aditiruvāca । namaste devadeveśa sarvavyāpin janārdana । sattvādiguṇabhedena lokavyāpārakāriṇe ॥ 1 ॥ namaste bahurūpāya arūpāya namo namaḥ । sarvaikādbhutarūpāya nirguṇāya guṇātmane ॥ 2 ॥ namaste lokanāthāya paramajñānarūpiṇe । sadbhaktajanavātsalyaśīline maṅgalātmane ॥ 3 ॥ yasyāvatārarūpāṇi hyarcayanti munīśvarāḥ । tamādipuruṣaṃ devaṃ namāmīṣṭārthasiddhaye ॥ 4 ॥ yaṃ na jānanti śrutayo yaṃ na jāyanti sūrayaḥ । taṃ namāmi jagaddhetuṃ māyinaṃ tamamāyinam ॥ 5 ॥ yasyāvalokanaṃ citraṃ māyopadravavāraṇam । jagadrūpaṃ jagatpālaṃ taṃ vande padmajādhavam ॥ 6 ॥ yo devastyaktasaṅgānāṃ śāntānāṃ karuṇārṇavaḥ । karoti hyātmanā saṅgaṃ taṃ vande saṅgavarjitam ॥ 7 ॥ yatpādābjajalaklinnasevārañjitamastakāḥ । avāpuḥ paramāṃ siddhiṃ taṃ vande sarvavanditam ॥ 8 ॥ yajñeśvaraṃ yajñabhujaṃ yajñakarmasuniṣṭhitam । namāmi yajñaphaladaṃ yajñakarmaprabhodakam ॥ 9 ॥ ajāmilo'pi pāpātmā yannāmoccāraṇādanu । prāptavān paramaṃ dhāma taṃ vande lokasākṣiṇam ॥ 10 ॥ brahmādyā api ye devā yanmāyāpāśayantritāḥ । na jānanti paraṃ bhāvaṃ taṃ vande sarvanāyakam ॥ 11 ॥ hṛtpadmanilayo'jñānāṃ dūrastha iva bhāti yaḥ । pramāṇātītasadbhāvaṃ taṃ vande jñānasākṣiṇam ॥ 12 ॥ yanmukhādbrāhmaṇo jāto bāhubhyāṃ kṣatriyo'jani । tathaiva ūruto vaiśyaḥ padbhyāṃ śūdro ajāyata ॥ 13 ॥ manasaścandramā jāto jātaḥ sūryaśca cakṣuṣaḥ । mukhādindraścā'gniśca prāṇādvāyurajāyata ॥ 14 ॥ tvamindraḥ pavanaḥ somastvamīśānastvamantakaḥ । tvamagnirnirṛtiścaiva varuṇastvaṃ divākaraḥ ॥ 15 ॥ devāśca sthāvarāścaiva piśācāścaiva rākṣasāḥ । girayaḥ siddhagandharvā nadyo bhūmiśca sāgarāḥ ॥ 16 ॥ tvameva jagatāmīśo yannāmāsti parātparaḥ । tvadrūpamakhilaṃ tasmātputrānme pāhi śrīhare ॥ 17 ॥ iti stutvā devadhātrī devaṃ natvā punaḥ punaḥ । uvāca prāñjalirbhūtvā harṣāśrukṣālitastanī ॥ 18 ॥ anugrāhyāsmi deveśa hare sarvādikāraṇa । akaṇṭakaśriyaṃ dehi matsutānāṃ divaukasām ॥ 19 ॥ antaryāmin jagadrūpa sarvabhūta pareśvara । tavājñātaṃ kimastīha kiṃ māṃ mohayasi prabho ॥ 20 ॥ tathāpi tava vakṣyāmi yanme manasi vartate । vṛthāputrāsmi deveśa rakṣobhiḥ paripīḍitā ॥ 21 ॥ etanna hantumicchāmi matsutā ditijā yataḥ । tānahatvā śriyaṃ dehi matsutānāmuvāca sā ॥ 22 ॥ ityukto devadevastu punaḥ prītimupāgataḥ । uvāca harṣayansādhvīṃ kṛpayā'bhi pariplutaḥ ॥ 23 ॥ śrī bhagavānuvāca । prīto'smi devi bhadraṃ te bhaviṣyāmi sutastava । yataḥ sapatnītanayeṣvapi vātsalyaśālinī ॥ 24 ॥ tvayā ca me kṛtaṃ stotraṃ paṭhanti bhuvi mānavāḥ । teṣāṃ putro dhanaṃ sampanna hīyante kadācana । ante matpadamāpnoti yadviṣṇoḥ paramaṃ śubham ॥ 25 ॥ iti śrīpadmapurāṇe śrī vāmana stotram ।