ಅಜಾನಂತೋ ಯಾಂತಿ ಕ್ಷಯಮವಶಮನ್ಯೋನ್ಯಕಲಹೈರಮೀ ಮಾಯಾಗ್ರಂಥೌ ತವ ಪರಿಲುಠಂತಃ ಸಮಯಿನಃ । ಜಗನ್ಮಾತರ್ಜನ್ಮಜ್ವರಭಯತಮಃ ಕೌಮುದಿ ವಯಂ ನಮಸ್ತೇ ಕುರ್ವಾಣಾಃ ಶರಣಮುಪಯಾಮೋ ಭಗವತೀಂ ॥ 1 ॥ ವಚಸ್ತರ್ಕಾಗಮ್ಯಸ್ವರಸಪರಮಾನಂದವಿಭವ- -ಪ್ರಬೋಧಾಕಾರಾಯ ದ್ಯುತಿತುಲಿತನೀಲೋತ್ಪಲರುಚೇ । ಶಿವಾದ್ಯಾರಾಧ್ಯಾಯ ಸ್ತನಭರವಿನಮ್ರಾಯ ಸತತಂ ನಮಸ್ತಸ್ಮೈ ಕಸ್ಮೈಚನ ಭವತು ಮುಗ್ಧಾಯ ಮಹಸೇ ॥ 2 ॥ ಅನಾದ್ಯಂತಾಭೇದಪ್ರಣಯರಸಿಕಾಪಿ ಪ್ರಣಯಿನೀ ಶಿವಸ್ಯಾಸೀರ್ಯತ್ತ್ವಂ ಪರಿಣಯವಿಧೌ ದೇವಿ ಗೃಹಿಣೀ । ಸವಿತ್ರೀ ಭೂತಾನಾಮಪಿ ಯದುದಭೂಃ ಶೈಲತನಯಾ ತದೇತತ್ಸಂಸಾರಪ್ರಣಯನಮಹಾನಾಟಕಮುಖಂ ॥ 3 ॥ ಬ್ರುವಂತ್ಯೇಕೇ ತತ್ತ್ವಂ ಭಗವತಿ ಸದನ್ಯೇ ವಿದುರಸ- -ತ್ಪರೇ ಮಾತಃ ಪ್ರಾಹುಸ್ತವ ಸದಸದನ್ಯೇ ಸುಕವಯಃ । ಪರೇ ನೈತತ್ಸರ್ವಂ ಸಮಭಿದಧತೇ ದೇವಿ ಸುಧಿಯ- -ಸ್ತದೇತತ್ತ್ವನ್ಮಾಯಾವಿಲಸಿತಮಶೇಷಂ ನನು ಶಿವೇ ॥ 4 ॥ ಲುಠದ್ಗುಂಜಾಹಾರಸ್ತನಭರನಮನ್ಮಧ್ಯಲತಿಕಾ- -ಮುದಂಚದ್ಧರ್ಮಾಂಭಃ ಕಣಗುಣಿತವಕ್ತ್ರಾಂಬುಜರುಚಂ । ಶಿವಂ ಪಾರ್ಥತ್ರಾಣಪ್ರವಣಮೃಗಯಾಕಾರಗುಣಿತಂ ಶಿವಾಮನ್ವಗ್ಯಾಂತೀಂ ಶರಣಮಹಮನ್ವೇಮಿ ಶಬರೀಂ ॥ 5 ॥ ಮಿಥಃ ಕೇಶಾಕೇಶಿಪ್ರಥನನಿಧನಾಸ್ತರ್ಕಘಟನಾಃ ಬಹುಶ್ರದ್ಧಾಭಕ್ತಿಪ್ರಣತಿವಿಷಯಾಃ ಶಾಸ್ತ್ರವಿಧಯಃ । ಪ್ರಸೀದ ಪ್ರತ್ಯಕ್ಷೀಭವ ಗಿರಿಸುತೇ ದೇಹಿ ಶರಣಂ ನಿರಾಲಂಬಂ ಚೇತಃ ಪರಿಲುಠತಿ ಪಾರಿಪ್ಲವಮಿದಂ ॥ 