃ śrīṃ tarjanībhyāṃ namaḥ । oṃ aiṃ madhyamābhyāṃ namaḥ । oṃ hrīṃ anāmikābhyāṃ namaḥ । oṃ śrīṃ kaniṣṭhikābhyāṃ namaḥ । oṃ aiṃ karatalakarapṛṣṭhābhyāṃ namaḥ ॥ athāṅganyāsaḥ । oṃ hrīṃ hṛdayāya namaḥ । oṃ śrīṃ śirase svāhā । oṃ aiṃ śikhāyai vaṣaṭ । oṃ hrīṃ kavacāya huṃ । oṃ śrīṃ netratrayāya vauṣaṭ । oṃ aiṃ astrāya phaṭ । dhyānam । devairdhyeyāṃ trinetrāmasurabhaṭaghanāraṇyaghorāgni rūpāṃ raudrīṃ raktāmbarāḍhyāṃ rati ghaṭaghaṭito rojayugmograrūpām । candrārdhabhrāji bhavyābharaṇa karalasadbālabimbāṃ bhavānīṃ sindūrāpūritāṅgīṃ tribhuvanajananīṃ bhairavīṃ bhāvayāmi ॥ 1 ॥ pañcacāmaravṛttam – bhavabhramatsamastabhūta vedamārgadāyinīṃ durantaduḥkhadāriṇīṃ suradruhām bhavapradāṃ bhavāndhakārabhedana prabhākarāṃ mitaprabhāṃ bhavacchidāṃ bhajāmi bhairavīṃ sadā ॥ 2 ॥ uraḥ pralambitāhimālyacandrabālabhūṣaṇāṃ navāmbudaprabhāṃ sarojacārulocanatrayāṃ suparvabṛndavanditāṃ surāpadantakārakāṃ bhavānubhāvabhāvinīṃ bhajāmi bhairavīṃ sadā ॥ 3 ॥ akhaṇḍabhūmi maṇḍalaika bhāradhīradhāriṇīṃ subhaktibhāvitātmanāṃ vibhūtibhavyadāyinīṃ bhavaprapañcakāriṇīṃ vihāriṇīṃ bhavāmbudhau bhavasyahṛdayabhāvinīṃ bhajāmi bairavīṃ sadā ॥ 4 ॥ śaraccamatkṛtārdha candracandrikāvirodhika prabhāvatī mukhābja mañjumādhurī miladgirāṃ bhujaṅgamālayā nṛmuṇḍamālayā ca maṇḍitāṃ subhaktimuktibhūtidāṃ bhajāmi bhairavīṃ sadā ॥ 5 ॥ sudhāmśusūryavahni locanatrayānvitānanāṃ narāntakāntaka prabhūti sarvadattadakṣiṇāṃ samuṇḍacaṇḍakhaṇḍana pracaṇḍacandrahāsinīṃ tamomatiprakāśinīṃ bhajāmi bhairavīṃ sadā ॥ 6 ॥ triśūlinīṃ tripuṇḍrinīṃ trikhaṇḍinīṃ tridaṇḍinīṃ guṇatrayātiriktamapyacintyacitsvarūpiṇīṃ savāsavā'diteyavairi bṛndavamśabhedinīṃ bhavaprabhāvabhāvinīṃ bhajāmi bhairavīṃ sadā ॥ 7 ॥ sudīptakoṭibālabhānumaṇḍalaprabhāṅgabhāṃ digantadāritāndhakāra bhūripuñjapaddhatiṃ dvijanmanityadharmanītivṛddhilagnamānasāṃ sarojarocirānanāṃ bhajāmi bhairavīṃ sadā ॥ 8 ॥ calatsuvarṇakuṇḍala prabhollasatkapolaruk samākulānanāmbujasthaśubhrakīra nāsikāṃ sacandrabhālabhairavāsya darśana spṛhaccakora- nīlakañjadarśanāṃ bhajāmi bhairavīṃ sadā ॥ 9 ॥ idaṃhṛdākhyasaṅgatastavaṃ paṭhantiye'niśaṃ paṭhanti te kadāpināndhakūparūpavadbhave bhavanti ca prabhūtabhakti muktirūpa ujjvalāḥ stutā prasīdati pramodamānasā ca bhairavī ॥ 10 ॥ yaśojagatyajasramujjvalañjayatyalaṃsamo na tasya jāyate parājayo'ñjasā jagattraye sadā stutiṃ śubhāmimāṃ paṭhatyananyamānaso bhavanti tasya sampado'pi santataṃ sukhapradāḥ ॥ 11 ॥ japapūjādikāssarvāḥ stotrapāṭhādikāśca yāḥ bhairavīhṛdayasyāsya kalānnārhanti ṣoḍaśīm ॥ 12 ॥ kimatra bahinoktena śṛṇu devi maheśvari nātaḥ parataraṃ kiñcit puṇyamasti jagattraye ॥ 13 ॥ iti śrī bhairavakulasarvasve śrībhairavīhṛdayastotram ॥