हैंహైHaindavamஹிહિં
📍
Font Size:
ഭൂ വരാഹ സ്തോത്രം
ഋഷയ ഊചു ।
ജിതം ജിതം തേഽജിത യജ്ഞഭാവനാ
ത്രയീം തനൂം സ്വാം പരിധുന്വതേ നമഃ ।
യദ്രോമഗർതേഷു നിലില്യുരധ്വരാഃ
തസ്മൈ നമഃ കാരണസൂകരായ തേ ॥ 1 ॥
രൂപം തവൈതന്നനു ദുഷ്കൃതാത്മനാം
ദുർദർശനം ദേവ യദധ്വരാത്മകം ।
ഛന്ദാംസി യസ്യ ത്വചി ബർഹിരോമ-
സ്സ്വാജ്യം ദൃശി ത്വംഘ്രിഷു ചാതുർഹോത്രം ॥ 2 ॥
സ്രുക്തുണ്ഡ ആസീത്സ്രുവ ഈശ നാസയോ-
രിഡോദരേ ചമസാഃ കർണരന്ധ്രേ ।
പ്രാശിത്രമാസ്യേ ഗ്രസനേ ഗ്രഹാസ്തു തേ
യച്ചർവണന്തേ ഭഗവന്നഗ്നിഹോത്രം ॥ 3 ॥
ദീക്ഷാനുജന്മോപസദഃ ശിരോധരം
ത്വം പ്രായണീയോ ദയനീയ ദംഷ്ട്രഃ ।
ജിഹ്വാ പ്രവർഗ്യസ്തവ ശീർഷകം ക്രതോഃ
സഭ്യാവസഥ്യം ചിതയോഽസവോ ഹി തേ ॥ 4 ॥
സോമസ്തു രേതഃ സവനാന്യവസ്ഥിതിഃ
സംസ്ഥാവിഭേദാസ്തവ ദേവ ധാതവഃ ।
സത്രാണി സർവാണി ശരീരസന്ധി-
സ്ത്വം സർവയജ്ഞക്രതുരിഷ്ടിബന്ധനഃ ॥ 5 ॥
നമോ നമസ്തേഽഖിലയന്ത്രദേവതാ
ദ്രവ്യായ സർവക്രതവേ ക്രിയാത്മനേ ।
വൈരാഗ്യ ഭക്ത്യാത്മജയാഽനുഭാവിത
ജ്ഞാനായ വിദ്യാഗുരവേ നമൊ നമഃ ॥ 6 ॥
ദംഷ്ട്രാഗ്രകോട്യാ ഭഗവംസ്ത്വയാ ധൃതാ
വിരാജതേ ഭൂധര ഭൂസ്സഭൂധരാ ।
യഥാ വനാന്നിസ്സരതോ ദതാ ധൃതാ
മതംഗജേന്ദ്രസ്യ സ പത്രപദ്മിനീ ॥ 7 ॥
ത്രയീമയം രൂപമിദം ച സൗകരം
ഭൂമണ്ഡലേ നാഥ തദാ ധൃതേന തേ ।
ചകാസ്തി ശൃംഗോഢഘനേന ഭൂയസാ
കുലാചലേന്ദ്രസ്യ യഥൈവ വിഭ്രമഃ ॥ 8 ॥
സംസ്ഥാപയൈനാം ജഗതാം സതസ്ഥുഷാം
ലോകായ പത്നീമസി മാതരം പിതാ ।
വിധേമ ചാസ്യൈ നമസാ സഹ ത്വയാ
യസ്യാം സ്വതേജോഽഗ്നിമിവാരണാവധാഃ ॥ 9 ॥
കഃ ശ്രദ്ധധീതാന്യതമസ്തവ പ്രഭോ
രസാം ഗതായാ ഭുവ ഉദ്വിബർഹണം ।
ന വിസ്മയോഽസൗ ത്വയി വിശ്വവിസ്മയേ
യോ മായയേദം സസൃജേഽതി വിസ്മയം ॥ 10 ॥
വിധുന്വതാ വേദമയം നിജം വപു-
ര്ജനസ്തപഃ സത്യനിവാസിനോ വയം ।
സടാശിഖോദ്ധൂത ശിവാംബുബിന്ദുഭി-
ര്വിമൃജ്യമാനാ ഭൃശമീശ പാവിതാഃ ॥ 11 ॥
സ വൈ ബത ഭ്രഷ്ടമതിസ്തവൈഷ തേ
യഃ കർമണാം പാരമപാരകർമണഃ ।
യദ്യോഗമായാ ഗുണ യോഗ മോഹിതം
വിശ്വം സമസ്തം ഭഗവൻ വിധേഹി ശം ॥ 12 ॥
ഇതി ശ്രീമദ്ഭാഗവതേ മഹാപുരാണേ തൃതീയസ്കന്ധേ ശ്രീ വരാഹ പ്രാദുർഭാവോനാമ ത്രയോദശോധ്യായഃ ।
Recite with devotion and pure heart
Regular practice brings spiritual benefits