శ్రీనీలలోహిత ఉవాచ । జగద్యోనిరూపాం సువేశీం చ రక్తాం గుణాతీతసంజ్ఞాం మహాగుహ్యగుహ్యాం । మహాసర్పభూషాం భవేశాదిపూజ్యాం మహాత్యుగ్రబాలాం భజేఽహం హి నిత్యాం ॥ 1 ॥ మహాస్వర్ణవర్ణాం శివపృష్ఠసంస్థాం మహాముండమాలాం గలే శోభమానాం । మహాచర్మవస్త్రాం మహాశంఖహస్తాం మహాత్యుగ్రబాలాం భజేఽహం హి నిత్యాం ॥ 2 ॥ సదా సుప్రసన్నాం భృతాసూక్ష్మసూక్ష్మాం వరాభీతిహస్తాం ధృతావాక్షపుస్తాం । మహాకిన్నరేశీం భగాకారవిద్యాం మహాత్యుగ్రబాలాం భజేఽహం హి నిత్యాం ॥ 3 ॥ తినీం తీకినీనాం రవాం కింకిణీనాం హహాహా హహాహా మహాలాపశబ్దాం । తథైథై తథైథై మహానృత్యనృత్యాం మహాత్యుగ్రబాలాం భజేఽహం హి నిత్యాం ॥ 4 ॥ ననానా రిరీరీ మహాగీశ శంబూ హుహూవూ హుహూవూ పశో రక్తపానాం । ధిమింధీం ధిమింధీం మృదంగస్య శబ్దాం మహాత్యుగ్రబాలాం భజేఽహం హి నిత్యాం ॥ 5 ॥ మహాచక్రసంస్థాం త్రిమాత్రాస్వరూపాం శివార్ధాంగభూతాం మహాపుష్పమాలాం । మహాదుఃఖహర్త్రీం మహాప్రేతసంస్థాం మహాత్యుగ్రబాలాం భజేఽహం హి నిత్యాం ॥ 6 ॥ స్ఫురత్పద్మవక్త్రాం హిమాంశోః కలాపాం మహాకోమలాంగీం సురేశేన మాన్యాం । జగత్పాలనైకాగ్రచిత్తాం సుపుష్టాం మహాత్యుగ్రబాలాం భజేఽహం హి నిత్యాం ॥ 7 ॥ మహాదైత్యనాశీం సురానిత్యపాలీం మహాబుద్ధిరాశిం కవీనాం ముఖస్థాం । జటీనాం హృదిస్థాం మనూనాం శిరఃస్థాం మహాత్యుగ్రబాలాం భజేఽహం హి నిత్యాం ॥ 8 ॥ భుజంగాఖ్యం మహాస్తోత్రం త్రిషు లోకేషు దుర్లభం । మహాసిద్ధిప్రదం దివ్యం చతుర్వర్గఫలప్రదం ॥ 9 ॥ సర్వక్రతుఫలం భద్రే సర్వవ్రతఫలం తథా । సర్వదానోద్భవం పుణ్యం లభతే నాత్ర సంశయః ॥ 10 ॥ వివాదే కలహే ఘోరే మహాదుఃఖే పరాజయే । గ్రహదోషే మహారోగే పఠేత్ స్తోత్రం విచక్షణః ॥ 11 ॥ సర్వదోషాః వినశ్యంతి లభతే వాంఛితం ఫలం । దూతీయాగే పఠేద్దేవి సర్వశత్రుక్షయో భవేత్ ॥ 12 ॥ మహాచక్రే పఠేద్దేవి లభతే పరమం పదం । పూజాంతే పఠతే భక్త్యా మహాబలిఫలప్రదం ॥ 13 ॥ పితృగేహే తుర్యపథే శూన్యాగారే శివాలయే । బిల్వమూలే చైకవృక్షే రతౌ మధుసమాగమే ॥ 14 ॥ పఠేత్ స్తోత్రం మహేశాని జీవన్ముక్తః స ఉచ్యతే । త్రికాలం పఠతే నిత్యం దేవీపుత్రత్వమాప్నుయాత్ ॥ 15 ॥ ఇతి శ్రీ బాలా త్రిపుర సుందరీ భుజంగ స్తోత్రం ।