devyuvāca । kathitāśchinnamastāyā yā yā vidyāḥ sugopitāḥ । tvayā nāthena jīveśa śrutāścādhigatā mayā ॥ 1 ॥ idānīṃ śrotumicchāmi kavacaṃ pūrvasūcitam । trailokyavijayaṃ nāma kṛpayā kathyatāṃ prabho ॥ 2 ॥ bhairava uvāca । śṛṇu vakṣyāmi deveśi sarvadevanamaskṛte । trailokyavijayaṃ nāma kavacaṃ sarvamohanam ॥ 3 ॥ sarvavidyāmayaṃ sākṣātsurātsurajayapradam । dhāraṇātpaṭhanādīśastrailokyavijayī vibhuḥ ॥ 4 ॥ brahmā nārāyaṇo rudro dhāraṇātpaṭhanādyataḥ । kartā pātā ca saṃhartā bhuvanānāṃ sureśvari ॥ 5 ॥ na deyaṃ paraśiṣyebhyo'bhaktebhyo'pi viśeṣataḥ । deyaṃ śiṣyāya bhaktāya prāṇebhyo'pyadhikāya ca ॥ 6 ॥ devyāśca cchinnamastāyāḥ kavacasya ca bhairavaḥ । ṛṣistu syādvirāṭ chando devatā cchinnamastakā ॥ 7 ॥ trailokyavijaye muktau viniyogaḥ prakīrtitaḥ । huṅkāro me śiraḥ pātu chinnamastā balapradā ॥ 8 ॥ hrāṃ hrūṃ aiṃ tryakṣarī pātu bhālaṃ vaktraṃ digambarā । śrīṃ hrīṃ hrūṃ aiṃ dṛśau pātu muṇḍaṃ kartridharāpi sā ॥ 9 ॥ sā vidyā praṇavādyantā śrutiyugmaṃ sadā'vatu । vajravairocanīye huṃ phaṭ svāhā ca dhruvādikā ॥ 10 ॥ ghrāṇaṃ pātu cchinnamastā muṇḍakartrividhāriṇī । śrīmāyākūrcavāgbījairvajravairocanīya hūm ॥ 11 ॥ hūṃ phaṭ svāhā mahāvidyā ṣoḍaśī brahmarūpiṇī । svapārśve varṇinī cāsṛgdhārāṃ pāyayatī mudā ॥ 12 ॥ vadanaṃ sarvadā pātu cchinnamastā svaśaktikā । muṇḍakartridharā raktā sādhakābhīṣṭadāyinī ॥ 13 ॥ varṇinī ḍākinīyuktā sāpi māmabhito'vatu । rāmādyā pātu jihvāṃ ca lajjādyā pātu kaṇṭhakam ॥ 14 ॥ kūrcādyā hṛdayaṃ pātu vāgādyā stanayugmakam । ramayā puṭitā vidyā pārśvau pātu sureśvarī ॥ 15 ॥ māyayā puṭitā pātu nābhideśe digambarā । kūrceṇa puṭitā devī pṛṣṭhadeśe sadā'vatu ॥ 16 ॥ vāgbījapuṭitā caiṣā madhyaṃ pātu saśaktikā । īśvarī kūrcavāgbījairvajravairocanīya hūm ॥ 17 ॥ hūṃ phaṭ svāhā mahāvidyā koṭisūryasamaprabhā । chinnamastā sadā pāyādūruyugmaṃ saśaktikā ॥ 18 ॥ hrīṃ hrūṃ varṇinī jānuṃ śrīṃ hrīṃ ca ḍākinī padam । sarvavidyāsthitā nityā sarvāṅgaṃ me sadā'vatu ॥ 19 ॥ prācyāṃ pāyādekaliṅgā yoginī pāvake'vatu । ḍākinī dakṣiṇe pātu śrīmahābhairavī ca mām ॥ 20 ॥ nairṛtyāṃ satataṃ pātu bhairavī paścime'vatu । indrākṣī pātu vāyavye'sitāṅgī pātu cottare ॥ 21 ॥ saṃhāriṇī sadā pātu śivakoṇe sakartrikā । ityaṣṭaśaktayaḥ pāntu digvidikṣu sakartrikāḥ ॥ 22 ॥ krīṃ krīṃ krīṃ pātu sā pūrvaṃ hrīṃ hrīṃ māṃ pātu pāvake । hrūṃ hrūṃ māṃ dakṣiṇe pātu dakṣiṇe kālikāvatu ॥ 23 ॥ krīṃ krīṃ krīṃ caiva nairṛtyāṃ hrīṃ hrīṃ ca paścime'vatu । hūṃ hūṃ pātu marutkoṇe svāhā pātu sadottare ॥ 24 ॥ mahākālī khaḍgahastā rakṣaḥkoṇe sadāvatu । tāro māyā vadhūḥ kūrcaṃ phaṭ kāro'yaṃ mahāmanuḥ ॥ 25 ॥ khaḍgakartridharā tārā cordhvadeśaṃ sadā'vatu । hrīṃ strīṃ hūṃ phaṭ ca pātāle māṃ pātu caikajaṭā satī । tārā tu sahitā khe'vyānmahānīlasarasvatī ॥ 26 ॥ iti te kathitaṃ devyāḥ kavacaṃ mantravigraham । yaddhṛtvā paṭhanādbhīmaḥ krodhākhyo bhairavaḥ smṛtaḥ ॥ 27 ॥ surāsura munīndrāṇāṃ kartā hartā bhavetsvayam । yasyājñayā madhumatī yāti sā sādhakālayam ॥ 28 ॥ bhūtinyādyāśca ḍākinyo yakṣiṇyādyāśca khecarāḥ । ājñāṃ gṛhṇanti tāstasya kavacasya prasādataḥ ॥ 29 ॥ etadeva paraṃ brahma kavacaṃ manmukhoditam । devīmabhyarca gandhādyairmūle naiva paṭhetsakṛt ॥ 30 ॥ saṃvatsarakṛtāyāstu pūjāyāḥ phalamāpnuyāt । bhūrje vilikhitaṃ caitadguṭikāṃ kāñcanasthitām ॥ 31 ॥ dhārayeddakṣiṇe bāhau kaṇṭhe vā yadi vānyataḥ । sarvaiśvaryayuto bhūtvā trailokyaṃ vaśamānayet ॥ 32 ॥ tasya gehe vasellakṣmīrvāṇī ca vadanāmbuje । brahmāstrādīni śastrāṇi tadgātre yānti saumyatām ॥ 33 ॥ idaṃ kavacamajñātvā yo bhajecchinnamastakām । so'pi śastraprahāreṇa mṛtyumāpnoti satvaram ॥ 34 ॥ iti śrī bhairavatantre bhairavabhairavīsaṃvāde trailokyavijayaṃ nāma chinnamastākavacaṃ sampūrṇam ।