bhagavati tava tīre nīramātrāśano'ham vigataviṣayatṛṣṇaḥ kṛṣṇamārādhayāmi । sakala kaluṣabhaṃge svargasopānasaṃge taralatarataraṃge devi gaṃge prasīda ॥ 1 ॥ bhagavati bhavalīlā maulimāle tavāṃbhaḥ kaṇamaṇuparimāṇaṃ prāṇino ye spṛśaṃti । amaranagaranārī cāmara grāhiṇīnāṃ vigata kalikalaṃkātaṃkamaṃke luṭhaṃti ॥ 2 ॥ brahmāṃḍaṃ khaṃḍayaṃtī haraśirasi jaṭāvallimullāsayaṃtī svarlokādāpataṃtī kanakagiriguhāgaṃḍaśailāt skhalaṃtī । kṣoṇīpṛṣṭhe luṭhaṃtī duritacayacamūrnirbharaṃ bhartsayaṃtī pāthodhiṃ pūrayaṃtī suranagarasaritpāvanī naḥ punātu ॥ 3 ॥ majjanmātaṃga kuṃbhacyuta madamadirāmodamattālijālaṃ snānaiḥ siddhāṃganānāṃ kucayuga vilasatkuṃkumāsaṃgapiṃgam । sāyaṃ prātarmunīnāṃ kuśakusumacayaiśchinnatīrasthanīraṃ pāyānno gāṃgamaṃbhaḥ karikalabha karākrāṃta raṃgastaraṃgam ॥ 4 ॥ ādāvādi pitāmahasya niyama vyāpāra pātre jalaṃ paścātpannagaśāyino bhagavataḥ pādodakaṃ pāvanam । bhūyaḥ śaṃbhujaṭāvibhūṣaṇa maṇirjahnormaharṣeriyaṃ kanyā kalmaṣanāśinī bhagavatī bhāgīrathī dṛśyate ॥ 5 ॥ śaileṃdrādavatāriṇī nijajale majjajjanottāriṇī pārāvāravihāriṇī bhavabhayaśreṇī samutsāriṇī । śeṣāṃgairanukāriṇī haraśirovallīdalākāriṇī kāśīprāṃtavihāriṇī vijayate gaṃgā manohāriṇī ॥ 6 ॥ kuto vīcirvīcistava yadi gatā locanapathaṃ tvamāpītā pītāṃbarapuravāsaṃ vitarasi । tvadutsaṃge gaṃge patati yadi kāyastanubhṛtāṃ tadā mātaḥ śāṃtakratavapadalābho'pyatilaghuḥ ॥ 7 ॥ gaṃge trailokyasāre sakalasuravadhūdhautavistīrṇatoye pūrṇabrahmasvarūpe haricaraṇarajohāriṇi svargamārge । prāyaścitaṃ yadi syāttava jalakaṇikā brahmahatyādi pāpe kastvāṃ stotuṃ samarthaḥ trijagadaghahare devi gaṃge prasīda ॥ 8 ॥ mātarjāhnavī śaṃbhusaṃgamilite maulau nidhāyāṃjaliṃ tvattīre vapuṣo'vasānasamaye nārāyaṇāṃghridvayam । sānaṃdaṃ smarato bhaviṣyati mama prāṇaprayāṇotsave bhūyādbhaktiravicyutā hariharādvaitātmikā śāśvatī ॥ 9 ॥ gaṃgāṣṭakamidaṃ puṇyaṃ yaḥ paṭhetprayato naraḥ । sarvapāpavinirmukto viṣṇulokaṃ sa gacchati ॥ 10 ॥