vande sindūravarṇābhaṃ vāmorunyastavallabham । ikṣuvāridhimadhyasthamibharājamukhaṃ mahaḥ ॥ 1 ॥ gambhīralaharījālagaṇḍūṣitadigantaraḥ । avyānmāmamṛtāmbhodhiranarghamaṇisamyutaḥ ॥ 2 ॥ madhye tasya manohāri madhupāravameduram । prasūnavigalanmādhvīpravāhaparipūritam ॥ 3 ॥ kinnarīgānamedasvi krīḍākandaradanturam । kāñcanadrumadhūlībhiḥ kalpitāvālavaddrumam ॥ 4 ॥ mugdhakokilanikvāṇamukharīkṛtadiṅmukham । mandāratarusantānamañjarīpuñjapiñjaram ॥ 5 ॥ nāsānāḍindhamasmeranamerusumasaurabham । āvṛntahasitāmbhojadīvyadvibhramadīrghikam ॥ 6 ॥ mandaraktaśukīdaṣṭamātuluṅgaphalānvitam । savidhasyandamānābhrasaritkallolavellitam ॥ 7 ॥ prasūnapāṃsusaurabhyapaśyatoharamārutam । vakulaprasavākīrṇaṃ vande nandanakānanam ॥ 8 ॥ tanmadhye nīpakāntāraṃ taraṇistambhakāraṇam । madhupālivimardālikalakvāṇakarambitam ॥ 9 ॥ komalaśvaśanādhūtakorakodgatadhūlibhiḥ । sindūritanabhomārgaṃ cintitaṃ siddhavandibhiḥ ॥ 10 ॥ madhye tasya marunmārgalambimāṇikyatoraṇam । śāṇollikhitavaidūryakluptasālasamākulam ॥ 11 ॥ māṇikyastambhapaṭalīmayūkhavyāptadiktaṭam । pañcaviṃśatisālāḍhyāṃ namāmi nagarottamam ॥ 12 ॥ tatra cintāmaṇigṛhaṃ taḍitkoṭisamujjvalam । nīlotpalasamākīrṇaniryūhaśatasaṅkulam ॥ 13 ॥ somakāntamaṇikluptasopānodbhāsivedikam । candraśālācaratketusamālīḍhanabhontaram ॥ 14 ॥ gārutmatamaṇīkluptamaṇḍapavyūhamaṇḍitam । nityasevāparāmartyanibiḍadvāraśobhitam ॥ 15 ॥ adhiṣṭhitaṃ dvārapālairasitomarapāṇibhiḥ । namāmi nākanārīṇāṃ sāndrasaṅgītameduram ॥ 16 ॥ tanmadhye taruṇārkābhaṃ taptakāñcananirmitam । śakrādimaddvārapālaiḥ santataṃ pariveṣṭitam ॥ 17 ॥ catuṣṣaṣṭimahāvidyākalābhirabhisaṃvṛtam । rakṣitaṃ yoginībṛndai ratnasiṃhāsanaṃ bhaje ॥ 18 ॥ madhye tasya marutsevyaṃ caturdvārasamujjvalam । caturasratrirekhāḍhyāṃ cārutrivalayānvitam ॥ 19 ॥ kalādalasamāyuktaṃ kanadaṣṭadalānvitam । caturdaśārasahitaṃ daśāradvitayānvitam ॥ 20 ॥ aṣṭakoṇayutaṃ divyamagnikoṇavirājitam । yogibhiḥ pūjitaṃ yogiyoginīgaṇasevitam ॥ 21 ॥ sarvaduḥkhapraśamanaṃ sarvavyādhivināśanam । viṣajvaraharaṃ puṇyaṃ vividhāpadvidāraṇam ॥ 22 ॥ sarvadāridryaśamanaṃ sarvabhūpālamohanam । āśābhipūrakaṃ divyamarcakānāmaharniśam ॥ 23 ॥ aṣṭādaśasumarmāḍhyaṃ caturviṃśatisandhinam । śrīmadbindugṛhopetaṃ śrīcakraṃ praṇamāmyaham ॥ 24 ॥ tatraiva baindavasthāne taruṇādityasannibham । pāśāṅkuśadhanurbāṇapariṣkṛtakarāmbujam ॥ 25 ॥ pūrṇendubimbavadanaṃ phullapaṅkajalocanam । kusumāyudhaśṛṅgārakodaṇḍakuṭilabhruvam ॥ 26 ॥ cārucandrakalopetaṃ candanāgururūṣitam । mandasmitamadhūkālikiñjalkitamukhāmbujam ॥ 27 ॥ pāṭīratilakodbhāsiphālasthalamanoharam । anekakoṭikandarpalāvaṇyamaruṇādharam ॥ 28 ॥ tapanīyāṃśukadharaṃ tāruṇyaśrīniṣevitam । kāmeśvaramahaṃ vande kāmitārthapradaṃ nṛṇām ॥ 29 ॥ tasyāṅkamadhyamāsīnāṃ taptahāṭakasannibhām । māṇikyamukuṭacchāyāmaṇḍalāruṇadiṅmukhām ॥ 