മേധാ സൂക്തം

ഓം-യഁശ്ഛന്ദ॑സാമൃഷ॒ഭോ വി॒ശ്വരൂ॑പഃ ।

ഛന്ദോ॒ഭ്യോഽധ്യ॒മൃതാ᳚ഥ്സംബ॒ഭൂവ॑ ।

സ മേന്ദ്രോ॑ മേ॒ധയാ᳚ സ്പൃണോതു ।

അ॒മൃത॑സ്യ ദേവ॒ധാര॑ണോ ഭൂയാസം ।

ശരീ॑രം മേ॒ വിച॑ർഷണം ।

ജി॒ഹ്വാ മേ॒ മധു॑മത്തമാ ।

കർണാ᳚ഭ്യാം॒ ഭൂരി॒വിശ്രു॑വം ।

ബ്രഹ്മ॑ണഃ കോ॒ശോ॑ഽസി മേ॒ധയാ പി॑ഹിതഃ ।

ശ്രു॒തം മേ॑ ഗോപായ ॥

ഓം ശാന്തിഃ॒ ശാന്തിഃ॒ ശാന്തിഃ॑ ॥

ഓം മേ॒ധാദേ॒വീ ജു॒ഷമാ॑ണാ ന॒ ആഗാ᳚-ദ്വി॒ശ്വാചീ॑ ഭ॒ദ്രാ സു॑മന॒സ്യ മാ॑നാ ।

ത്വയാ॒ ജുഷ്ടാ॑ നു॒ദമാ॑നാ ദു॒രുക്താ᳚ൻ ബൃ॒ഹദ്വ॑ദേമ വി॒ദഥേ॑ സു॒വീരാഃ᳚ ।

ത്വയാ॒ ജുഷ്ട॑ ഋ॒ഷിർഭ॑വതി ദേവി॒ ത്വയാ॒ ബ്രഹ്മാ॑ഽഽഗ॒തശ്രീ॑രു॒ത ത്വയാ᳚ ।

ത്വയാ॒ ജുഷ്ട॑ശ്ചി॒ത്രം-വിഁം॑ദതേ വസു॒ സാ നോ॑ ജുഷസ്വ॒ ദ്രവി॑ണോ ന മേധേ ॥

മേ॒ധാം മ॒ ഇന്ദ്രോ॑ ദദാതു മേ॒ധാം ദേ॒വീ സര॑സ്വതീ ।

മേ॒ധാം മേ॑ അ॒ശ്വിനാ॑വു॒ഭാ-വാധ॑ത്താം॒ പുഷ്ക॑രസ്രജാ ।

അ॒പ്സ॒രാസു॑ ച॒ യാ മേ॒ധാ ഗം॑ധ॒ർവേഷു॑ ച॒ യന്മനഃ॑ ।

ദൈവീം᳚ മേ॒ധാ സര॑സ്വതീ॒ സാ മാം᳚ മേ॒ധാ സു॒രഭി॑-ര്ജുഷതാ॒ഗ്॒ സ്വാഹാ᳚ ॥

ആമാം᳚ മേ॒ധാ സു॒രഭി॑-ര്വി॒ശ്വരൂ॑പാ॒ ഹിര॑ണ്യവർണാ॒ ജഗ॑തീ ജഗ॒മ്യാ ।

ഊർജ॑സ്വതീ॒ പയ॑സാ॒ പിന്വ॑മാനാ॒ സാ മാം᳚ മേ॒ധാ സു॒പ്രതീ॑കാ ജുഷന്താം ॥

മയി॑ മേ॒ധാം മയി॑ പ്ര॒ജാം മയ്യ॒ഗ്നി-സ്തേജോ॑ ദധാതു॒,

മയി॑ മേ॒ധാം മയി॑ പ്ര॒ജാം മയീന്ദ്ര॑ ഇന്ദ്രി॒യം ദ॑ധാതു॒,

മയി॑ മേ॒ധാം മയി॑ പ്ര॒ജാം മയി॒ സൂര്യോ॒ ഭ്രാജോ॑ ദധാതു ॥

[ഓം ഹം॒സ॒ ഹം॒സായ॑ വി॒ദ്മഹേ॑ പരമഹം॒സായ॑ ധീമഹി ।

തന്നോ॑ ഹംസഃ പ്രചോ॒ദയാ᳚ത് ॥ (ഹംസഗായത്രീ)]

ഓം ശാന്തിഃ॒ ശാന്തിഃ॒ ശാന്തിഃ॑ ॥

Recite with devotion and pure heart

Regular practice brings spiritual benefits