ओं ब्रह्म॑मेतु॒ माम् । मधु॑मेतु॒ माम् । ब्रह्म॑मे॒व मधु॑मेतु॒ माम् । यास्ते॑ सोम प्र॒जा व॒थ्सोऽभि॒ सो अ॒हम् । दुष्ष्व॑प्न॒हंदु॑रुष्व॒ह । यास्ते॑ सोम प्रा॒णाग्ंस्तांजु॑होमि । त्रिसु॑पर्ण॒मया॑चितं ब्राह्म॒णाय॑ दद्यात् । ब्र॒ह्म॒ह॒त्यां-वाँ ए॒ते घ्नं॑ति । ये ब्रा᳚ह्म॒णास्त्रिसु॑पर्णं॒ पठं॑ति । ते सोमं॒ प्राप्नु॑वंति । आ॒स॒ह॒स्रात्पं॒क्तिं पुनं॑ति । ओम् ॥ 1 ब्रह्म॑ मे॒धया᳚ । मधु॑ मे॒धया᳚ । ब्रह्म॑मे॒व मधु॑ मे॒धया᳚ । अ॒द्या नो॑ देव सवितः प्र॒जाव॑त्सावी॒स्सौभ॑गम् । परा॑ दु॒ष्वप्नि॑यग्ं सुव । विश्वा॑नि देव सवितर्दुरि॒तानि॒ परा॑सुव । यद्भ॒द्रं तन्म॒ आसु॑व । मधु॒ वाता॑ ऋताय॒ते मधु॑ क्षरंति॒ सिंध॑वः । माध्वी᳚र्नस्सं॒त्वोष॑धीः । मधु॒ नक्त॑मु॒तोषसि॒ मधु॑म॒त्पार्थि॑व॒ग्ं॒ रजः॑ । मधु॒ द्यौर॑स्तु नः पि॒ता । मधु॑ मान्नो॒ वन॒स्पति॒र्मधु॑माग्ं अस्तु॒ सूर्यः॑ । माध्वी॒र्गावो॑ भवंतु नः । य इ॒मं त्रिसु॑पर्ण॒मया॑चितं ब्राह्म॒णाय॑ दद्यात् । भ्रू॒ण॒ह॒त्यां-वाँ ए॒ते घ्नं॑ति । ये ब्रा᳚ह्म॒णास्त्रिसु॑पर्णं॒ पठं॑ति । ते सोमं॒ प्राप्नु॑वंति । आ॒स॒ह॒स्रात्पं॒क्तिं पुनं॑ति । ओम् ॥ 2 ब्रह्म॑ मे॒धवा᳚ । मधु॑ मे॒धवा᳚ । ब्रह्म॑मे॒व मधु॑ मे॒धवा᳚ । ब्र॒ह्मा दे॒वानां᳚ पद॒वीः क॑वी॒नामृषि॒र्विप्रा॑णां महि॒षो मृ॒गाणा᳚म् । श्ये॒नो गृद्ध्रा॑णा॒ग्ं॒ स्वधि॑ति॒र्वना॑ना॒ग्ं॒ सोमः॑ प॒वित्र॒मत्ये॑ति॒ रेभन्न्॑ । ह॒ग्ं॒सश्शु॑चि॒षद्वसु॑रंतरिक्ष॒सद्धोता॑ वेदि॒षदति॑थिर्दुरोण॒सत् । नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत् । ऋ॒चे त्वा॑ रु॒चे त्वा॒ समित्स्र॑वंति स॒रितो॒ न धेनाः᳚ । अं॒तर्​हृ॒दा मन॑सा पू॒यमा॑नाः । घृ॒तस्य॒ धारा॑ अ॒भिचा॑कशीमि । हि॒र॒ण्ययो॑ वेत॒सो मद्ध्य॑ आसाम् । तस्मिं᳚थ्​सुप॒र्णो म॑धु॒कृत् कु॑ला॒यी भज॑न्नास्ते॒ मधु॑ दे॒वता᳚भ्यः । तस्या॑सते॒ हर॑यस्स॒प्त तीरे᳚ स्व॒धां दुहा॑ना अ॒मृत॑स्य॒ धारा᳚म् । य इ॒दं त्रिसु॑पर्ण॒मया॑चितं ब्राह्म॒णाय॑ दद्यात् । वी॒र॒ह॒त्यां-वाँ ए॒ते घ्नंति । ये ब्रा᳚ह्म॒णास्त्रिसु॑पर्णं॒ पठं॑ति । ते सोमं॒ प्राप्नु॑वंति । आ॒स॒ह॒स्रात्पं॒क्तिं पुनं॑ति । ओम् ॥ 3 ओं शांतिः॒ शांतिः॒ शांतिः॑ ॥