nāmasmaraṇādanyopāyaṃ na hi paśyāmo bhavataraṇe । rāma hare kṛṣṇa hare tava nāma vadāmi sadā nṛhare ॥ vedoddhāravicāramate somakadānavasaṃharaṇe । mīnākāraśarīra namo haribhaktaṃ te paripālaya mām ॥ 1 ॥ manthānācaladhāraṇaheto devāsuraparipālana bho । kūrmākāraśarīra namo haribhaktaṃ te paripālaya mām ॥ 2 ॥ bhūcorakahara puṇyamate krīḍoddhṛtabhūdeśa hare । kroḍākāraśarīra namo haribhaktaṃ te paripālaya mām ॥ 3 ॥ hiraṇyakaśipucchedanaheto prahlādā'bhayadhāraṇaheto । narasiṃhācyutarūpa namo haribhaktaṃ te paripālaya mām ॥ 4 ॥ balimadabhañjana vitatamate pādodvayakṛtalokakṛte । vaṭupaṭuveṣamanojña namo haribhaktaṃ te paripālaya mām ॥ 5 ॥ kṣitipativaṃśasambhavamūrte kṣitipatirakṣākṣatamūrte । bhṛgupatirāmavareṇya namo haribhaktaṃ te paripālaya mām ॥ 6 ॥ sītāvallabha dāśarathe daśarathanandana lokaguro । rāvaṇamardana rāma namo haribhaktaṃ te paripālaya mām ॥ 7 ॥ kṛṣṇānanta kṛpājaladhe kaṃsāre kamaleśa hare । kāliyamardana kṛṣṇa namo haribhaktaṃ te paripālaya mām ॥ 8 ॥ tripurasatīmānaviharaṇā tripuravijayamārgaṇarūpā । śuddhajñānavibuddha namo haribhaktaṃ te paripālaya mām ॥ 9 ॥ śiṣṭajanāvana duṣṭahara khagaturagottamavāhana te । kalkirūpaparipāla namo haribhaktaṃ te paripālaya mām ॥ 10 ॥ nāmasmaraṇādanyopāyaṃ na hi paśyāmo bhavataraṇe । rāma hare kṛṣṇa hare tava nāma vadāmi sadā nṛhare ॥ iti daśāvatāra stotram ।