suśāntovāca । jaya hare'marādhīśasevitaṃ tava padāmbujaṃ bhūribhūṣaṇam । kuru mamāgrataḥ sādhu satkṛtaṃ tyaja mahāmate mohamātmanaḥ ॥ 1 ॥ tava vapurjagadrūpasampadā viracitaṃ satāṃ mānase sthitam । ratipatermanomohadāyakaṃ kuru viceṣṭitaṃ kāmalampaṭam ॥ 2 ॥ tava yaśo jagacchokanāśanaṃ mṛdukathāmṛtaṃ prītidāyakam । smitasudhokṣitaṃ candravanmukhaṃ tava karotyalaṃ lokamaṅgalam ॥ 3 ॥ mama patistvayaṃ sarvadurjayo yadi tavāpriyaṃ karmaṇā''caret । jahi tadātmanaḥ śatrumudyataṃ kuru kṛpāṃ na cedīdṛgīśvaraḥ ॥ 4 ॥ mahadahamyutaṃ pañcamātrayā prakṛtijāyayā nirmitaṃ vapuḥ । tava nirīkṣaṇāllīlayā jaga- -tsthitilayodayaṃ brahmakalpitam ॥ 5 ॥ bhūviyanmarudvāritejasāṃ rāśibhiḥ śarīrendriyāśritaiḥ । triguṇayā svayā māyayā vibho kuru kṛpāṃ bhavatsevanārthinām ॥ 6 ॥ tava guṇālayaṃ nāma pāvanaṃ kalimalāpahaṃ kīrtayanti ye । bhavabhayakṣayaṃ tāpatāpitā muhuraho janāḥ saṃsaranti no ॥ 7 ॥ tava januḥ satāṃ mānavardhanaṃ jinakulakṣayaṃ devapālakam । kṛtayugārpakaṃ dharmapūrakaṃ kalikulāntakaṃ śaṃ tanotu me ॥ 8 ॥ mama gṛhaṃ patiputranaptṛkaṃ gajarathairdhvajaiścāmarairdhanaiḥ । maṇivarāsanaṃ satkṛtiṃ vinā tava padābjayoḥ śobhayanti kim ॥ 9 ॥ tava jagadvapuḥ sundarasmitaṃ mukhamaninditaṃ sundarānanam । yadi na me priyaṃ valguceṣṭitaṃ parikarotyaho mṛtyurastviha ॥ 10 ॥ hayacara bhayahara karaharaśaraṇa kharataravaraśara daśabaladamana । jaya hataparabhava bhavavaranāśana śaśadharaśatasamarasabharamadana ॥ 11 ॥ iti śrīkalkipurāṇe suśāntā kṛta śrī kalki stotram ॥