या जा॒ता ओष॑धयो दे॒वेभ्य॑स्त्रियु॒गं पु॒रा । मन्दा॑मि ब॒भ्रूणा॑म॒हग्ं श॒तं धामा॑नि स॒प्त च॑ ॥ 1 श॒तं वो॑ अंब॒ धामा॑नि स॒हस्र॑मु॒त वो॒ रुह॑: । अथा॑ शतक्रत्वो यू॒यमि॒मं मे॑ अग॒दं कृ॑त ॥ 2 पुष्पा॑वतीः प्र॒सूव॑तीः फ॒लिनी॑रफ॒ला उ॒त । अश्वा॑ इव स॒जित्व॑रीर्वी॒रुधः॑ पारयि॒ष्णव॑: ॥ 3 ओष॑धी॒रिति॑ मातर॒स्तद्वो॑ देवी॒रुप॑ ब्रुवे । रपाग्ं॑सि विघ्न॒तीरि॑त॒ रप॑श्चा॒तय॑मानाः ॥ 4 अ॒श्व॒त्थे वो॑ नि॒षद॑नं प॒र्णे वो॑ वस॒तिः कृ॒ता । गो॒भाज॒ इत्किला॑सथ॒ यत्स॒नव॑थ॒ पूरु॑षम् ॥ 5 यद॒हं वा॒जय॑न्नि॒मा ओष॑धी॒र्हस्त॑ आद॒धे । आ॒त्मा यक्ष्म॑स्य नश्यति पु॒रा जी॑व॒गृभो॑ यथा ॥ 6 यदोष॑धयः स॒ङ्गच्छ॑न्ते॒ राजा॑न॒: समि॑ताविव । विप्र॒: स उ॑च्यते भि॒षग्र॑क्षो॒हाऽमी॑व॒चात॑नः ॥ 7 निष्कृ॑ति॒र्नाम॑ वो मा॒ताऽथा॑ यू॒यग्ं स्थ॒ सङ्कृ॑तीः । स॒राः प॑त॒त्रिणी᳚: स्थन॒ यदा॒मय॑ति॒ निष्कृ॑त ॥ 8 अ॒न्या वो॑ अ॒न्याम॑वत्व॒न्याऽन्यस्या॒ उपा॑वत । ताः सर्वा॒ ओष॑धयः संविदा॒ना इ॒दं मे॒ प्राव॑ता॒ वच॑: ॥ 9 उच्छुष्मा॒ ओष॑धीनां॒ गावो॑ गो॒ष्ठादि॑वेरते । धनग्ं॑ सनि॒ष्यन्ती॑नामा॒त्मानं॒ तव॑ पूरुष ॥ 10 अति॒ विश्वा᳚: परि॒ष्ठाः स्ते॒न इ॑व व्र॒जम॑क्रमुः । ओष॑धय॒: प्राचु॑च्यवु॒र्यत्किं च॑ त॒नुवा॒ग्ं॒ रप॑: ॥ 11 यास्त॑ आत॒स्थुरा॒त्मानं॒ या आ॑विवि॒शुः परु॑: परुः । तास्ते॒ यक्ष्मं॒ वि बा॑धन्तामु॒ग्रो म॑ध्यम॒शीरि॑व ॥ 12 सा॒कं य॑क्ष्म॒ प्र प॑त श्ये॒नेन॑ किकिदी॒विना᳚ । सा॒कं वात॑स्य॒ ध्राज्या॑ सा॒कं न॑श्य नि॒हाक॑या ॥ 13 अ॒श्वा॒व॒तीग्ं सो॑मव॒तीमू॒र्जय॑न्ती॒ मुदो॑जसम् । आ वि॑त्सि॒ सर्वा॒ ओष॑धीर॒स्मा अ॑रि॒ष्टता॑तये ॥ 14 याः फ॒लिनी॒र्या अ॑फ॒ला अ॑पु॒ष्पा याश्च॑ पु॒ष्पिणी᳚: । बृह॒स्पति॑ प्रसूता॒स्ता नो॑ मुञ्च॒न्त्वग्ंह॑सः ॥ 15 या ओष॑धय॒: सोम॑राज्ञी॒: प्रवि॑ष्टाः पृथि॒वीमनु॑ । तासां॒ त्वम॑स्युत्त॒मा प्रणो॑ जी॒वात॑वे सुव ॥ 16 अ॒व॒पत॑न्तीरवदन्दि॒व ओष॑धय॒: परि॑ । यं जी॒वम॒श्नवा॑महै॒ न स रि॑ष्याति॒ पूरु॑षः ॥ 17 याश्चे॒दमु॑पशृ॒ण्वन्ति॒ याश्च॑ दू॒रं परा॑गताः । इ॒ह सं॒गत्य॒ ताः सर्वा॑ अ॒स्मै सं द॑त्त भेष॒जम् ॥ 18 मा वो॑ रिषत्खनि॒ता यस्मै॑ चा॒हं खना॑मि वः । द्वि॒पच्चतु॑ष्पद॒स्माक॒ग्ं॒ सर्व॑म॒स्त्वना॑तुरम् ॥ 19 ओष॑धय॒: सं व॑दन्ते॒ सोमे॑न स॒ह राज्ञा᳚ । यस्मै॑ क॒रोति॑ ब्राह्म॒णस्तग्ं रा॑जन् पारयामसि ॥ 20 ओं शान्ति॒: शान्ति॒: शान्ति॑: ।