śrīpārvatyuvāca । dhūmāvatyarcanaṃ śambho śrutaṃ vistarato mayā । kavacaṃ śrotumicchāmi tasyā deva vadasva me ॥ 1 ॥ śrībhairava uvāca । śṛṇu devi paraṃ guhyaṃ na prakāśyaṃ kalau yuge । kavacaṃ śrīdhūmāvatyāḥ śatrunigrahakārakam ॥ 2 ॥ brahmādyā devi satataṃ yadvaśādarighātinaḥ । yogino bhavacchatrughnā yasyā dhyānaprabhāvataḥ ॥ 3 ॥ oṃ asya śrīdhūmāvatīkavacasya pippalāda ṛṣiḥ anuṣṭup chandaḥ śrīdhūmāvatī devatā dhūṃ bījaṃ svāhā śaktiḥ dhūmāvatī kīlakaṃ śatruhanane pāṭhe viniyogaḥ । kavacam । oṃ dhūṃ bījaṃ me śiraḥ pātu dhūṃ lalāṭaṃ sadā'vatu । dhūmā netrayugaṃ pātu vatī karṇau sadā'vatu ॥ 4 ॥ dīrghā tūdaramadhye tu nābhiṃ me malināmbarā । śūrpahastā pātu guhyaṃ rūkṣā rakṣatu jānunī ॥ 5 ॥ mukhaṃ me pātu bhīmākhyā svāhā rakṣatu nāsikām । sarvavidyā'vatu kaṇṭhaṃ vivarṇā bāhuyugmakam ॥ 6 ॥ cañcalā hṛdayaṃ pātu dhṛṣṭā pārśve sadā'vatu । dhūmahastā sadā pātu pādau pātu bhayāvahā ॥ 7 ॥ pravṛddharomā tu bhṛśaṃ kuṭilā kuṭilekṣaṇā । kṣṛtpipāsārditā devī bhayadā kalahapriyā ॥ 8 ॥ sarvāṅgaṃ pātu me devī sarvaśatruvināśinī । iti te kathitaṃ puṇyaṃ kavacaṃ bhuvi durlabham ॥ 9 ॥ na prakāśyaṃ na prakāśyaṃ na prakāśyaṃ kalau yuge । paṭhanīyaṃ mahādevi trisandhyaṃ dhyānatatparaiḥ । duṣṭābhicāro deveśi tadgātraṃ naiva saṃspṛśet ॥ 10 ॥ iti bhairavībhairavasaṃvāde dhūmāvatī kavacaṃ sampūrṇam ।