వందే సిందూరవర్ణాభం వామోరున్యస్తవల్లభం । ఇక్షువారిధిమధ్యస్థమిభరాజముఖం మహః ॥ 1 ॥ గంభీరలహరీజాలగండూషితదిగంతరః । అవ్యాన్మామమృతాంభోధిరనర్ఘమణిసమ్యుతః ॥ 2 ॥ మధ్యే తస్య మనోహారి మధుపారవమేదురం । ప్రసూనవిగలన్మాధ్వీప్రవాహపరిపూరితం ॥ 3 ॥ కిన్నరీగానమేదస్వి క్రీడాకందరదంతురం । కాంచనద్రుమధూలీభిః కల్పితావాలవద్ద్రుమం ॥ 4 ॥ ముగ్ధకోకిలనిక్వాణముఖరీకృతదిఙ్ముఖం । మందారతరుసంతానమంజరీపుంజపింజరం ॥ 5 ॥ నాసానాడింధమస్మేరనమేరుసుమసౌరభం । ఆవృంతహసితాంభోజదీవ్యద్విభ్రమదీర్ఘికం ॥ 6 ॥ మందరక్తశుకీదష్టమాతులుంగఫలాన్వితం । సవిధస్యందమానాభ్రసరిత్కల్లోలవేల్లితం ॥ 7 ॥ ప్రసూనపాంసుసౌరభ్యపశ్యతోహరమారుతం । వకులప్రసవాకీర్ణం వందే నందనకాననం ॥ 8 ॥ తన్మధ్యే నీపకాంతారం తరణిస్తంభకారణం । మధుపాలివిమర్దాలికలక్వాణకరంబితం ॥ 9 ॥ కోమలశ్వశనాధూతకోరకోద్గతధూలిభిః । సిందూరితనభోమార్గం చింతితం సిద్ధవందిభిః ॥ 10 ॥ మధ్యే తస్య మరున్మార్గలంబిమాణిక్యతోరణం । శాణోల్లిఖితవైదూర్యక్లుప్తసాలసమాకులం ॥ 11 ॥ మాణిక్యస్తంభపటలీమయూఖవ్యాప్తదిక్తటం । పంచవింశతిసాలాఢ్యాం నమామి నగరోత్తమం ॥ 12 ॥ తత్ర చింతామణిగృహం తడిత్కోటిసముజ్జ్వలం । నీలోత్పలసమాకీర్ణనిర్యూహశతసంకులం ॥ 13 ॥ సోమకాంతమణిక్లుప్తసోపానోద్భాసివేదికం । చంద్రశాలాచరత్కేతుసమాలీఢనభోంతరం ॥ 14 ॥ గారుత్మతమణీక్లుప్తమండపవ్యూహమండితం । నిత్యసేవాపరామర్త్యనిబిడద్వారశోభితం ॥ 15 ॥ అధిష్ఠితం ద్వారపాలైరసితోమరపాణిభిః । నమామి నాకనారీణాం సాంద్రసంగీతమేదురం ॥ 16 ॥ తన్మధ్యే తరుణార్కాభం తప్తకాంచననిర్మితం । శక్రాదిమద్ద్వారపాలైః సంతతం పరివేష్టితం ॥ 17 ॥ చతుష్షష్టిమహావిద్యాకలాభిరభిసంవృతం । రక్షితం యోగినీబృందై రత్నసింహాసనం భజే ॥ 18 ॥ మధ్యే తస్య మరుత్సేవ్యం చతుర్ద్వారసముజ్జ్వలం । చతురస్రత్రిరేఖాఢ్యాం చారుత్రివలయాన్వితం ॥ 19 ॥ కలాదలసమాయుక్తం కనదష్టదలాన్వితం । చతుర్దశారసహితం దశారద్వితయాన్వితం ॥ 20 ॥ అష్టకోణయుతం దివ్యమగ్నికోణవిరాజితం । యోగిభిః పూజితం యోగియోగినీగణసేవితం ॥ 21 ॥ సర్వదుఃఖప్రశమనం సర్వవ్యాధివినాశనం । విషజ్వరహరం పుణ్యం వివిధాపద్విదారణం ॥ 22 ॥ సర్వదారిద్ర్యశమనం సర్వభూపాలమోహనం । ఆశాభిపూరకం దివ్యమర్చకానామహర్నిశం ॥ 23 ॥ అష్టాదశసుమర్మాఢ్యం చతుర్వింశతిసంధినం । శ్రీమద్బిందుగృహోపేతం శ్రీచక్రం ప్రణమామ్యహం ॥ 24 ॥ తత్రైవ బైందవస్థానే తరుణాదిత్యసన్నిభం । పాశాంకుశధనుర్బాణపరిష్కృతకరాంబుజం ॥ 25 ॥ పూర్ణేందుబింబవదనం ఫుల్లపంకజలోచనం । కుసుమాయుధశృంగారకోదండకుటిలభ్రువం ॥ 26 ॥ చారుచంద్రకలోపేతం చందనాగురురూషితం । మందస్మితమధూకాలికింజల్కితముఖాంబుజం ॥ 27 ॥ పాటీరతిలకోద్భాసిఫాలస్థలమనోహరం । అనేకకోటికందర్పలావణ్యమరుణాధరం ॥ 28 ॥ తపనీయాంశుకధరం తారుణ్యశ్రీనిషేవితం । కామేశ్వరమహం వందే కామితార్థప్రదం నృణాం ॥ 29 ॥ తస్యాంకమధ్యమాసీనాం తప్తహాటకసన్నిభాం । మాణిక్యముకుటచ్ఛాయామండలారుణదిఙ్ముఖాం ॥ 