śrīpārvatyuvāca । devadeva mahādeva sṛṣṭisaṃhārakāraka । mātaṅgyāḥ kavacaṃ brūhi yadi sneho'sti te mayi ॥ 1 ॥ śiva uvāca । atyantagopanaṃ guhyaṃ kavacaṃ sarvakāmadam । tava prītyā mayā''khyātaṃ nānyeṣu kathyate śubhe ॥ 2 ॥ śapathaṃ kuru me devi yadi kiñcitprakāśase । anayā sadṛśī vidyā na bhūtā na bhaviṣyati ॥ 3 ॥ dhyānam । śavāsanāṃ raktavastrāṃ yuvatīṃ sarvasiddhidām । evaṃ dhyātvā mahādevīṃ paṭhetkavacamuttamam ॥ 4 ॥ kavacam । ucchiṣṭaṃ rakṣatu śiraḥ śikhāṃ caṇḍālinī tataḥ । sumukhī kavacaṃ rakṣeddevī rakṣatu cakṣuṣī ॥ 5 ॥ mahāpiśācinī pāyānnāsikāṃ hrīṃ sadā'vatu । ṭhaḥ pātu kaṇṭhadeśaṃ me ṭhaḥ pātu hṛdayaṃ tathā ॥ 6 ॥ ṭho bhujau bāhumūle ca sadā rakṣatu caṇḍikā । aiṃ ca rakṣatu pādau me sauḥ kukṣiṃ sarvataḥ śivā ॥ 7 ॥ aiṃ hrīṃ kaṭideśaṃ ca āṃ hrīṃ sandhiṣu sarvadā । jyeṣṭhamātaṅgyaṅgulīrme aṅgulyagre namāmi ca ॥ 8 ॥ ucchiṣṭacāṇḍāli māṃ pātu trailokyasya vaśaṅkarī । śive svāhā śarīraṃ me sarvasaubhāgyadāyinī ॥ 9 ॥ ucchiṣṭacāṇḍāli mātaṅgi sarvavaśaṅkari namaḥ । svāhā stanadvayaṃ pātu sarvaśatruvināśinī ॥ 10 ॥ atyantagopanaṃ devi devairapi sudurlabham । bhraṣṭebhyaḥ sādhakebhyo'pi draṣṭavyaṃ na kadācana ॥ 11 ॥ dattena siddhihāniḥ syātsarvathā na prakāśyatām । ucchiṣṭena baliṃ datvā śanau vā maṅgale niśi ॥ 12 ॥ rajasvalābhagaṃ spṛṣṭvā japenmantraṃ ca sādhakaḥ । rajasvalāyā vastreṇa homaṃ kuryātsadā sudhīḥ ॥ 13 ॥ siddhavidyā ito nāsti niyamo nāsti kaścana । aṣṭasahasraṃ japenmantraṃ daśāṃśaṃ havanādikam ॥ 14 ॥ bhūrjapatre likhitvā ca raktasūtreṇa veṣṭayet । prāṇapratiṣṭhāmantreṇa jīvanyāsaṃ samācaret ॥ 15 ॥ svarṇamadhye tu saṃsthāpya dhārayeddakṣiṇe kare । sarvasiddhirbhavettasya acirātputravānbhavet ॥ 16 ॥ strībhirvāmakare dhāryaṃ bahuputrā bhavettadā । vandhyā vā kākavandhyā vā mṛtavatsā ca sāṅganā ॥ 17 ॥ jīvadvatsā bhavetsāpi samṛddhirbhavati dhruvam । śaktipūjāṃ sadā kuryācchivābaliṃ pradāpayet ॥ 18 ॥ idaṃ kavacamajñātvā mātaṅgī yo japetsadā । tasya siddhirna bhavati puraścaraṇalakṣataḥ ॥ 19 ॥ iti śrī rudrayāmalatantre mātaṅgī sumukhī kavacam ।