āpo̱ hiṣṭhā ma̍yo̱bhuva̱ḥ । tā na̍ ū̱rje da̍dhātana । ma̱heraṇā̍ya̱ cakṣa̍se । yo va̍ḥ śi̱vata̍mo̱ rasa̱stasya̍ bhājayate̱ ha na̱ḥ । u̱ṣa̱tīri̍va mā̱tara̍ḥ । tasmā̱ ara̍ṃgamāmavo̱ yasya̱ kṣayā̍ya̱ ji̍nvatha । āpo̍ ja̱naya̍thā ca naḥ । pṛ̱thi̱vī śā̱ṃtā sāgninā̍ śā̱ṃtā sāme̍ śā̱ṃtā śucag̍ṃ śamayatu । a̱ṃtari̍kṣagṃ śā̱ṃtaṃ tadvā̱yunā̍ śā̱ṃtaṃ tanme̍ śā̱ṃtagṃ śucag̍ṃ śamayatu । dyauśśā̱ṃtā̱ sādi̱tyena̍ śā̱ṃtā sā me̍ śā̱ṃtā śucag̍ṃ śamayatu । pṛ̱thi̱vī śāṃti̍ra̱ṃtari̍kṣa̱g̱ṃ śāṃti̱- rdyau-śśāṃti̱r-diśa̱-śśāṃti̍-ravāṃtaradi̱śā-śśāṃti̍- ra̱gni-śśāṃti̍r-vā̱yu-śśāṃti̍-rādi̱tya- śśāṃti̍-ścaṃdra̱mā̱-śśāṃti̱r-nakṣa̍trāṇi̱- śśāṃti rāpa̱śśāṃti̱-roṣa̍dhaya̱- śśāṃti̱r-vana̱spata̍ya̱-śśāṃti̱r-gau̍- śśāṃti̍-ra̱jā-śāṃti-raśva̱-śśāṃti̱ḥ puru̍ṣa̱- śśāṃti̱-brahma̱-śāṃti̍r-brāhma̱ṇa- śśāṃti-śāṃti̍-reva śāṃti-śāṃti̍-rme astu̱ śāṃti̍ḥ । tayā̱hagṃ śāṉtyā̱ sa̍rvaśā̱ṃtyā̱ mahya̍ṃ dvi̱pade̱ catu̍ṣpade ca̱ śāṃti̍ṃ karomi śāṃti̍rme astu̱ śāṃti̍ḥ ॥ eha̱ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̱ motti̍ṣṭhaṃta̱-manūtti̍ṣṭhaṃtu̱ mā mā̱g̱ śrīśca̱ hrīśca̱ dhṛti̍śca̱ tapo̍ me̱dhā pra̍ti̱ṣṭhā śra̱ddhā sa̱tyaṃ dharma̍ścai̱tāni̍ mā̱ mā hā̍siṣuḥ । udāyu̍ṣā svā̱yuṣodo̍ṣadīnā̱g̱ṃ rase̱notpa̱rjanya̍sya̱ śuṣme̱ṇodasthāma̱mṛtā̱g̱ṃ anu̍ । taccakṣu̍r-de̱vahi̍taṃ pu̱rastā̎ccu̱kramu̱ccara̍t । paśye̍ma śa̱rada̍śśa̱taṃ jīve̍ma śa̱rada̍śśa̱taṃ naṃdā̍ma śa̱rada̍śśa̱taṃ modā̍ma śa̱rada̍śśa̱taṃ bhavā̍ma śa̱rada̍śśa̱tagṃ śṛ̱ṇavā̍ma śa̱rada̍śśa̱taṃ pabra̍vāma śa̱rada̍śśa̱tamajī̍tāsyāma śa̱rada̍śśa̱taṃ jokca̱ sūrya̍ṃ dṛ̱śe । ya uda̍gānmaha̱to'rṇavā̎-dvi̱bhrāja̍mānassari̱rasya̱ madhyā̱thsamā̍ vṛṣa̱bho lo̍hitā̱kṣasūryo̍ vipa̱ścinmana̍sā punātu ॥ brahma̍ṇa̱ścota̱nyasi̱ brahma̍ṇa ā̱ṇīstho̱ brāhma̍ṇa ā̱vapa̍namasi dhāri̱teyaṃ pṛ̍thi̱vī brahma̍ṇā ma̱hī dā̍ri̱tame̍nena ma̱hadaṉtari̍kṣa̱ṃ diva̍ṃ dādhāra pṛthi̱vīgṃ sadevā̱ṃ-yam̐da̱haṃ-vem̐da̱ tada̱haṃ dhā̍rayāṇi̱ māmadvedo'thi̱ visra̍sat । me̱dhā̱ma̱nī̱ṣe māvi̱śatāgṃ sa̱mīcī̍ bhū̱tasya̱ bhavya̱syāva̍rudhyai̱ sarva̱māyu̍rayāṇi̱ sarva̱māyu̍rayāṇi । ā̱bhirgī̱rbhi-ryadato̍na ū̱namāpyā̍yaya harivo̱ vardha̍mānaḥ । ya̱dā sto̱tṛbhyo̱ mahi̍ go̱trā ru̱jāsi̍ bhūyiṣṭha̱bhājo̱ adha̍ te syāma । brahma̱ prāvā̍diṣma̱ tanno̱ mā hā̍sīt ॥ oṃ śāṃti̱ḥ śāṃti̱ḥ śāṃti̍ḥ ॥ oṃ saṃ tvā̍ siṃcāmi̱ yaju̍ṣā pra̱jāmāyu̱rdhana̍ṃ ca ॥ oṃ śāṃti̱ḥ śāṃti̱ḥ śāṃti̍ḥ ॥ oṃ śaṃ no̍ mi̱traḥ śaṃ-vam̐ru̍ṇaḥ । śaṃ no̍ bhavatvarya̱mā । śaṃ na̱ iṃdro̱ bṛha̱spati̍ḥ । śaṃ no̱ viṣṇu̍rurukra̱maḥ । namo̱ brahma̍ṇe । nama̍ste vāyo । tvame̱va pra̱tyakṣa̱ṃ brahmā̍si । tvāme̱va pra̱tyakṣa̱ṃ brahma̍ vadiṣyāmi । ṛ̱taṃ-va̍m̐diṣyāmi । sa̱tyaṃ-va̍m̐diṣyāmi । tanmāma̍vatu । tadva̱ktāra̍mavatu । ava̍tu̱ mām । ava̍tu va̱ktāram̎ ॥ oṃ śāṃti̱ḥ śāṃti̱ḥ śāṃti̍ḥ ॥ oṃ taccha̱ṃ-yom̐rāvṛ̍ṇīmahe । gā̱tuṃ-ya̱m̐jñāya̍ । gā̱tuṃ-ya̱m̐jñapa̍taye । daivī̎ sva̱stira̍stu naḥ । sva̱stir-mānu̍ṣebhyaḥ । ū̱rdhvaṃ ji̍gātu bheṣa̱jam । śaṃ no̍ astu dvi̱pade̎ । śaṃ catu̱ṣpade । oṃ śāṃti̱ḥ śāṃti̱ḥ śāṃti̍ḥ ॥ oṃ sa̱ha nā̍ vavatu । sa̱ha nau̍ bhunaktu । sa̱ha vī̱rya̍ṃ karavāvahai । te̱ja̱svinā̱vadhī̍tamastu̱ mā vi̍dviṣā̱vahai̎ ॥ oṃ śāṃti̱ḥ śāṃti̱ḥ śāṃti̍ḥ ॥