30 ॥ కలవేణీకనత్ఫుల్లకహ్లారకుసుమోజ్జ్వలాం । ఉడురాజకృతోత్తంసాముత్పలశ్యామలాలకాం ॥ 31 ॥ చతుర్థీచంద్రసచ్ఛాత్రఫాలరేఖాపరిష్కృతాం । కస్తూరీతిలకారూఢకమనీయలలంతికాం ॥ 32 ॥ భ్రూలతాశ్రీపరాభూతపుష్పాయుధశరాసనాం । నాలీకదలదాయాదనయనత్రయశోభితాం ॥ 33 ॥ కరుణారససంపూర్ణకటాక్షహసితోజ్జ్వలాం । భవ్యముక్తామణిచారునాసామౌక్తికవేష్టితాం ॥ 34 ॥ కపోలయుగలీనృత్యకర్ణతాటంకశోభితాం । మాణిక్యవాలీయుగలీమయూఖారుణదిఙ్ముఖాం ॥ 35 ॥ పరిపక్వసుబింబాభాపాటలాధరపల్లవాం । మంజులాధరపర్వస్థమందస్మితమనోహరాం ॥ 36 ॥ ద్విఖండద్విజరాజాభగండద్వితయమండితాం । దరఫుల్లలసద్గండధవలాపూరితాననాం ॥ 37 ॥ పచేలిమేందుసుషమాపాటచ్చరముఖప్రభాం । కంధరాకాంతిహసితకంబుబింబోకడంబరాం ॥ 38 ॥ కస్తూరీకర్దమాశ్యామకంధరామూలకందరాం । వామాంసశిఖరోపాంతవ్యాలంబిఘనవేణికాం ॥ 39 ॥ మృణాలకాండదాయాదమృదుబాహుచతుష్టయాం । మణికేయూరయుగలీమయూఖారుణవిగ్రహాం ॥ 40 ॥ కరమూలలసద్రత్నకంకణక్వాణపేశలాం । కరకాంతిసమాధూతకల్పానోకహపల్లవాం ॥ 41 ॥ పద్మరాగోర్మికాశ్రేణిభాసురాంగులిపాలికాం । పుండ్రకోదండపుష్పాస్త్రపాశాంకుశలసత్కరాం ॥ 42 ॥ తప్తకాంచనకుంభాభస్తనమండలమండితాం । ఘనస్తనతటీక్లుప్తకాశ్మీరక్షోదపాటలాం ॥ 43 ॥ కూలంకషకుచస్ఫారతారహారవిరాజితాం । చారుకౌసుంభకూర్పాసచ్ఛన్నవక్షోజమండలాం ॥ 44 ॥ నవనీలఘనశ్యామరోమరాజివిరాజితాం । లావణ్యసాగరావర్తనిభనాభివిభూషితాం ॥ 45 ॥ డింభముష్టితలగ్రాహ్యమధ్యయష్టిమనోహరాం । నితంబమండలాభోగనిక్వణన్మణిమేఖలాం ॥ 46 ॥ సంధ్యారుణక్షౌమపటీసంఛన్నజఘనస్థలాం । ఘనోరుకాంతిహసితకదలీకాండవిభ్రమాం ॥ 47 ॥ జానుసంపుటకద్వంద్వజితమాణిక్యదర్పణాం । జంఘాయుగలసౌందర్యవిజితానంగకాహలాం ॥ 48 ॥ ప్రపదచ్ఛాయసంతానజితప్రాచీనకచ్ఛపాం । నీరజాసనకోటీరనిఘృష్టచరణాంబుజాం ॥ 49 ॥ పాదశోభాపరాభూతపాకారితరుపల్లవాం । చరణాంభోజశింజానమణిమంజీరమంజులాం ॥ 50 ॥ విబుధేంద్రవధూత్సంగవిన్యస్తపదపల్లవాం । పార్శ్వస్థభారతీలక్ష్మీపాణిచామరవీజితాం ॥ 51 ॥ పురతో నాకనారీణాం పశ్యంతీం నృత్తమద్భుతం । భ్రూలతాంచలసంభూతపుష్పాయుధపరంపరాం ॥ 52 ॥ ప్రత్యగ్రయౌవనోన్మత్తపరిఫుల్లవిలోచనాం । తామ్రోష్ఠీం తరలాపాంగీం సునాసాం సుందరస్మితాం ॥ 53 ॥ చతురర్థధ్రువోదారాం చాంపేయోద్గంధికుంతలాం । మధుస్నపితమృద్వీకమధురాలాపపేశలాం ॥ 54 ॥ శివాం షోడశవార్షీకాం శివాంకతలవాసినీం । చిన్మయీం హృదయాంభోజే చింతయేజ్జాపకోత్తమః ॥ 55 ॥ ఇతి త్రిపురసుందర్యా హృదయం సర్వకామదం । సర్వదారిద్ర్యశమనం సర్వసంపత్ప్రదం నృణాం ॥ 56 ॥ తాపజ్వరార్తిశమనం తరుణీజనమోహనం । మహావిషహరం పుణ్యం మాంగల్యకరమద్భుతం ॥ 57 ॥ అపమృత్యుహరం దివ్యమాయుష్యశ్రీకరం పరం । అపవర్గైకనిలయమవనీపాలవశ్యదం ॥ 58 ॥ పఠతి ధ్యానరత్నం యః ప్రాతః సాయమతంద్రితః । న విషాదైః స చ పుమాన్ ప్రాప్నోతి భువనత్రయం ॥ 59 ॥ ఇతి శ్రీమహాత్రిపురసుందరీహృదయం సంపూర్ణం ।