oṅkārarūpiṇī devi viśuddhasattvarūpiṇī । devānāṃ jananī tvaṃ hi prasannā bhava sundari ॥ 1 ॥ tanmātraṃ caiva bhūtāni tava vakṣaḥsthalaṃ smṛtam । tvameva vedagamyā tu prasannā bhava sundari ॥ 2 ॥ deva dānava gandharva yakṣa rākṣasa kinnaraiḥ । stūyase tvaṃ sadā lakṣmi prasannā bhava sundari ॥ 3 ॥ lokātītā dvaitātītā samastabhūtaveṣṭitā । vidvajjanakīrtitā ca prasannā bhava sundari ॥ 4 ॥ paripūrṇā sadā lakṣmi trātrī tu śaraṇārthiṣu । viśvādyā viśvakartrī ca prasannā bhava sundari ॥ 5 ॥ brahmarūpā ca sāvitrī tvaddīptyā bhāsate jagat । viśvarūpā vareṇyā ca prasannā bhava sundari ॥ 6 ॥ kṣityaptejomarudvomapañcabhūtasvarūpiṇī । bandhādeḥ kāraṇaṃ tvaṃ hi prasannā bhava sundari ॥ 7 ॥ maheśe tvaṃ haimavatī kamalā keśave'pi ca । brahmaṇaḥ preyasī tvaṃ hi prasannā bhava sundari ॥ 8 ॥ caṇḍī durgā kālikā ca kauśikī siddhirūpiṇī । yoginī yogagamyā ca prasannā bhava sundari ॥ 9 ॥ bālye ca bālikā tvaṃ hi yauvane yuvatīti ca । sthavire vṛddharūpā ca prasannā bhava sundari ॥ 10 ॥ guṇamayī guṇātītā ādyā vidyā sanātanī । mahattattvādisamyuktā prasannā bhava sundari ॥ 11 ॥ tapasvinī tapaḥ siddhiḥ svargasiddhistadarthiṣu । cinmayī prakṛtistvaṃ tu prasannā bhava sundari ॥ 12 ॥ tvamādirjagatāṃ devi tvameva sthitikāraṇam । tvamante nidhanasthānaṃ svecchācārā tvameva hi ॥ 13 ॥ carācarāṇāṃ bhūtānāṃ bahirantastvameva hi । vyāpyavyāpakarūpeṇa tvaṃ bhāsi bhaktavatsale ॥ 14 ॥ tvanmāyayā hṛtajñānā naṣṭātmāno vicetasaḥ । gatāgataṃ prapadyante pāpapuṇyavaśātsadā ॥ 15 ॥ tāvatsatyaṃ jagadbhāti śuktikārajataṃ yathā । yāvanna jñāyate jñānaṃ cetasā nānvagāminī ॥ 16 ॥ tvajjñānāttu sadā yuktaḥ putradāragṛhādiṣu । ramante viṣayān sarvānante duḥkhapradān dhruvam ॥ 17 ॥ tvadājñayā tu deveśi gagane sūryamaṇḍalam । candraśca bhramate nityaṃ prasannā bhava sundari ॥ 18 ॥ brahmeśaviṣṇujananī brahmākhyā brahmasaṃśrayā । vyaktā'vyaktā ca deveśi prasannā bhava sundari ॥ 19 ॥ acalā sarvagā tvaṃ hi māyātītā maheśvari । śivātmā śāśvatā nityā prasannā bhava sundari ॥ 20 ॥ sarvakāryaniyantrī ca sarvabhūteśvareśvarī । anantā niṣkālā tvaṃ hi prasannā bhavasundari ॥ 21 ॥ sarveśvarī sarvavandyā acintyā paramātmikā । bhuktimuktipradā tvaṃ hi prasannā bhava sundari ॥ 22 ॥ brahmāṇī brahmaloke tvaṃ vaikuṇṭhe sarvamaṅgalā । indrāṇī amarāvatyāmambikā varuṇālaye ॥ 23 ॥ yamālaye kālarūpā kuberabhavane śubhā । mahānandāgnikoṇe ca prasannā bhava sundari ॥ 24 ॥ nairṛtyāṃ raktadantā tvaṃ vāyavyāṃ mṛgavāhinī । pātāle vaiṣṇavīrūpā prasannā bhava sundari ॥ 25 ॥ surasā tvaṃ maṇidvīpe aiśānyāṃ śūladhāriṇī । bhadrakālī ca laṅkāyāṃ prasannā bhava sundari ॥ 26 ॥ rāmeśvarī setubandhe siṃhale devamohinī । vimalā tvaṃ ca śrīkṣetre prasannā bhava sundari ॥ 27 ॥ kālikā tvaṃ kālighaṭṭe kāmākhyā nīlaparvate । virajā auḍradeśe tvaṃ prasannā bhava sundari ॥ 28 ॥ vārāṇasyāmannapūrṇā ayodhyāyāṃ maheśvarī । gayāsurī gayādhāmni prasannā bhava sundari ॥ 29 ॥ bhadrakālī kurukṣetre kṛṣṇa kātyāyanī vraje । mahāmāyā dvārakāyāṃ prasannā bhava sundari ॥ 30 ॥ kṣudhā tvaṃ sarvajīvānāṃ velā ca sāgarasya hi । maheśvarī mathurāyāṃ prasannā bhava sundari ॥ 31 ॥ rāmasya jānakī tvaṃ ca śivasya manamohinī । dakṣasya duhitā caiva prasannā bhava sundari ॥ 32 ॥ viṣṇubhaktipradā tvaṃ ca kaṃsāsura vināśinī । rāvaṇanāśinī caiva prasannā bhava sundari ॥ 33 ॥ lakṣmīstotramidaṃ puṇyaṃ yaḥ paṭhedbhaktisamyutaḥ । sarvajvarabhayaṃ naśyet sarvavyādhinivāraṇam ॥ 34 ॥ idaṃ stotraṃ mahāpuṇyamāpaduddhārakāraṇam । trisandhyamekasandhyaṃ vā yaḥ paṭhet satataṃ naraḥ ॥ 35 ॥ mucyate sarvapāpebhyastathā tu sarvasaṅkaṭāt । mucyate nātra sandeho bhuvi svarge rasātale ॥ 36 ॥ samastaṃ ca tathā caikaṃ yaḥ paṭhedbhaktitatparaḥ । sa sarvaduṣkaraṃ tīrtvā labhate paramāṃ gatim ॥ 37 ॥ sukhadaṃ mokṣadaṃ stotraṃ yaḥ paṭhedbhaktisamyutaḥ । sa tu koṭitīrthaphalaṃ prāpnoti nātra saṃśayaḥ ॥ 38 ॥ ekā devī tu kamalā yasmiṃstuṣṭā bhavetsadā । tasyā'sādhyaṃ tu deveśi nāstikiñcijjagattraye ॥ 39 ॥ paṭhanādapi stotrasya kiṃ na siddhyati bhūtale । tasmāt stotravaraṃ proktaṃ satyaṃ satyaṃ hi pārvati ॥ 40 ॥ iti śrī kamalā stotram ।