6 ॥ ಶುನಾಂ ವಾ ವಹ್ನೇರ್ವಾ ಖಗಪರಿಷದೋ ವಾ ಯದಶನಂ ಕದಾ ಕೇನ ಕ್ವೇತಿ ಕ್ವಚಿದಪಿ ನ ಕಶ್ಚಿತ್ಕಲಯತಿ । ಅಮುಷ್ಮಿನ್ವಿಶ್ವಾಸಂ ವಿಜಹಿಹಿ ಮಮಾಹ್ನಾಯ ವಪುಷಿ ಪ್ರಪದ್ಯೇಥಾಶ್ಚೇತಃ ಸಕಲಜನನೀಮೇವ ಶರಣಂ ॥ 7 ॥ ತಟಿತ್ಕೋಟಿಜ್ಯೋತಿರ್ದ್ಯುತಿದಲಿತಷಡ್ಗ್ರಂಥಿಗಹನಂ ಪ್ರವಿಷ್ಟಂ ಸ್ವಾಧಾರಂ ಪುನರಪಿ ಸುಧಾವೃಷ್ಟಿವಪುಷಾ । ಕಿಮಪ್ಯಷ್ಟಾವಿಂಶತ್ಕಿರಣಸಕಲೀಭೂತಮನಿಶಂ ಭಜೇ ಧಾಮ ಶ್ಯಾಮಂ ಕುಚಭರನತಂ ಬರ್ಬರಕಚಂ ॥ 8 ॥ ಚತುಷ್ಪತ್ರಾಂತಃ ಷಡ್ದಲಪುಟಭಗಾಂತಸ್ತ್ರಿವಲಯ- -ಸ್ಫುರದ್ವಿದ್ಯುದ್ವಹ್ನಿದ್ಯುಮಣಿನಿಯುತಾಭದ್ಯುತಿಲತೇ । ಷಡಶ್ರಂ ಭಿತ್ತ್ವಾದೌ ದಶದಲಮಥ ದ್ವಾದಶದಲಂ ಕಲಾಶ್ರಂ ಚ ದ್ವ್ಯಶ್ರಂ ಗತವತಿ ನಮಸ್ತೇ ಗಿರಿಸುತೇ ॥ 9 ॥ ಕುಲಂ ಕೇಚಿತ್ಪ್ರಾಹುರ್ವಪುರಕುಲಮನ್ಯೇ ತವ ಬುಧಾಃ ಪರೇ ತತ್ಸಂಭೇದಂ ಸಮಭಿದಧತೇ ಕೌಲಮಪರೇ । ಚತುರ್ಣಾಮಪ್ಯೇಷಾಮುಪರಿ ಕಿಮಪಿ ಪ್ರಾಹುರಪರೇ ಮಹಾಮಾಯೇ ತತ್ತ್ವಂ ತವ ಕಥಮಮೀ ನಿಶ್ಚಿನುಮಹೇ ॥ 10 ॥ ಷಡಧ್ವಾರಣ್ಯಾನೀಂ ಪ್ರಲಯರವಿಕೋಟಿಪ್ರತಿರುಚಾ ರುಚಾ ಭಸ್ಮೀಕೃತ್ಯ ಸ್ವಪದಕಮಲಪ್ರಹ್ವಶಿರಸಾಂ । ವಿತನ್ವಾನಃ ಶೈವಂ ಕಿಮಪಿ ವಪುರಿಂದೀವರರುಚಿಃ ಕುಚಾಭ್ಯಾಮಾನಮ್ರಸ್ತವ ಪುರುಷಕಾರೋ ವಿಜಯತೇ ॥ 11 ॥ ಪ್ರಕಾಶಾನಂದಾಭ್ಯಾಮವಿದಿತಚರೀಂ ಮಧ್ಯಪದವೀಂ ಪ್ರವಿಶ್ಯೈತದ್ದ್ವಂದ್ವಂ ರವಿಶಶಿಸಮಾಖ್ಯಂ ಕಬಲಯನ್ । ಪ್ರಪದ್ಯೋರ್ಧ್ವಂ ನಾದಂ ಲಯದಹನಭಸ್ಮೀಕೃತಕುಲಃ ಪ್ರಸಾದಾತ್ತೇ ಜಂತುಃ ಶಿವಮಕುಲಮಂಬ ಪ್ರವಿಶತಿ ॥ 12 ॥ ಮನುಷ್ಯಾಸ್ತಿರ್ಯಂಚೋ ಮರುತ ಇತಿ ಲೋಕತ್ರಯಮಿದಂ ಭವಾಂಭೋಧೌ ಮಗ್ನಂ ತ್ರಿಗುಣಲಹರೀಕೋಟಿಲುಠಿತಂ । ಕಟಾಕ್ಷಶ್ಚೇದ್ಯತ್ರ ಕ್ವಚನ ತವ ಮಾತಃ ಕರುಣಯಾ ಶರೀರೀ ಸದ್ಯೋಽಯಂ ವ್ರಜತಿ ಪರಮಾನಂದತನುತಾಂ ॥ 13 ॥ ಪ್ರಿಯಂಗುಶ್ಯಾಮಾಂಗೀಮರುಣತರವಾಸಂ ಕಿಸಲಯಾಂ ಸಮುನ್ಮೀಲನ್ಮುಕ್ತಾಫಲವಹಲನೇಪಥ್ಯಸುಭಗಾಂ । ಸ್ತನದ್ವಂದ್ವಸ್ಫಾರಸ್ತಬಕನಮಿತಾಂ ಕಲ್ಪಲತಿಕಾಂ ಸಕೃದ್ಧ್ಯಾಯಂತಸ್ತ್ವಾಂ ದಧತಿ ಶಿವಚಿಂತಾಮಣಿಪದಂ ॥ 14 ॥ ಷಡಾಧಾರಾವರ್ತೈರಪರಿಮಿತಮಂತ್ರೋರ್ಮಿಪಟಲೈಃ ಲಸನ್ಮುದ್ರಾಫೇನೈರ್ಬಹುವಿಧಲಸದ್ದೈವತಝಷೈಃ । ಕ್ರಮಸ್ರೋತೋಭಿಸ್ತ್ವಂ ವಹಸಿ ಪರನಾದಾಮೃತನದೀ ಭವಾನಿ ಪ್ರತ್ಯಗ್ರಾ ಶಿವಚಿದಮೃತಾಬ್ಧಿಪ್ರಣಯಿನೀ ॥ 15 ॥ ಮಹೀಪಾಥೋವಹ್ನಿಶ್ವಸನವಿಯದಾತ್ಮೇಂದುರವಿಭಿ- -ರ್ವಪುರ್ಭಿಗ್ರಸ್ತಾಶೈರಪಿ ತವ ಕಿಯಾನಂಬ ಮಹಿಮಾ । ಅಮೂನ್ಯಾಲೋಕ್ಯಂತೇ ಭಗವತಿ ನ ಕುತ್ರಾಪ್ಯಣುತಮಾ- -ಮವಸ್ಥಾಂ ಪ್ರಾಪ್ತಾನಿ ತ್ವಯಿ ತು ಪರಮವ್ಯೋಮವಪುಷಿ ॥ 16 ॥ ಕಲಾಮಾಜ್ಞಾಂ ಪ್ರಜ್ಞಾಂ ಸಮಯಮನುಭೂತಿಂ ಸಮರಸಂ ಗುರುಂ ಪಾರಂಪರ್ಯಂ ವಿನಯಮುಪದೇಶಂ ಶಿವಪದಂ । ಪ್ರಮಾಣಂ ನಿರ್ವಾಣಂ ಪ್ರಕೃತಿಮಭಿಭೂತಿಂ ಪರಗುಹಾಂ ವಿಧಿಂ ವಿದ್ಯಾಮಾಹುಃ ಸಕಲಜನನೀಮೇವ ಮುನಯಃ ॥ 