30 ॥ kalaveṇīkanatphullakahlārakusumojjvalām । uḍurājakṛtottaṃsāmutpalaśyāmalālakām ॥ 31 ॥ caturthīcandrasacchātraphālarekhāpariṣkṛtām । kastūrītilakārūḍhakamanīyalalantikām ॥ 32 ॥ bhrūlatāśrīparābhūtapuṣpāyudhaśarāsanām । nālīkadaladāyādanayanatrayaśobhitām ॥ 33 ॥ karuṇārasasampūrṇakaṭākṣahasitojjvalām । bhavyamuktāmaṇicārunāsāmauktikaveṣṭitām ॥ 34 ॥ kapolayugalīnṛtyakarṇatāṭaṅkaśobhitām । māṇikyavālīyugalīmayūkhāruṇadiṅmukhām ॥ 35 ॥ paripakvasubimbābhāpāṭalādharapallavām । mañjulādharaparvasthamandasmitamanoharām ॥ 36 ॥ dvikhaṇḍadvijarājābhagaṇḍadvitayamaṇḍitām । daraphullalasadgaṇḍadhavalāpūritānanām ॥ 37 ॥ pacelimendusuṣamāpāṭaccaramukhaprabhām । kandharākāntihasitakambubimbokaḍambarām ॥ 38 ॥ kastūrīkardamāśyāmakandharāmūlakandarām । vāmāṃsaśikharopāntavyālambighanaveṇikām ॥ 39 ॥ mṛṇālakāṇḍadāyādamṛdubāhucatuṣṭayām । maṇikeyūrayugalīmayūkhāruṇavigrahām ॥ 40 ॥ karamūlalasadratnakaṅkaṇakvāṇapeśalām । karakāntisamādhūtakalpānokahapallavām ॥ 41 ॥ padmarāgormikāśreṇibhāsurāṅgulipālikām । puṇḍrakodaṇḍapuṣpāstrapāśāṅkuśalasatkarām ॥ 42 ॥ taptakāñcanakumbhābhastanamaṇḍalamaṇḍitām । ghanastanataṭīkluptakāśmīrakṣodapāṭalām ॥ 43 ॥ kūlaṅkaṣakucasphāratārahāravirājitām । cārukausumbhakūrpāsacchannavakṣojamaṇḍalām ॥ 44 ॥ navanīlaghanaśyāmaromarājivirājitām । lāvaṇyasāgarāvartanibhanābhivibhūṣitām ॥ 45 ॥ ḍimbhamuṣṭitalagrāhyamadhyayaṣṭimanoharām । nitambamaṇḍalābhoganikvaṇanmaṇimekhalām ॥ 46 ॥ sandhyāruṇakṣaumapaṭīsañchannajaghanasthalām । ghanorukāntihasitakadalīkāṇḍavibhramām ॥ 47 ॥ jānusampuṭakadvandvajitamāṇikyadarpaṇām । jaṅghāyugalasaundaryavijitānaṅgakāhalām ॥ 48 ॥ prapadacchāyasantānajitaprācīnakacchapām । nīrajāsanakoṭīranighṛṣṭacaraṇāmbujām ॥ 49 ॥ pādaśobhāparābhūtapākāritarupallavām । caraṇāmbhojaśiñjānamaṇimañjīramañjulām ॥ 50 ॥ vibudhendravadhūtsaṅgavinyastapadapallavām । pārśvasthabhāratīlakṣmīpāṇicāmaravījitām ॥ 51 ॥ purato nākanārīṇāṃ paśyantīṃ nṛttamadbhutam । bhrūlatāñcalasambhūtapuṣpāyudhaparamparām ॥ 52 ॥ pratyagrayauvanonmattapariphullavilocanām । tāmroṣṭhīṃ taralāpāṅgīṃ sunāsāṃ sundarasmitām ॥ 53 ॥ caturarthadhruvodārāṃ cāmpeyodgandhikuntalām । madhusnapitamṛdvīkamadhurālāpapeśalām ॥ 54 ॥ śivāṃ ṣoḍaśavārṣīkāṃ śivāṅkatalavāsinīm । cinmayīṃ hṛdayāmbhoje cintayejjāpakottamaḥ ॥ 55 ॥ iti tripurasundaryā hṛdayaṃ sarvakāmadam । sarvadāridryaśamanaṃ sarvasampatpradaṃ nṛṇām ॥ 56 ॥ tāpajvarārtiśamanaṃ taruṇījanamohanam । mahāviṣaharaṃ puṇyaṃ māṅgalyakaramadbhutam ॥ 57 ॥ apamṛtyuharaṃ divyamāyuṣyaśrīkaraṃ param । apavargaikanilayamavanīpālavaśyadam ॥ 58 ॥ paṭhati dhyānaratnaṃ yaḥ prātaḥ sāyamatandritaḥ । na viṣādaiḥ sa ca pumān prāpnoti bhuvanatrayam ॥ 59 ॥ iti śrīmahātripurasundarīhṛdayaṃ sampūrṇam ।