dhyānam । oṃ pratyālīḍhapadārcitāṅghriśavahṛd ghorāṭṭahāsā parā khaḍgendīvarakartrikarparabhujā huṅkāra bījodbhavā । sarvā nīlaviśālapiṅgalajaṭājūṭaika nāgairyutā jāḍyanyasya kapālake trijagatāṃ hantyugratārā svayam ॥ śūnyasthāmatitejasāṃ ca dadhatīṃ śūlābja khaḍgaṃ gadāṃ muktāhārasubaddha ratna rasanāṃ karpūra kundojvalām । vande viṣṇusurendrarudranamitāṃ trailokya rakṣāparām nīlāṃ tāmahibhūṣaṇādhivalayāmatyugratārāṃ bhaje ॥ stotraṃ । mātarnīlasarasvati praṇamatāṃ saubhāgyasampatprade pratyālīḍhapadasthite śavahṛdi smerānanāmbhoruhe । phullendīvaralocane trinayane kartrīkapālotpale khaḍgaṃ cādadhatī tvameva śaraṇaṃ tvāmīśvarīmāśraye ॥ 1 ॥ vācāmīśvari bhaktikalpalatike sarvārthasiddhīśvari gadyaprākṛtapadyajātaracanāsarvārthasiddhiprade । nīlendīvaralocanatrayayute kāruṇyavārānnidhe saubhāgyāmṛtavardhanena kṛpayāsiñca tvamasmādṛśam ॥ 2 ॥ kharve garvasamūhapūritatano sarpādiveṣojvale vyāghratvakparivītasundarakaṭivyādhūtaghaṇṭāṅkite । sadyaḥkṛttagaladrajaḥparimilanmuṇḍadvayīmūrdhaje granthiśreṇinṛmuṇḍadāmalalite bhīme bhayaṃ nāśaya ॥ 3 ॥ māyānaṅgavikārarūpalalanābindvardhacandrāmbike humphaṭkāramayi tvameva śaraṇaṃ mantrātmike mādṛśaḥ । mūrtiste janani tridhāmaghaṭitā sthūlātisūkṣmā parā vedānāṃ nahi gocarā kathamapi prājñairnutāmāśraye ॥ 4 ॥ tvatpādāmbujasevayā sukṛtino gacchanti sāyujyatāṃ tasyāḥ śrīparameśvaratrinayanabrahmādisāmyātmanaḥ । saṃsārāmbudhimajjane paṭutanurdevendramukhyāsurān mātaste padasevane hi vimukhān kiṃ mandadhīḥ sevate ॥ 5 ॥ mātastvatpadapaṅkajadvayarajomudrāṅkakoṭīriṇaste devā jayasaṅgare vijayino niśśaṅkamaṅke gatāḥ । devo'haṃ bhuvane na me sama iti spardhāṃ vahantaḥ pare tattulyāṃ niyataṃ yathā śaśiravī nāśaṃ vrajanti svayam ॥ 6 ॥ tvannāmasmaraṇātpalāyanaparāndraṣṭuṃ ca śaktā na te bhūtapretapiśācarākṣasagaṇā yakṣaśca nāgādhipāḥ । daityā dānavapuṅgavāśca khacarā vyāghrādikā jantavo ḍākinyaḥ kupitāntakaśca manujān mātaḥ kṣaṇaṃ bhūtale ॥ 7 ॥ lakṣmīḥ siddhigaṇaśca pādukamukhāḥ siddhāstathā vairiṇāṃ stambhaścāpi varāṅgane gajaghaṭāstambhastathā mohanam । mātastvatpadasevayā khalu nṛṇāṃ siddhyanti te te guṇāḥ klāntaḥ kāntamanobhavo'tra bhavati kṣudro'pi vācaspatiḥ ॥ 8 ॥ tārāṣṭakamidaṃ puṇyaṃ bhaktimān yaḥ paṭhennaraḥ । prātarmadhyāhnakāle ca sāyāhne niyataḥ śuciḥ ॥ 9 ॥ labhate kavitāṃ vidyāṃ sarvaśāstrārthavidbhavet lakṣmīmanaśvarāṃ prāpya bhuktvā bhogānyathepsitān । kīrtiṃ kāntiṃ ca nairujyaṃ prāptyānte mokṣamāpnuyāt ॥ 10 ॥