17 ॥ ಪ್ರಲೀನೇ ಶಬ್ದೌಘೇ ತದನು ವಿರತೇ ಬಿಂದುವಿಭವೇ ತತಸ್ತತ್ತ್ವೇ ಚಾಷ್ಟಧ್ವನಿಭಿರನಪಾಯಿನ್ಯಧಿಗತೇ । ಶ್ರಿತೇ ಶಾಕ್ತೇ ಪರ್ವಣ್ಯನುಕಲಿತಚಿನ್ಮಾತ್ರ ಗಹನಾಂ ಸ್ವಸಂವಿತ್ತಿಂ ಯೋಗೀ ರಸಯತಿ ಶಿವಾಖ್ಯಾಂ ಭಗವತೀಂ ॥ 18 ॥ ಪರಾನಂದಾಕಾರಾಂ ನಿರವಧಿಶಿವೈಶ್ವರ್ಯವಪುಷಂ ನಿರಾಕಾರಾಂ ಜ್ಞಾನಪ್ರಕೃತಿಮಪರಿಚ್ಛಿನ್ನಕರುಣಾಂ । ಸವಿತ್ರೀಂ ಲೋಕಾನಾಂ ನಿರತಿಶಯಧಾಮಾಸ್ಪದಪದಾಂ ಭವೋ ವಾ ಮೋಕ್ಷೋ ವಾ ಭವತು ಭವತೀಮೇವ ಭಜತಾಂ ॥ 19 ॥ ಜಗತ್ಕಾಯೇ ಕೃತ್ವಾ ತದಪಿ ಹೃದಯೇ ತಚ್ಚ ಪುರುಷೇ ಪುಮಾಂಸಂ ಬಿಂದುಸ್ಥಂ ತದಪಿ ವಿಯದಾಖ್ಯೇ ಚ ಗಹನೇ । ತದೇತದ್ಜ್ಞಾನಾಖ್ಯೇ ತದಪಿ ಪರಮಾನಂದಗಹನೇ ಮಹಾವ್ಯೋಮಾಕಾರೇ ತ್ವದನುಭವಶೀಲೋ ವಿಜಯತೇ ॥ 20 ॥ ವಿಧೇ ವೇದ್ಯೇ ವಿದ್ಯೇ ವಿವಿಧಸಮಯೇ ವೇದಗುಲಿಕೇ ವಿಚಿತ್ರೇ ವಿಶ್ವಾದ್ಯೇ ವಿನಯಸುಲಭೇ ವೇದಜನನಿ । ಶಿವಜ್ಞೇ ಶೂಲಸ್ಥೇ ಶಿವಪದವದಾನ್ಯೇ ಶಿವನಿಧೇ ಶಿವೇ ಮಾತರ್ಮಹ್ಯಂ ತ್ವಯಿ ವಿತರ ಭಕ್ತಿಂ ನಿರುಪಮಾಂ ॥ 21 ॥ ವಿಧೇರ್ಮುಂಡಂ ಹೃತ್ವಾ ಯದಕುರುತ ಪಾತ್ರಂ ಕರತಲೇ ಹರಿಂ ಶೂಲಪ್ರೋತಂ ಯದಗಮಯದಂಸಾಭರಣತಾಂ । ಅಲಂಚಕ್ರೇ ಕಂಠಂ ಯದಪಿ ಗರಲೇನಾಂಬ ಗಿರಿಶಃ ಶಿವಸ್ಥಾಯಾಃ ಶಕ್ತೇಸ್ತದಿದಮಖಿಲಂ ತೇ ವಿಲಸಿತಂ ॥ 22 ॥ ವಿರಿಂಚ್ಯಾಖ್ಯಾ ಮಾತಃ ಸೃಜಸಿ ಹರಿಸಂಜ್ಞಾ ತ್ವಮವಸಿ ತ್ರಿಲೋಕೀಂ ರುದ್ರಾಖ್ಯಾ ಹರಸಿ ವಿದಧಾಸೀಶ್ವರದಶಾಂ । ಭವಂತೀ ನಾದಾಖ್ಯಾ ವಿಹರಸಿ ಚ ಪಾಶೌಘದಲನೀ ತ್ವಮೇವೈಕಾಽನೇಕಾ ಭವಸಿ ಕೃತಿಭೇದೈರ್ಗಿರಿಸುತೇ ॥ 23 ॥ ಮುನೀನಾಂ ಚೇತೋಭಿಃ ಪ್ರಮೃದಿತಕಷಾಯೈರಪಿ ಮನಾ- -ಗಶಕ್ಯಂ ಸಂಸ್ಪ್ರಷ್ಟುಂ ಚಕಿತಚಕಿತೈರಂಬ ಸತತಂ । ಶ್ರುತೀನಾಂ ಮೂರ್ಧಾನಃ ಪ್ರಕೃತಿಕಠಿನಾಃ ಕೋಮಲತರೇ ಕಥಂ ತೇ ವಿಂದಂತೇ ಪದಕಿಸಲಯೇ ಪಾರ್ವತಿ ಪದಂ ॥ 24 ॥ ತಟಿದ್ವಲ್ಲೀಂ ನಿತ್ಯಾಮಮೃತಸರಿತಂ ಪಾರರಹಿತಾಂ ಮಲೋತ್ತೀರ್ಣಾಂ ಜ್ಯೋತ್ಸ್ನಾಂ ಪ್ರಕೃತಿಮಗುಣಗ್ರಂಥಿಗಹನಾಂ । ಗಿರಾಂ ದೂರಾಂ ವಿದ್ಯಾಮವಿನತಕುಚಾಂ ವಿಶ್ವಜನನೀ- -ಮಪರ್ಯಂತಾಂ ಲಕ್ಷ್ಮೀಮಭಿದಧತಿ ಸಂತೋ ಭಗವತೀಂ ॥ 25 ॥ ಶರೀರಂ ಕ್ಷಿತ್ಯಂಭಃ ಪ್ರಭೃತಿರಚಿತಂ ಕೇವಲಮಚಿತ್ ಸುಖಂ ದುಃಖಂ ಚಾಯಂ ಕಲಯತಿ ಪುಮಾಂಶ್ಚೇತನ ಇತಿ । ಸ್ಫುಟಂ ಜಾನಾನೋಽಪಿ ಪ್ರಭವತಿ ನ ದೇಹೀ ರಹಯಿತುಂ ಶರೀರಾಹಂಕಾರಂ ತವ ಸಮಯಬಾಹ್ಯೋ ಗಿರಿಸುತೇ ॥ 26 ॥ ಪಿತಾ ಮಾತಾ ಭ್ರಾತಾ ಸುಹೃದನುಚರಃ ಸದ್ಮ ಗೃಹಿಣೀ ವಪುಃ ಕ್ಷೇತ್ರಂ ಮಿತ್ರಂ ಧನಮಪಿ ಯದಾ ಮಾಂ ವಿಜಹತಿ । ತದಾ ಮೇ ಭಿಂದಾನಾ ಸಪದಿ ಭಯಮೋಹಾಂಧತಮಸಂ ಮಹಾಜ್ಯೋತ್ಸ್ನೇ ಮಾತರ್ಭವ ಕರುಣಯಾ ಸನ್ನಿಧಿಕರೀ ॥ 27 ॥ ಸುತಾ ದಕ್ಷಸ್ಯಾದೌ ಕಿಲ ಸಕಲಮಾತಸ್ತ್ವಮುದಭೂಃ ಸದೋಷಂ ತಂ ಹಿತ್ವಾ ತದನು ಗಿರಿರಾಜಸ್ಯ ದುಹಿತಾ । ಅನಾದ್ಯಂತಾ ಶಂಭೋರಪೃಥಗಪಿ ಶಕ್ತಿರ್ಭಗವತೀ ವಿವಾಹಾಜ್ಜಾಯಾಸೀತ್ಯಹಹ ಚರಿತಂ ವೇತ್ತಿ ತವ ಕಃ ॥ 