ṛṣiruvāca । yamāhurvāsudevāṃśaṃ haihayānāṃ kulāntakam । triḥsaptakṛtvo ya imāṃ cakre niḥkṣatriyāṃ mahīm ॥ 1 ॥ duṣṭaṃ kṣatraṃ bhuvo bhāramabrahmaṇyamanīnaśat । tasya nāmāni puṇyāni vacmi te puruṣarṣabha ॥ 2 ॥ bhūbhāraharaṇārthāya māyāmānuṣavigrahaḥ । janārdanāṃśasambhūtaḥ sthityutpattyapyayeśvaraḥ ॥ 3 ॥ bhārgavo jāmadagnyaśca pitrājñāparipālakaḥ । mātṛprāṇaprado dhīmān kṣatriyāntakaraḥ prabhuḥ ॥ 4 ॥ rāmaḥ paraśuhastaśca kārtavīryamadāpahaḥ । reṇukāduḥkhaśokaghno viśokaḥ śokanāśanaḥ ॥ 5 ॥ navīnanīradaśyāmo raktotpalavilocanaḥ । ghoro daṇḍadharo dhīro brahmaṇyo brāhmaṇapriyaḥ ॥ 6 ॥ tapodhano mahendrādau nyastadaṇḍaḥ praśāntadhīḥ । upagīyamānacaritaḥ siddhagandharvacāraṇaiḥ ॥ 7 ॥ janmamṛtyujarāvyādhiduḥkhaśokabhayātigaḥ । ityaṣṭāviṃśatirnāmnāmuktā stotrātmikā śubhā ॥ 8 ॥ anayā prīyatāṃ devo jāmadagnyo maheśvaraḥ । nedaṃ stotramaśāntāya nādāntāyātapasvine ॥ 9 ॥ nāvedaviduṣe vācyamaśiṣyāya khalāya ca । nāsūyakāyānṛjave na cānirdiṣṭakāriṇe ॥ 10 ॥ idaṃ priyāya putrāya śiṣyāyānugatāya ca । rahasyadharmo vaktavyo nānyasmai tu kadācana ॥ 11 ॥ iti śrī paraśurāma aṣṭāviṃśatināma stotram ।