ಅ॒ಹಮ॑ಸ್ಮಿ ಪ್ರಥ॒ಮಜಾ ಋ॒ತಸ್ಯ॑ । ಪೂರ್ವಂ॑ ದೇ॒ವೇಭ್ಯೋ॑ ಅ॒ಮೃತ॑ಸ್ಯ॒ ನಾಭಿ॑: । ಯೋ ಮಾ॒ ದದಾ॑ತಿ॒ ಸ ಇದೇ॒ವ ಮಾಽಽವಾ᳚: । ಅ॒ಹಮನ್ನ॒ಮನ್ನ॑ಮ॒ದಂತ॑ಮದ್ಮಿ । ಪೂರ್ವ॑ಮ॒ಗ್ನೇರಪಿ॑ ದಹ॒ತ್ಯನ್ನಂ᳚ । ಯ॒ತ್ತೌ ಹಾ॑ಽಽಸಾತೇ ಅಹಮುತ್ತ॒ರೇಷು॑ । ವ್ಯಾತ್ತ॑ಮಸ್ಯ ಪ॒ಶವ॑: ಸು॒ಜಂಭಂ᳚ । ಪಶ್ಯಂ॑ತಿ॒ ಧೀರಾ॒: ಪ್ರಚ॑ರಂತಿ॒ ಪಾಕಾ᳚: । ಜಹಾ᳚ಮ್ಯ॒ನ್ಯಂ ನ ಜ॑ಹಾಮ್ಯ॒ನ್ಯಂ । ಅ॒ಹಮನ್ನಂ॒ ವಶ॒ಮಿಚ್ಚ॑ರಾಮಿ ॥ 1 ಸ॒ಮಾ॒ನಮರ್ಥಂ॒ ಪರ್ಯೇ॑ಮಿ ಭುಂ॒ಜತ್ । ಕೋ ಮಾಮನ್ನಂ॑ ಮನು॒ಷ್ಯೋ॑ ದಯೇತ । ಪರಾ॑ಕೇ॒ ಅನ್ನಂ॒ ನಿಹಿ॑ತಂ ಲೋ॒ಕ ಏ॒ತತ್ । ವಿಶ್ವೈ᳚ರ್ದೇ॒ವೈಃ ಪಿ॒ತೃಭಿ॑ರ್ಗು॒ಪ್ತಮನ್ನಂ᳚ । ಯದ॒ದ್ಯತೇ॑ ಲು॒ಪ್ಯತೇ॒ ಯತ್ಪ॑ರೋ॒ಪ್ಯತೇ᳚ । ಶ॒ತ॒ತ॒ಮೀ ಸಾ ತ॒ನೂರ್ಮೇ॑ ಬಭೂವ । ಮ॒ಹಾಂತೌ॑ ಚ॒ರೂ ಸ॑ಕೃದ್ದು॒ಗ್ಧೇನ॑ ಪಪ್ರೌ । ದಿವಂ॑ ಚ॒ ಪೃಶ್ನಿ॑ ಪೃಥಿ॒ವೀಂ ಚ॑ ಸಾ॒ಕಂ । ತತ್ಸಂ॒ಪಿಬಂ॑ತೋ॒ ನ ಮಿ॑ನಂತಿ ವೇ॒ಧಸ॑: । ನೈತದ್ಭೂಯೋ॒ ಭವ॑ತಿ॒ ನೋ ಕನೀ॑ಯಃ ॥ 2 ಅನ್ನಂ॑ ಪ್ರಾ॒ಣಮನ್ನ॑ಮಪಾ॒ನಮಾ॑ಹುಃ । ಅನ್ನಂ॑ ಮೃ॒ತ್ಯುಂ ತಮು॑ ಜೀ॒ವಾತು॑ಮಾಹುಃ । ಅನ್ನಂ॑ ಬ್ರ॒ಹ್ಮಾಣೋ॑ ಜ॒ರಸಂ॑ ವದಂತಿ । ಅನ್ನ॑ಮಾಹುಃ ಪ್ರ॒ಜನ॑ನಂ ಪ್ರ॒ಜಾನಾಂ᳚ । ಮೋಘ॒ಮನ್ನಂ॑ ವಿಂದತೇ॒ ಅಪ್ರ॑ಚೇತಾಃ । ಸ॒ತ್ಯಂ ಬ್ರ॑ವೀಮಿ ವ॒ಧ ಇತ್ಸ ತಸ್ಯ॑ । ನಾರ್ಯ॒ಮಣಂ॒ ಪುಷ್ಯ॑ತಿ॒ ನೋ ಸಖಾ॑ಯಂ । ಕೇವ॑ಲಾಘೋ ಭವತಿ ಕೇವಲಾ॒ದೀ । ಅ॒ಹಂ ಮೇ॒ಘಃ ಸ್ತ॒ನಯ॒ನ್ವರ್ಷ॑ನ್ನಸ್ಮಿ । ಮಾಮ॑ದಂತ್ಯ॒ಹಮ॑ದ್ಮ್ಯ॒ನ್ಯಾನ್ ॥ 3 [ ಅಹ॒ಗ್ಂ ಸದ॒ಮೃತೋ॑ ಭವಾಮಿ । ಮದಾ॑ದಿ॒ತ್ಯಾ ಅಧಿ॒ ಸರ್ವೇ॑ ತಪಂತಿ । ]