28 ॥ ಕಣಾಸ್ತ್ವದ್ದೀಪ್ತೀನಾಂ ರವಿಶಶಿಕೃಶಾನುಪ್ರಭೃತಯಃ ಪರಂ ಬ್ರಹ್ಮ ಕ್ಷುದ್ರಂ ತವ ನಿಯತಮಾನಂದಕಣಿಕಾ । ಶಿವಾದಿ ಕ್ಷಿತ್ಯಂತಂ ತ್ರಿವಲಯತನೋಃ ಸರ್ವಮುದರೇ ತವಾಸ್ತೇ ಭಕ್ತಸ್ಯ ಸ್ಫುರಸಿ ಹೃದಿ ಚಿತ್ರಂ ಭಗವತಿ ॥ 29 ॥ ಪುರಃ ಪಶ್ಚಾದಂತರ್ಬಹಿರಪರಿಮೇಯಂ ಪರಿಮಿತಂ ಪರಂ ಸ್ಥೂಲಂ ಸೂಕ್ಷ್ಮಂ ಸಕಲಮಕುಲಂ ಗುಹ್ಯಮಗುಹಂ । ದವೀಯೋ ನೇದೀಯಃ ಸದಸದಿತಿ ವಿಶ್ವಂ ಭಗವತೀ ಸದಾ ಪಶ್ಯಂತ್ಯಾಖ್ಯಾಂ ವಹಸಿ ಭುವನಕ್ಷೋಭಜನನೀಂ ॥ 30 ॥ ಪ್ರವಿಶ್ಯ ತ್ವನ್ಮಾರ್ಗಂ ಸಹಜದಯಯಾ ದೇಶಿಕದೃಶಾ ಷಡಧ್ವಧ್ವಾಂತೌಘಚ್ಛಿದುರಗಣನಾತೀತಕರುಣಾಂ । ಪರಾಮಾಜ್ಞಾಕಾರಾಂ ಸಪದಿ ಶಿವಯಂತೀಂ ಶಿವತನುಂ ಸ್ವಮಾತ್ಮಾನಂ ಧನ್ಯಾಶ್ಚಿರಮುಪಲಭಂತೇ ಭಗವತೀಂ ॥ 31 ॥ ಮಯೂಖಾಃ ಪೂಷ್ಣೀವ ಜ್ವಲನ ಇವ ತದ್ದೀಪ್ತಿಕಣಿಕಾಃ ಪಯೋಧೌ ಕಲ್ಲೋಲಾಃ ಪ್ರತಿಹತಮಹಿಮ್ನೀವ ಪೃಷತಃ । ಉದೇತ್ಯೋದೇತ್ಯಾಂಬ ತ್ವಯಿ ಸಹ ನಿಜೈಃ ಸಾತ್ತ್ವಿಕಗುಣೈ- -ರ್ಭಜಂತೇ ತತ್ತ್ವೌಘಾಃ ಪ್ರಶಮಮನುಕಲ್ಪಂ ಪರವಶಾಃ ॥ 32 ॥ ವಿಧುರ್ವಿಷ್ಣುರ್ಬ್ರಹ್ಮಾ ಪ್ರಕೃತಿರಣುರಾತ್ಮಾ ದಿನಕರಃ ಸ್ವಭಾವೋ ಜೈನೇಂದ್ರಃ ಸುಗತಮುನಿರಾಕಾಶಮಲಿನಃ । ಶಿವಃ ಶಕ್ತಿಶ್ಚೇತಿ ಶ್ರುತಿವಿಷಯತಾಂ ತಾಮುಪಗತಾಂ ವಿಕಲ್ಪೈರೇಭಿಸ್ತ್ವಾಮಭಿದಧತಿ ಸಂತೋ ಭಗವತೀಂ ॥ 33 ॥ ಶಿವಸ್ತ್ವಂ ಶಕ್ತಿಸ್ತ್ವಂ ತ್ವಮಸಿ ಸಮಯಾ ತ್ವಂ ಸಮಯಿನೀ ತ್ವಮಾತ್ಮಾ ತ್ವಂ ದೀಕ್ಷಾ ತ್ವಮಯಮಣಿಮಾದಿರ್ಗುಣಗಣಃ । ಅವಿದ್ಯಾ ತ್ವಂ ವಿದ್ಯಾ ತ್ವಮಸಿ ನಿಖಿಲಂ ತ್ವಂ ಕಿಮಪರಂ ಪೃಥಕ್ತತ್ತ್ವಂ ತ್ವತ್ತೋ ಭಗವತಿ ನ ವೀಕ್ಷಾಮಹ ಇಮೇ ॥ 34 ॥ ತ್ವಯಾಸೌ ಜಾನೀತೇ ರಚಯತಿ ಭವತ್ಯೈವ ಸತತಂ ತ್ವಯೈವೇಚ್ಛತ್ಯಂಬ ತ್ವಮಸಿ ನಿಖಿಲಾ ಯಸ್ಯ ತನವಃ । ಜಗತ್ಸಾಮ್ಯಂ ಶಂಭೋರ್ವಹಸಿ ಪರಮವ್ಯೋಮವಪುಷಃ ತಥಾಪ್ಯರ್ಧಂ ಭೂತ್ವಾ ವಿಹರಸಿ ಶಿವಸ್ಯೇತಿ ಕಿಮಿದಂ ॥ 35 ॥ ಅಸಂಖ್ಯೈಃ ಪ್ರಾಚೀನೈರ್ಜನನಿ ಜನನೈಃ ಕರ್ಮವಿಲಯಾ- -ತ್ಸಕೃಜ್ಜನ್ಮನ್ಯಂತೇ ಗುರುವಪುಷಮಾಸಾದ್ಯ ಗಿರಿಶಂ । ಅವಾಪ್ಯಾಜ್ಞಾಂ ಶೈವೀಂ ಶಿವತನುಮಪಿ ತ್ವಾಂ ವಿದಿತವಾ- -ನ್ನಯೇಯಂ ತ್ವತ್ಪೂಜಾಸ್ತುತಿವಿರಚನೇನೈವ ದಿವಸಾನ್ ॥ 36 ॥ ಯತ್ಷಟ್ಪತ್ರಂ ಕಮಲಮುದಿತಂ ತಸ್ಯ ಯಾ ಕರ್ಣಿಕಾಖ್ಯಾ ಯೋನಿಸ್ತಸ್ಯಾಃ ಪ್ರಥಿತಮುದರೇ ಯತ್ತದೋಂಕಾರಪೀಠಂ । ತಸ್ಯಾಪ್ಯಂತಃ ಕುಚಭರನತಾಂ ಕುಂಡಲೀತಿ ಪ್ರಸಿದ್ಧಾಂ ಶ್ಯಾಮಾಕಾರಾಂ ಸಕಲಜನನೀಂ ಸಂತತಂ ಭಾವಯಾಮಿ ॥ 37 ॥ ಭುವಿ ಪಯಸಿ ಕೃಶಾನೌ ಮಾರುತೇ ಖೇ ಶಶಾಂಕೇ ಸವಿತರಿ ಯಜಮಾನೇಽಪ್ಯಷ್ಟಧಾ ಶಕ್ತಿರೇಕಾ । ವಹಸಿ ಕುಚಭರಾಭ್ಯಾಂ ಯಾವನಮ್ರಾಪಿ ವಿಶ್ವಂ ಸಕಲಜನನಿ ಸಾ ತ್ವಂ ಪಾಹಿ ಮಾಮಿತ್ಯವಾಚ್ಯಂ ॥ 38 ॥ ಇತಿ ಶ್ರೀಕಾಲಿದಾಸ ವಿರಚಿತ ಪಂಚಸ್ತವ್ಯಾಂ ಪಂಚಮಃ ಸಕಲಜನನೀಸ್ತವಃ ।