ദേവാ ഊചുഃ । നമോ യജ്ഞവരാഹായ നമസ്തേ ശതബാഹവേ । നമസ്തേ ദേവദേവായ നമസ്തേ വിശ്വരൂപിണേ ॥ 1 ॥ നമഃ സ്ഥിതിസ്വരൂപായ സർവയജ്ഞസ്വരൂപിണേ । കലാകാഷ്ഠാനിമേഷായ നമസ്തേ കാലരൂപിണേ ॥ 2 ॥ ഭൂതാത്മനേ നമസ്തുഭ്യം ഋഗ്വേദവപുഷേ തഥാ । സുരാത്മനേ നമസ്തുഭ്യം സാമവേദായ തേ നമഃ ॥ 3 ॥ ഓങ്കാരായ നമസ്തുഭ്യം യജുർവേദസ്വരൂപിണേ । ഋചഃസ്വരൂപിണേ ചൈവ ചതുർവേദമയായ ച ॥ 4 ॥ നമസ്തേ വേദവേദാംഗ സാംഗോപാംഗായ തേ നമഃ । ഗോവിന്ദായ നമസ്തുഭ്യമനാദിനിധനായ ച ॥ 5 ॥ നമസ്തേ വേദവിദുഷേ വിശിഷ്ടൈകസ്വരൂപിണേ । ശ്രീഭൂലീലാധിപതയേ ജഗത്പിത്രേ നമോ നമഃ ॥ 6 ॥ ഇതി ശ്രീപദ്മപുരാണേ ഉത്തരഖണ്ഡേ സപ്തത്രിംശദധികദ്വിശതതമോഽധ്യായേ ദേവകൃത ശ്രീ വരാഹ സ്തുതിഃ ।