sūta uvāca – śṛṇudhvaṃ munayaḥ sarve gaṅgāstavamanuttamam । śokamohaharaṃ puṃsāmṛṣibhiḥ parikīrtitam ॥ 1 ॥ ṛṣaya ūcuḥ – iyaṃ surataraṅgiṇī bhavanavāridhestāriṇī stutā haripadāmbujādupagatā jagatsaṃsadaḥ । sumeruśikharāmarapriyajalāmalakṣālinī prasannavadanā śubhā bhavabhayasya vidrāviṇī ॥ 2 ॥ bhagīratharathānugā surakarīndradarpāpahā maheśamukuṭaprabhā giriśiraḥpatākā sitā । surāsuranaroragairajabhavācyutaiḥ saṃstutā vimuktiphalaśālinī kaluṣanāśinī rājate ॥ 3 ॥ pitāmahakamaṇḍaluprabhavamuktibījā latā śrutismṛtigaṇastutadvijakulālavālāvṛtā । sumeruśikharābhidā nipatitā trilokāvṛtā sudharmaphalaśālinī sukhapalāśinī rājate ॥ 4 ॥ caradvihagamālinī sagaravaṃśamuktipradā munīndravaranandinī divi matā ca mandākinī । sadā duritanāśinī vimalavārisandarśana- praṇāmaguṇakīrtanādiṣu jagatsu saṃrājate ॥ 5 ॥ mahābhiṣasutāṅganā himagirīśakūṭastanā saphenajalahāsinī sitamarālasañcāriṇī । calallaharisatkarā varasarojamālādharā rasollasitagāminī jaladhikāminī rājate ॥ 6 ॥ kvacinmunigaṇaiḥ stutā kvacidanantasampūjitā kvacitkalakalasvanā kvacidadhīrayādogaṇā । kvacidravikarojjvalā kvacidudagrapātākulā kvacijjanavigāhitā jayati bhīṣmamātā satī ॥ 7 ॥ sa eva kuśalī janaḥ praṇamatīha bhāgīrathīṃ sa eva tapasāṃ nidhirjapati jāhnavīmādarāt । sa eva puruṣottamaḥ smarati sādhu mandākinīṃ sa eva vijayī prabhuḥ surataraṅgiṇīṃ sevate ॥ 8 ॥ tavāmalajalācitaṃ khagasṛgālamīnakṣataṃ calallaharilolitaṃ ruciratīrajambhālitam । kadā nijavapurmudā suranaroragaiḥ saṃstuto'pyahaṃ tripathagāmini priyamatīva paśyāmyaho ॥ 9 ॥ tvattīre vasatiṃ tavāmalajalasnānaṃ tava prekṣaṇaṃ tvannāmasmaraṇaṃ tavodayakathāsaṃlāpanaṃ pāvanam । gaṅge me tava sevanaikanipuṇo'pyānanditaścādṛtaḥ stutvā codgatapātako bhuvi kadā śāntaścariṣyāmyaham ॥ 10 ॥ ityetadṛṣibhiḥ proktaṃ gaṅgāstavanamuttamam । svargyaṃ yaśasyamāyuṣyaṃ paṭhanācchravaṇādapi ॥ 11 ॥ sarvapāpaharaṃ puṃsāṃ balamāyurvivardhanam । prātarmadhyāhnasāyāhne gaṅgāsānnidhyatā bhavet ॥ 12 ॥ ityetadbhārgavākhyānaṃ śukadevānmayā śrutam । paṭhitaṃ śrāvitaṃ cātra puṇyaṃ dhanyaṃ yaśaskaram ॥ 13 ॥ avatāraṃ mahāviṣṇoḥ kalkeḥ paramamadbhutam । paṭhatāṃ śṛṇvatāṃ bhaktyā sarvāśubhavināśanam ॥ 14 ॥ iti śrī kalkipurāṇe gaṅgā stavaḥ ॥